طريقة رسم الايشادو بالخطوات..وازاي تختاري اللي يناسبك؟

بقلمريهام محمود فيمكياج visibility35228

الايشادو من الحاجات المهمة اوي في المكياج لانه بيبرز جمال العيون لكن في بنات كتير عندهم مشكلة انهم مش بيعرفوا طريقة رسم الايشادو على العين او طريقة دمج الالوان مع بعض يعني حتى لو في بعض البنات مش بيستخدموا الايشادو على طول بس كلنا منقدرش نستغنى عنه  لو عندنا مناسبة وحابين نعمل مكياج كامل لنفسنا مينفعش من غير الايشادو هيبقى مكياجنا ناقص كتير اوي ومش هيظهر, عشان كده احنا النهاردة جيبنا لكل بنات حوا اللي مش بيعرفوا يرسمو الايشادو طريقة رسم الايشادو بالخطوات, وازاي تدمجي الالوان مع بعض.

تعالوا نعرف الاول الحاجات اللي محتاجينها:

1- كريم مرطب او كريم عين.

2- برايمر.

3- الايشادو.

4- فرش مكياج العين.

5- كحل.

6- ايلاينر.

7- مسكرة.

خطوات رسم الايشادو
خطوات رسم الايشادو

نبدأ دلوقتي نعرف مع بعض خطوة خطوة طريقة رسم الايشادو:

1- الخطوة الاولى:

اول خطوة دي مهمة جدا لان الخطوة دي هتخلي المكياج يثبت معانا فترة اطول وهي تجهيز العين قبل المكياج, هنضف المنطقة اللي حوالين العين كويس ونحط الكريم المرطب او كريم العين وندلكه كويس, وبعدين هتحطي الكونسيلر بالفرشة  لو عندك هالات سودا على الجفن وحوالين منطقة العين ويكون الكونسيلر نفس درجة لون البشرة, وبعدين هنحط بودرة شفافة, ومع كل خطوة معاها شكل الفرشة اللي مستخدمة للخطوة دي وهتطلعلك احسن نتيجة.

تحضير العين لرسم الايشادو
تحضير العين لرسم الايشادو

2- الخطوة التانية:

هنبدأ نحط اللون الفاتح من الايشادو على الجفن المتحرك كله ونفرده بالتساوي كويس على الجفن كله بالفرشة من اول الزاوية الداخلية للعين لحد الزاوية الخارجية للعين, ولو عايزة شكل العين يبقى محدد اوي او منحوت استخدمي لون ايشادو غامق عشان تعملي كونتور للعين, ولو عايزة العين تبقى بارزة استخدمي لون ايشادو فاتح.

رسم الايشادو الفاتح على الجفن
رسم الايشادو الفاتح على الجفن

3- الخطوة التالتة:

عند منطقة التنية بتاعة الجفن المتحرك هنحط لون ايشادو الدرجة المتوسطة تبدأي تحطيه من الزاية الخارجية للعين لحد نص الجفن اعملي حرف V بالرسمة وافرديه  وامزجية كويس بالفرشة مع اللون الاول اللي احنا حطناه عشان يبقى شكله ناعم وميبقاش الايشادو خطوط منفصلة, ولو عايزة تظهري عضمة الحاجب ممن نحط لها لون فاتح اوي وناعم او نحط هايلايتر عشان نظهرها ونبرز جمال العين.

رسم الايشادو بدرجة متوسطة
رسم الايشادو بدرجة متوسطة

4- الخطوة الرابعة:

دلوقتي هنحط الايشادو الغامق على الزاوية الخارجية للعين وعلى خط الرموش من تحت نفرده بالفرشة تحت خط الرموش بحاجة بسيطة اوي عشان ندي العين شكل سموكي شوية, وممكن عشان نظهر العين اوسع نستخدم القلم الابيض او البيج نرسم خط جوه العين من تحت هيوسعها ويظهرها اوي.

عمل سموكي بالايشادو الغامق على الزاوية الخارجية للعين
عمل سموكي بالايشادو الغامق على الزاوية الخارجية للعين

5- الخطوة الخامسة:

دلوقتي هنمزج الالوان بالفرشة كويس مع بعضها عشان نملى اي فراغات او نداري اي خطوط في الرسمة و ممكن نحط طبقة من لون بدرجة متوسطة بين الفاتح و الغامق او لون لامع فى نص الجفن.

دمج الوان الايشادو على الجفن ورسم الايلاينر
دمج الوان الايشادو على الجفن ورسم الايلاينر

6- الخطوة السادسة:

اخر خطوة معانا اللي هتكمل المكياج هي رسمة الايلاينر, وبعدين الماسكارا حطي طبقتين او تلاتة من االماسكارا حسب ما رموشك تكون محتاجة او لو هتحطي رموش صناعية عشان تزودي كثافة وطول الرموش, ودي هتكون النتيجة النهائية.

