طريقة صبغ الشعر في البيت بنفسك بالخطوات

ريهام محمود
ريهام محمود
في
شعر
223962

صبغ الشعر في البيت من الحاجات اللي في بنات كتير بتشوفها صعبة ومش بيعرفوا يعملوا الصبغة لنفسهم في البيت وفي نفس الوقت مش دايما بيكون عندهم وقت يروحوا صالون التجميل يصبغوا شعرهم ومش بيعرفوا يعملوا ايه, احنا النهاردة هنحل لكل بنات حوا المشكلة دي وهنخليكي تصبغي شعرك بنفسك في البيت والنتيجة هتطلع زي صالون التجميل بالظبط.

تعالوا نشوف مع بعض طريقة صبغ الشعر في البيت خطوة بخطوة:

1- الخطوة الاولى:

اول خطوة هي تحضير الشعر قبل الصبغة اول حاجة منكونش غاسلين شعرنا قبل الصبغة بيوم او يومين عشان نحتفظ بالزيوت اللي بتفرزها فروة الراس لانها بتساعد على ثبات اللون اكتر, ولو شعرك جاف اوي ممكن قبل الصبغة باسبوع تعملي كل يوم حمامات كريم لشعرك عشان تغذيه وترطبيه وده كمان هيحافظ على شعرك طري وهيحميه من الجفاف بعد الصبغة.

2- الخطوة التانية:

تاني خطوة معانا هي اختيار اللون لازم نكون حريصين اوي لما نيجي نختار اللون ونختار اللون الصح اللي يمشي معانا دايما اختاري اللون يكون افتح او اغمق من لون شعرك الطبيعي بدرجتين.

3- الخطوة التالتة:

سرحي شعرك كويس بمشط تكون سنانة واسعة او فرشة عشان تفرقي خصل شعرك من بعضها وقسمي شعرك اربع اجزاء, وادهني عند منابت الشعر والاذن والرقبة بالفازلين عشان تحمي جلدك من الصبغة.

4- الخطوة الرابعة:

هنبدأ نجهز نفسنا للصبغة حطي فوطة على كتفك عشان تحمي هدومك من بقع الصبغة والبسي جوانتي عشان تحمي ايدك من الصبغة.

البسي جوانتي وحطي فوطة على كتفك
البسي جوانتي وحطي فوطة على كتفك

5- الخطوة الخامسة:

قبل ما تبدأي في الصبغة اقري الارشادات اللي علبة الصبغة كويس ونبدأ بعدها نعمل الصبغة, هنجهز دلوقتي الصبغة بتاعتنا بيجي مع علبة الصبغة حاجتين اللون اللي هو بيكون في انبوبة على شكل كريم ومعاه كريم تفتيح بيكون في ازازة وسايل شوية عامل زي البلسم دول هنمزجهم مع بعض في طبق ونخلطهم كويس اوي.

تجهيز الصبغة
تجهيز الصبغة

6- الخطوة السادسة:

 هنبدأ دلوقتي الصبغة هناخد خصلة خصلة من الشعر ونحط عليها الصبغة بفرشة الصبغة ونبدأ الاول بالجذور من قدام لحد الاطراف, وبعدين بعد ما تخلصي صبغة الشعر كلها دلكي الشعر كله مع بعضه باطراف صوابعك عشان الصبغة تتغلغل في كل الشعر وبعدين نغطي شعرنا بطاقية الشعر او كيس بلاستيك, وهنسيب الصبغة على الشعر زي ما مكتوب في ارشادات علبة الصبغة ومنزودش الوقت لانه ممكن تضر شعرنا لو سيبناها زيادة عن اللزوم ولا نغسلها قبل الوقت كمان نلتزم بالوقت المكتوب بالظبط اظبطي التوقيت بعد اخر خصلة بتصبغيها من شعرك على طول.

صبغ الشعر
صبغ الشعر

7- الخطوة السابعة:

اخر خطوة معانا هي غسل الشعر بعد ما نسيب الصبغة على شعرنا الوقت المطلوب نغسلة كويس بمية دافية لحد ما اللون ينزل كله من الشعر ونلاقي المية نازلة صافية مافيهاش اي لون وبعدين نسيب الشعر ساعة عشان اللون يثبت اكتر وبعدها نغسل الشعر بالشامبو والبلسم عشان نرطبه بعد الصبغة.

كده نكون خلصنا الخطوات بتاعتنا كلها ومافيهاش اي صعوبة خالص كلها خطوات سهلة وبسيطة ونخلي بالنا اللون هيظهر بعد ما الشعر ينشف مش هيبان وهو مبلول بعد ما ينشف خالص هتشوفي اللون اللي انتي عملتيه ظهر.

اعرفي معانا كمان طريقة صبغ الشعر اومبري.

مقالات متعلقه

5 حاجات لازم تعرفيها لو بتصبغي شعرك لاول مرة

5 حاجات لازم تعرفيها لو بتصبغي شعرك لاول مرة

نصايح بسيطة هتحافظ على لون صبغة شعرك لفترة اطول

نصايح بسيطة هتحافظ على لون صبغة شعرك لفترة اطول

طريقة عمل سبراي الليمون لتفتيح الشعر

طريقة عمل سبراي الليمون لتفتيح الشعر