اتعرفوا معانا علي موضة بنطلون البوي فريند جينز “Boyfriend jeans”

بقلمريهام محمود فيموضة وأزياء visibility43379

البنطلون الجينز من الحاجات الاساسية في دولابنا ومافيش بنت دولابها بيخلى من البنطلون الجينز وتقريبا منقدرش نستغنى عنه في خروجاتنا اليومية سواء في الجامعة او في الشغل او في خروجاتنا مع اصحابنا وده لانه عملي جدا ومريح وبنقدر نتحرك فيه بسهولة, وبنحب دايما نشتري منه الوان وموديلات مختلفة لانه بيليق على كل حاجة يعني يتلبس عليه بلوزة او قميص او بلوفر ايا كان اللي بيتلبس عليه بيطلع حلو, وكل سنة بينزل للبنطلونات الجينز استايلات وموضات مختلفة منها الواسع ومنها الضيق ومنها موضة الripped  , لكن احنا النهاردة هنتكلم عن موضة بنطلون ال Boyfriend jeans  او “البنطلون الجينز الرجالي” بوي فريند جينز ايه هو وازاي تلبسيه وتطلعي بلوك انيق وانثوي ؟.

 موضة بنطلون البوي فريند بيكون عادة موديلة واسع مش سكيني يعني مناسب جدا للمحجبات, وتقدري تلبسيه باكتر من طريقة ممكن تلبسي عليه قميص وشوز رياضي لو انتي خارجة الصبح ورايحة الجامعة مثلا وعايزة حاجة مريحة, ممكن لو خارجة بعد الضهر يتلبس على شوز بكعب وبلوزة وتخليه استايل انيق وانثوي, ممكن يتلبس على بليزر او على جاكت جلد, او يتلبس عليه بلوزة طويلة او قصيرة, او يتلبس عليه بلوفر يعني يمشي مع كل حاجة تقريبا وقدامك اختيارات كتير عشان تنوعي في الاستايل بتاعك

تعالوا نشوف مع بعض مجموعة استايلات مختلفة ل بنطلون البوي فريند و إزاي ممكن نلبسه في موضة 2016:

هنقولكم بقى شوية نصايح سريعة عشان يطلع اللوك بتاعنا حلو وانيق:

1- ممكن نعمل تنيه صغيرة في رجل البنطلون من تحت عشان نديه شكله بناتي حلو.

2- لو عايزة تلبسي البنطلون بلوك كلاسيكي ممكن تلبسيه على بليزر طويل او قصير مع تيشيرت او قميص.

3- ممكن يمشي على شوز رياضي او باليرينا او صندل او شوز بكعب عالي او بوت.

4- دايما نخلي في توازن في الطلة بتاعتنا يعني منلبسش عليه حاجات واسعة زيادة عن اللزوم لان البنطلون اصلا واسع ولو اتلبس عليه حاجة واسعة اوي هيطلع الشكل مش حلو عشان كده لازم ناخد بالنا من النقطة دي ونلبس حاجات وسعها مناسب عليه.

 5- لو هنلبس عليه بلوزة او قميص او تيشيرت ممكن ندخله في البنطلون من قدام بس ونسيب الباقي بره البنطلون بيدي لوك حلو اوي وفي نفس الوقت بيحدد منطقة الوسط وبيكون مداري الجزء اللي ورا.

6- اخر حاجة عشان نكمل طلتنا مننساش الاكسسوارات المناسبة للستايل بتاعنا.

شوفي كمان موضة البوي فريند بليزر

موضة البوي فريند بليزر
موضة البوي فريند بليزر