النتيجة النهائية
النتيجة النهائية

وده فيديو بيوضح اكتر الخطوات اللي قولناها:

بكده نكون خلصنا طريقة رسم ايشادو بطريقة سهلة وبسيطة للمبتدئين, وبالنسبة لرسم الايشادو على الجفن اللي تحت مش شرط تنفذوها يعني هي مش خطوة اساسية بس هي للي حابب يعملها احنا بنقولكم الخطوات كلها وانتوا اختاروا اللي يناسبكم واللي تحبوه اكتر.

بعد ما عرفنا خطوات رسم الايشادو تعالوا نعرف مع بعض ازاي نختار ونمزج الالوان مع بعض:

اول حاجة في اختيار الالوان لازم نعرف تلات اساسيات للاختيار.

1- دايما نختار لون محايد او قريب من لون البشرة.

2- نمزج دايما بين لون بيلمع ولون مات او مطفي عشان يبقى في توازن في الالوان لانك لو استخدمتي لون بيلمع بس هيبقى اوفر اوي على العين ولو استخدمنا المات بس هيبقى المكياج  مافيهوش حياة ومطفي اوي عشان كده انسب حاجة نمزج بين لون مات ولون بيلمع.

3- لو هنستخدم تلات الوان للايشادو نختارهم لون فاتح ولون متوسط ولون غامق ونمزج بينهم.

ازاي بقى نمزج الالوان مع بعض؟ تعالوا نعرف:

1- لو مستخدمة اللون الاساسي للايشادو اللي هو اول لون بنحطه وبنفرده على الجفن كله لون بني يبقى افضل الوان تندمج معاه هي البيج والدهبي والبرتقاني والبرونزي.

2- لو اللون الاساسي للايشادو الرمادي يبقى تدمجيه مع الفضي والاسود والرصاصي والوردي.

3- لو اللون الاساسي كحلي هندمجه مع الازرق والسماوي والكحلي الفاتح والوردي.

4- لو اللون الاساسي من درجات الاخضر يبقى انسب الالوان معاه هي الدهبي والبرتقاني والبني والاصفر.

5- لو اللون الاساسي بنفسجي ادمجي معاه درجات اللون الروز.

– بالنسبة لالوان الايشادو اللي تمشي مع كل بشرة تعالوا نعرفها مع بعض:

البشرة البيضا: انسب الالوان ليها هي الالوان الباستيل الطبيعية زي الوردي, والروز, والازرق السماوي, والاخضر الفاتح .

ايشادو للبشرة البيضا
ايشادو للبشرة البيضا

البشرة القمحية والخمرية: ابعدي عن الالوان الباردة والالوان الوردي الفاتح, انسب الوان ايشادو ليكي هي الالوان المعدنية زي الفضي والدهبي.

ايشادو للبشرة القمحية والخمرية
ايشادو للبشرة القمحية والخمرية

البشرة السمرا: انسب الالوان ليها الروز الغامق, والزيتي, والنيلي, والفضي الغامق, والبرونزي الغامق المايل للبني, ودرجات الازرق البترولي, والاحمر الغامق, الالوان الغامقة الدافية بشكل عام بتطلع حلوة اوي للبشرة السمرا.

ايشادو للبشرة السمرا
ايشادو للبشرة السمرا

البشرة السمرا الداكنة: انسب الوان ليها هي البني الشفاف, والبيج الصدفي, واشقر برتقاني, وازرق بترولي.

ايشادو للبشرة السمرا الداكنة
ايشادو للبشرة السمرا الداكنة

– بعد ما عرفنا كل الخطوات واختيار الالوان هنقولكم سريعا الفرق ما بين انواع الايشادو:

في تلات انواع من الايشادو المضغوط والكريمي والسايب والفرق مش كبير بينهم.

1- الايشادو المضغوط: هو يعتبر النوع الافضل والاكتر استخدام, نازل منه اللي بيلمع والمات والجليتر والنوع ده مناسب لكل انواع البشرة ومناسب للبشرة الدهنية بشكل خاص, وممكن تحطيه بالفرشة او بالسفنجة او بصباعك.

الايشادو المضغوط
الايشادو المضغوط

2- الايشادو الكريمي: مناسب لكل انواع البشرة, والوانه بتكون اقوى من الايشادو المضغوط لكن عيبه انه صعب الدمج شوية وممكن يتكتل, وبينشف بسرعة في العلبة.

الايشادو الكريمي
الايشادو الكريمي

3- الايشادو السايب او البودرة: مش بيختلف كتير عن المضغوط بس دايما النوع ده بيكون جليتر او بيلمع عشان كده مش دايما بيكون الاختيار الافضل لانه فيه لمعة, وافضل طريقة يتحط بيها بالفرشة.

الايشاد البودرة
الايشاد البودرة