اتعلمي معانا طريقة حنة الاظافر بالخطوات
حنة الاظافر ظهرت من فترة طويلة جدا بس انتشرت اوي الفترة الاخيرة وبقى في كتير من البنات دلوقتي بيفضلوها بدل المانيكير حتى في مشاهير كتير بقوا يستخدموها لكذا سبب اولا انها بتثبت فترة طويلة مش زي المانيكير بيتقشر وبيبوظ بسرعة, ساعات في مننا بيكون عندهم مشاكل في ضوافرهم ومش بيقدروا يحطوا مانيكير لانه بيزود المشكلة وبيسبب تقصف الضوافر وبيضعفها فالبديل له بيكون هو الحنة لانها آمنة على الضوافر جدا ومش بتسبب اي مشاكل ومش بس كده كمان بتعالج مشاكل الاظافر وبتمنع تكون فطريات الاظافر.
وحنة الاظافر نازل منها دلوقتي مجموعة الوان حلوة زي البني الفاتح والغامق, والاخضر, والبرتقاني وهنلاقي حنة الاظافر الجاهزة عند العطار, الجاهزة بتجيبيها وبتتحط على الاظافر على طول من غير الخطوات اللي هنقولها, اما بالنسبة للون الاسود استخدمي معاها حنة الشعر السودا العادية واعمليها بالخطوات اللي هنقولها.
تعالوا نعرف المكونات اللي محتاجينها لعمل حنة الاظافر:
1- معلقتين حنة اي لون هتختاريه.
2- معلقة صغيرة عصير ليمون.
3- مية دافية.
4- خلة سنان او فرشة مانيكير.
5- فازلين.
دلوقتي بقى تعالوا نشوف بالخطوات طريقة حنة الاظافر:
1- الخطوة الاولى:
اول حاجة هنحضر الحنة هنخلط الحنة مع عصير الليمون والمية واحدة واحدة لحد ما تبقى عندنا عجينة قوامها متوسط يعني مش سايلة اوي ولا جامدة اوي, غطي الحنة وسيبيها من 4 ل 6 ساعات لحد ما تتخمر كويس.
ممكن تسيبيها تتخمر, وممكن بعد ما تعجنيها تستخدميها على طول لو مستعجلة وعايزة تعمليها بسرعة.
2- الخطوة التانية:
في خلال الوقت اللي احنا سايبين فيه الحنة تتخمر نحضر ضوافرنا للحنة ننضفها ونبردها ولو محتاجة تتقص زي ما بنحضر ضوافرنا للمانيكير بالظبط بنفس الخطوات اللي قولنا عليها قبل كده للمانيكير.
3- الخطوة التالتة:
تالت خطوة معانا هنحط فازلين على الجلد حوالين الضوافر عشان ميتلطخش بالحنة.
4- الخطوة الرابعة:
دلوقتي بقى هنبدأ نحط الحنة على الضوافر هنجيب خلة السنان وندهن الضوافر بالحنة ونحط عليها طبقة حنة سميكة, وممكن نستخدم فرشة مانيكير او فرشة روج, او فرشة سنان قديمة, وبعدين هنسيب الحنة لحد ما تنشف تماما وكل ما سيبناها كل ما اللون بقى اغمق.
5- الخطوة الخامسة:
ودي اخر خطوة بعد ما الحنة تنشف خالص هنفركها بالراحة من على الضوافر,و ممكن تحطى على ضوافرك عصير ليمون للمحافظة على اللون ومتستخدميش صابون على ايدك لمدة 24 ساعة عشان تدي فرصة للون يثبت كويس وبعدين استخدمي الصابون عادي, ممكن نعمل عليها رسومات بالحنة لو بتعرفي ترسمي يعني ممكن تعملي اي رسومات بسيطة مش لازم حاجات صعبة.