11 وصفة لعلاج اثار الخدوش والجروح والحروق وندبات حب الشباب

ريهام محمود
ريهام محمود
في
بشرة
119463

في كتير من البنات بيعانوا من مشكلة اثار الخدوش والجروح او حروق قديمة سايبة علامة ومش عايزة تروح او الندبات اللي بتكون بسبب حب الشباب ودي بالذات في كتير بيعانوا منها ان الحبوب بتروح لكن للاسف بتسيب مكانها ندبات على الوش بتشوه شكل الوش, والحاجات دي كلها بتبقى مزعجة بالنسبة لنا وبنبقى متضايقين منها جدا ونفسنا نتخلص منها باي طريقة ومش كلنا طبعا عندنا ميزانية نروح نعمل ليزر ونعالجها في مراكز التجميل لانه بيبقى غالي جدا, عشان كده النهاردة جيبنا لكل بنات حوا اللي بيعانوا من المشاكل دي كلها مجموعة وصفات طبيعية بسيطة وسهلة ومش مكلفة وفي نفس الوقت فعالة جدا هتخلصكم من مشكلة الخدوش والجروح والحروق وندبات حب الشباب.

تعالوا نشوف مع بعض وصفات علاج اثار الخدوش والجروح والحروق والندبات:

1- الوصفة الاولى:

اول وصفة باستخدام زيت جوز الهند لانه مفيد جدا للبشرة عشان فيه مواد مضادة للاكسدة وبيزود انتاج الكولاجين في البشرة وده بيساعد على التئام الجلد وعلاج اي تلف فيه وبينعمه.

هنجيب معلقة من زيت جوز الهند وندفيها شوية على النار ونبدأ ندلك بيه بشرتنا في حركات دائرية لحد ما البشرة تمتص الزيت خالص وسيبيه عادي على بشرتك من غير ما تغسليه, وكرري دهن البشرة بالزيت كذا مره في اليوم لحد ما توصلي للنتيجة اللي انتي عايزاها.

زيت جوز الهند لعلاج اثار الخدوش والجروح والحروق والندبات
زيت جوز الهند لعلاج اثار الخدوش والجروح والحروق والندبات

2- الوصفة التانية:

عصير الليمون من الحاجات المعروفة جدا كعلاج فعال للندبات والخدوش لانه يعتبر مقشر طبيعي للبشرة وبيخلصك من كل الخلايا الميتة ده غير انه بيساعد على تفتيح البشرة.

هنجيب شوية عصير ليمون وندهن بيهم البشرة ونسيبه لمدة 10 دقايق وبعدين نغسله وننشف بشرتنا وندهنها اي كريم مرطب, ممكن تعملي الوصفة دي مرتين في اليوم, بس قبل استخدام الليمون لازم نجربه الاول على جزء صغير من البشرة لان في بنات بشرتهم بتكون حساسة من الليمون او ممكن نضيف عليه مية ورد عشان نخفف تاثيره شوية, ولو هنستخدم الوصفة دي نخلي بالنا لو هننزل في الشمس لازم نحط كريم واقي من الشمس عشان الليمون بيخلي البشرة حساسة للشمس.

عصير الليمون
عصير الليمون

3- الوصفة التالتة:

خل التفاح كمان من الحاجات المقشرة للبشرة وبتساعد على ازالة الجلد الميت.

هنجيب خل التفاح ونخففه بالمية وبحتة قطنة ندهن بشرتنا بالخليط ونسيبه من 10 ل 15 دقيقة وبعدين اغسليه بالمية ورطبي بشرتك, وكرريها كذا مره في اليوم.

خل التفاح
خل التفاح

4- الوصفة الرابعة:

جل صبار الالوفيرا من الحاجات اللي بتجدد خلايا الجلد وبيعالج اي تلف فيه وبينعم ويرطب البشرة.

هنجيب ورقة الصبار ونقطعها نصين ونضغط عليها عشان نخرج الجل منها حطي الجل على البشرة ودلكيها كويس في حركات دائرية وسيبيه لحد ما ينشف وبعدين اغسلي بشرتك بمية دافية, وكرري الوصفة كذا مرة في اليوم.

جل صبار الالوفيرا
جل صبار الالوفيرا

5- الوصفة الخامسة:

العسل من الحاجات الفعالة جدا في علاج تلف البشرة وتجديد الخلايا وبيرطب وبينعم الجلد وممكن نستخدمة باكتر من طريقة.

