اعملي معانا المانيكير الاومبري Ombre بالخطوات

ريهام محمود
ريهام محمود
في
أظافر
6491

كل يوم بيظهر استايلات وابتكارات جديدة للمانيكير ومن الستايلات الحلوة اوي والمختلفة جدا اللي ظاهرة بقالها فترة استايل المانيكير الاومبري وهو على نفس طريقة الشفايف الامبري والشعر الاومبري اللي احنا اتكلمنا عليهم قبل كده واستايل الاومبري للضوافر هو تلوين الضوافر درجات والتدريج بيكون ياما بدرجة او درجتين او تلات درجات, والنهاردة هنعلم كل بنات حوا بالخطوات طريقة المانيكير الاومبري.

تعالوا نعرف الحاجات اللي محتاجينها:

1- اللون الاساسي للمانيكير.

2- الوان التدريج لون او اتنين او تلات الوان.

3- مقوي اظافر.

4- سفنجة.

5- اسيتون.

ياللا بقى نشوف مع بعض خطوة خطوة طريقة المانيكير الاومبري:

1- الخطوة الاولى:

اول خطوة هننضف الضوافر ونقصها ونبردها ونشيل اي مانيكير قديم ونجهزها للمانيكير زي ما قولنالكم قبل كده طريقة المانيكير ازاي بالخطوات.

تجهيز الضوافر للمانيكير
تجهيز الضوافر للمانيكير

2- الخطوة التانية:

تاني خطوة هنحط مقوي الاظافر عشان نحمي ضوافرنا من المانيكير, نحط منه طبقة خفيفة.

مقوي الاظافر
مقوي الاظافر

3- الخطوة التالتة:

هنحط اللون الاساسي للمانيكير بتاعنا ودايما اللون الاساسي يكون ياما لون ابيض او بيج او اللون الفاتح من الوان التدريج اللي انتي هتستخدميها عشان التدريج يبان عليه ونسيبه ينشف قبل ما نعمل الخطوة التانية.

اللون الاساسي للمانيكير
اللون الاساسي للمانيكير

4- الخطوة الرابعة:

هنستخدم لونين التدريج الاغمق من اللون الاساسي وبيتحط بطريقتين ياما يتحط اللونين على ورقة او او اي سطح بلاستيك ونمزجهم مع بعض بشكل عشوائي وبعدين ناخدهم على السفنجة او تحطي اللونين على السفنجة على طول.

الوان التدريج
الوان التدريج

5- الخطوة الخامسة:

هنبدأ في الخطوة دي نطبق السفنجة على ضوافرنا ودايما نخلي تدريج الالوان الغامق على اطراف الضوافر وبعدين الفاتح في الافتح, وفي بعض الستايلات بيكون الفاتح الاول وبعدين الغامق فالاغمق, وممكن نعمل اكتر من طبقة يعني تسيبي الضوفر ينشف وبعدين تحطي مانيكير تاني على السفنجة وتعملي طبقة تانية على الضوافر, والتدريج ليه كذا طريقة ممكن نعمل التدريج بالطول يعني بدل ما نحط السفنجة بالعرض على الضوافر نحطها بالطول تدريج الالوان هيبقى بالطول, او بميل نحط السفنجة بميل على الضوافر, وممكن يتعمل فوق التدريج رسومات, وممكن يتعمل الاومبري ان كل ضوفر يكون بلون بدرجات الالوان يعني ضوفر بلون فاتح واللي جنبه بلون اغمق واللي جنبه اغمق وهكذا يكون كل ضوفر اغمق من اللي قبله, وبعدين في الاخر هنحط طبقة مقوي اظافر.

تطبيق الوان التدريج على الضوافر
تطبيق الوان التدريج على الضوافر

6- الخطوة السادسة:

اخر خطوة هننضف الجلد اللي حوالين الضوافر من تلطيخ المانيكير هنجيب عود قطن من اللي بنضف بيه الودان ونحطه في الاسيتون وننضف حوالين الضوافر كويس.

تنضيف حوالين الضوافر
تنضيف حوالين الضوافر

ده فيديو كمان بيوضح نفس الطريقة اللي قولناها خطوة بخطوة

كده نكون خلصنا الخطوات بتاعنا هنوريكم مجموعة استايلات مختلفة من المانيكير الاومبري تقدروا تختارو منها وتنفذوه بنفس الطريقة اللي شرحناها:

مقالات متعلقه

بمكون واحد من مطبخك هيساعدك على تطويل وتبييض ضوافرك

بمكون واحد من مطبخك هيساعدك على تطويل وتبييض ضوافرك

افضل 8 فيتامينات وعناصر مغذية لاظافر صحية وقوية

افضل 8 فيتامينات وعناصر مغذية لاظافر صحية وقوية

الوان المانيكير التريندي لموسم الشتا السنة دي

الوان المانيكير التريندي لموسم الشتا السنة دي