لو شعرك خفيف .. ماتعمليش الحاجات دى !
كلنا بنحب نهتم بشعرنا و بمظهره لانه جزء اساسى جدا فى شكلنا و مظهرنا ، لكن ممكن تقابلنا مشاكل كتير زى تساقط الشعر او تقصف الشعر و غيرها بس النهاردة هنتكلم عن مشكلة الشعر الخفيف ، لانه ممكن يكون شعرك ناعم ، صحى وطويل لكن بيبان خفيف و مش عارفه ازاى تخليه اكثر كثافة او يبان اتقل ، فى المقال ده هنقولك على 4 غلطات شائعين بيعملوها البنات اللى شعرهم خفيف و ممكن تكونى بتعمليها فى شعرك ، و كمان هنقولك على تسريحات و افكار لتصفيف الشعر هتخلى شعرك الخفيف يبان كثيف اكتر و يبان اتقل بكتير.
يلا نبدأ؟
1- ما تفرديش شعرك على الاخر ” الشعر المفرود flat ” :
اول حاجه المفروض ماتعمليهاش لو شعرك خفيف انك تفردى شعرك بالمكواه لآخره ، لانه ده بيخلى شعرك اقرب لفروة الرأس و كمان ممكن يبينه اقل من حجمه الطبيعى لانه بيبقى قريب جدا من رأسك و وشك ،حاولى دايما تصففى شعرك بطريقة تخليه مرفوع شوية من عند الجذور و مموج او كيرلى على خفيف من عند الاطراف علشان يبان انه اكتر و كثافته اعلى .
2- ما تبطليش استخدام بكرة الشعر :
ايوة ، بكرة الشعر او فرشاة تصفيف الشعر المدورة مهمة جدا بالنسبة لك لو شعرك خفيف ، لانه لما بتلفى شعرك عليها بتخليه بان اتقل لانها بتديه تمويجة خفيفة و بتبان طبيعية جدا غير لما بتعمليه كيرلى باستخدام البيبى ليس ، حاولى من فترة للتانية تستخدمى بكر الشعر على شعرك المبلول بعد الاستحمام ، و تمررى عليه السيشوار بدرجة حرارة متوسطة و هتلاحظى الفرق .
3- ما تسيبيش شعرك يطول !
طبعا مفيش بنت مابتبقاش عايزة شعرها يبقى طويل جدا ، و يمكن معظم البنات بيفضلوا يجربوا علاجات و وصفات علشان يخلوا شعرهم اطول ، بس للاسف لو شعرك خفيف الشعر الطويل يبقى عدوك الاول ! ، لانه بيبين شعرك اخف و طول الشعر مش هيمنع انه يبان الشعر خفيف من عند الجذور او منطقة فروة الرأس ، فدايما اهتمى بأنك تقصى شعرك لحد آخر رقبتك او كاريه قصير و لو حبيتى تطوليه اكتر من كده يبقى اكتر طول ممكن توصلى شعرك ليه هو لحد الكتف ، قصات الشعر القصيرة بتخلى الشعر الخفيف يبان اكتر كثافة و يببقى اللى ك بتاعه احلى بكتير .
4-ماتستخدميش مستحضرات كتير :
مستحضرات العناية بالشعر ممكن تكون مهمة و مفيدة ، لكن لو شعرك خفيف استخدام مستحضرات بشكل كتير سواء كانوا اكتر من مستحضر او بتستخدميه مرات كتيره وى مستحضرات التصفيف من كريمات و زيوت لشعر بيخلى شعرك اقرب لرأسك او بمعنى اصح ” بيتقل شعرك ” فبيبين كثافته القليلة ، استخدمى كريم او زيت التصفيف الخاص بشعرك مرتين فى الاسبوع كفايه علشان تقدمى لشعرك التغذيه اللى محتاجها و نفس الوقت تحميه من انه يبقى مظهره مش حلو .
و كمان شوفى هنا افكار لتسريحات سهلة ممكن تعمليها لو شعرك خفيف ، و تقدرى تلاقى اكتر من 30 تسريحة شعر للشعر الخفيف والطويل هتبين شعرك اتقل!