الطريقة الاولى : هنجيب عسل نحل وندلكه على البشرة لمدة عشر دقايق وبعدين سيبيه على البشرة لمدة ساعة وبعدين اغسليه بمية دافية, وكرري الوصفة مرتين في اليوم.

الطريقة التانية: هنحط معلقتين عسل ونضيف عليهم معلقة صودا الخبر “كربوناتو” وندلك البشرة بالخليط ده لمدة تلات دقايق وبعدين هنجيب حتة قماشة نضيفة صغيرة نكون مسخنينها على حمام بخار ونحطها على مكان الندبات واحنا حاطين الماسك وتسيبيها على بشرتك لحد ما تبرد وبعدين تشيليها واغسلي بشرتك بمية دافية, كرري الوصفة تلات مرات في الاسبوع.

الطريقة التالتة: هنجيب تلات معالق عسل ونضيف عليهم تلات معالق كمون مطحون ونخلطهم مع بعض كويس وندهن بيهم مكان الندبات ونسيبه على البشرة لمدة ساعة وبعدين اغسلي بشرتك بمية دافية, كرري الوصفة يوميا وهتشوفي النتايج خلال تلات اسابيع.

علاج اثار الخدوش والجروح والحروق 1
علاج اثار الخدوش والجروح والحروق 1

 6- الوصفة السادسة:

هنجيب كبسولة زيت فيتامين E  “موجود في الصيدلية” ونفتح الكبسولة وناخد الزيت ندلك بيه بشرتنا تلات مرات في اليوم.

فيتامين E
فيتامين E

7- الوصفة السابعة:

زبدة الكاكاو من الحاجات المرطبة للبشرة مش بس للشفايف وبتساعد على علاج اثار الجروح والندبات لانها بترطب البشرة بعمق مش بس الطبقة السطحية.

افركي بشرتك بحتة قماش مبلولة ونشفيها وبعدين دلكي بشرتك بزبدة الكاكاو في حركات دائرية, كرري الوصفة دي تلات مرات في الاسبوع.

زبدة كاكاو
زبدة كاكاو

8- الوصفة التامنة:

المكونات:

علبة كريم جليسوليد.

عصير تلات لمونات.

كوباية من جل الصبار.

3 معالق زيت لوز حلو.

طريقة التحضير والاستخدام:

هنخلط المكونات كلها مع بعض كويس وندهن بيه البشرة يوميا, واحتفظي بالخليط في اي علبة او برطمان عندك وادهنية بشكل يومي زي اي كريم عادي, انتي كمان ممكن تكتفي بكريم الجليسوليد بس من غير اضافات تانية لانه هو هو فعال اوي في علاج اثار الجروح والخدوش بس الاضافات بتقوي تاثيره اكتر كمان.

علاج اثار الخدوش والجروح والحروق 2
علاج اثار الخدوش والجروح والحروق 2

9- الوصفة التاسعة:

مية البصل من الحاجات المفيدة اوي للجلد وبيساعد في علاج اثار الجروح وبيحفز الجلد كمان على انتاج الكولاجين, بس ادهني بشرتك بمية البصل يوميا لحد ما توصلي للنتيجة اللي انتي عايزاها.

مية البصل لعلاج الخدوش والجروح والحروق والندبات
مية البصل لعلاج الخدوش والجروح والحروق والندبات

10- الوصفة العاشرة:

المكونات:

خيارة.

نعناع.

بيضة.

طريقة التحضير والاستخدام:

هنجيب الخيارة ونقشرها ونحط عليها شوية ورق نعناع ونضربهم مع بعض في الخلاط وبعدين هنضيف عليهم بيضة مخفوقة ونخلطهم كويس ونحط الخليط على البشرة ونسيبه نص ساعة وبعدين نغسله بمية باردة, نكرر الوصفة 3 مرات في الاسبوع.

علاج اثار الخدوش والجروح والحروق 3
علاج اثار الخدوش والجروح والحروق 3

11- الوصفة الحادية عشر:

ندهن البشرة كل يوم بزيت الزيتون لانه معروف انه من الحاجات الفعالة جدا في ترميم الجلد وتجديد خلايا البشرة.

زيت زيتون
زيت زيتون

شوفو معانا كمان وصفات فعالة لتبييض وتنعيم الجسم.

مقالات متعلقه

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

10 نصايح جمالية دخليهم في روتينك هيفرقوا معاكي

10 نصايح جمالية دخليهم في روتينك هيفرقوا معاكي

10 وصفات طبيعية لتغذية بشرتك في الشتا

10 وصفات طبيعية لتغذية بشرتك في الشتا