اعرفي معانا الوان الايشادو اللي تليق مع لون عينيكي

بقلمريهام محمود فيمكياج visibility10396

بعد ما اتكلمنا عن طريقة رسم الايشادو واختيار ومزج الالوان النهاردة هنقولكم ازاي نختار الون الايشادو اللي تليق مع لون عنينا لانه لما نختار لون الايشادو الصح هيظهر لون العين اكتر ويظهر جمالها عشان كده لازم نعرف الالوان اللي تليق على كل لون عين.

ياللا نعرف مع بعض الوان الايشادو اللي تليق مع كل لون عين:

لازم قبل ما نختار الالوان نعرف ان اللون لازم يكون عكس لون العين عشان يبين لونها لان لو حطينا لون ايشادو نفس لون العين هيطفيها ومش هيبين جمالها, ممكن نحطه نفس لون العين على الجفن اللي تحت بس لكن اللي فوق يكون عكس لون العين.

الوان الايشادو للعيون السودا:

صاحبة العيون السودا من المحظوظات لان لون العيون السودا بيناسبها تقريبا كل الالوان والدرجات من اول الالوان الفاتحة لحد الالوان الغامقة وتقريبا احنا معظمنا من صاحبات العيون السودا يعني مش هتبقي متقيدة بألوان معينة تقدري تختاري اي لون وهيطلع حلو مع لون عينيكي.

الوان الايشادو للعيون السودا
الوان الايشادو للعيون السودا

الوان الايشادو للعيون البني:

معظم الالوان بتليق اوي مع لون العيون البني ولكن اكتر الالوان اللي بتظهرها هي اللون السيمون, والدهبي, والفضي, والبرونزي, والارجواني, والبنفسجي, ودرجات اللون الازرق, والاخضر, والخوخي, والمشمشي, ودرجات البني من اول البني الغامق لحد اللون البيج, والرمادي الغامق, والارجواني والرمادي مع بعض, والزيتوني, والوردي, واي لون من الالوان دي ممكن ندمجه مع اللون الاسود بيدي لوك قوي للعين وبيظهرها بشكل حلو اوي.

الوان الايشادو للعيون البني
الوان الايشادو للعيون البني

الوان الايشادو للعيون البني الغامق:

الوان الايشادو القوية هي انسب الالوان للعيون البني الغامق زي البنفسجي, والفضي, والشوكولاتة مع رسم خط ايشادو باللون الاسود على خط الرموش اللي تحت واللي فوق عشان تظهر العين اكتر.

الوان الايشادو للعيون البني الغامق
الوان الايشادو للعيون البني الغامق

الوان الايشادو للعيون البندقي والعسلي:

انسب الالوان للون ده من العيون هي الوان الباستيل والالوان الوردية بتنور العين وبتظهر جمالها جدا.

 الايشادو للعيون البندقي والعسلي
الايشادو للعيون البندقي والعسلي

الوان الايشادو للعيون الخضرا:

العيون الخضرا من الالوان اللي بتبقى منورة لوحدها مش محتاجة اي حاجة تظهرها,عشان كده انسب الوان للون العيون الخضرا هي الالوان الغامقة والدافية وقدامك اختيارات الوان كتير من الالوان الدافية  زي البني, والاسود, والرمادي الغامق, والبنفسجي الغامق, والاسود والبني مع بعض , والبني الشوكولاتة, والبرونزي, والخوخي, والدهبي, والاحمر والبنفسجي مع بعض , والارجواني, والموف, ودرجات الرمادي من اول الرمادي الفاتح لحد اللون الفحمي, والرمادي والبيج مع بعض, والاحمر والبني مع بعض, والبني والبرتقاني, والبرقوقي.

من الالوان المميزة اوي بقى للعيون الخضرا وبتظهرها بلون زمردي اللون الارجواني الغامق, والنحاسي مع الاحمر, والازرق الغامق مع البني المحمر, لكن ابعدي عن استخدام اللون الاحمر لوحده يعني ممكن تمزجيه مع لون تاني زي ما قولنا زي البنفسجي او البني لكن متحطيهوش لوحده.

الايشادو للعيون الخضرا
الايشادو للعيون الخضرا

الوان الايشادو للعيون الزرقا:

انسب الوان ايشادو للعيون الزرقا هي الالوان الهادية الطبيعية زي الوردي, لون الشوكولاتة الفاتح, والبني, والبرونزي, والدهبي, والخوخي, والمشمشي, والرمادي, الاخضر الفاتح, والبنفسجي, والبرقوقي, والاصفر, والنحاسي.

 الايشادو للعيون الزرقا
الايشادو للعيون الزرقا

الوان الايشادو للعيون الرمادي:

العيون الرمادي بيناسبها تقريبا كل الالوان  لكن افضل الالوان اللي بتظهر جمال لون العيون الرمادي وبتنورها هي الفضي, والازرق, والاصفر, والاسود, كمان رسمة الايشادو السموكي بيليق اوي على العيون الرمادي وبيظهر لونها اكتر.

 الايشادو للعيون الرمادي
الايشادو للعيون الرمادي