اعملي بنفسك واقي الشمس Sunblock بمكونات طبيعية !
كلنا تقريبا منقدرش نستغنى عن واقي الشمس Sunblock سواء في الصيف او في الشتا بس طبعا بنكون محتاجينه في الصيف اكتر لان درجات الحرارة بتكون عالية وبنروح على البحر ونقعد في الشمس ومحتاجين اننا نحمي بشرتنا من ضرر اشعة الشمس ولكن بتكون المشكلة ان اغلب كريمات الوقاية من الشمس اللي موجودة في السوق بيكون فيها مواد كيميائية بتضر بشرتنا ده غير ان اسعارها غالية مش كلنا نقدر نتحملها, عشان كده احنا النهاردة جيبنا لكل بنات حوا الحلوين طريقة كريم واقي من الشمس تقدري تعمليه بنفسك في البيت بمكونات طبيعية سهلة وبسيطة هيحميكي من الشمس وهيكون آمن على بشرتك في نفس الوقت.
قبل ما نشوف الوصفات هنقولكوا شوية نصايح عن الطريقة الصحيحة لاستخدام واقي الشمس:
1- حطي طبقة سميكة من الواقي عشان يقعد معاكي فترة اطول, وخليه دايما معاكي في الشنطة عشان طول ما انتي بره البيت لازم تحطي منه كل ساعة ونص لان مفعوله بيروح بعد الوقت ده ولازم تجددية على بشرتك وكل مرة قبل ما تحطية اغسلي وشك الاول وبعدين حطي الواقي.
2- لما تيجي تحطي الواقي متحطيهوش على ايدك وتدهنية وبعدين تطبقيه على بشرتك لان الطريقة دي غلط حطيه على بشرتك وادهنيه على البشرة على طول لحد ما يتشرب كويس على البشرة.
3- حطي الواقي قبل الكريم المرطب او كريم النهار عشان الواقي يعمل طبقة عازلة على بشرتك بشكل مباشر من الشمس وبعدين حطي بعده الكريم المرطب وبعدين طبقي المكياج بتاعك لو هتحطي مكياج.
4- متهملوش ابدا واقي الشمس حتى لو رايحة مشوار قريب مثلا وهتقولي مش مستاهل احط واقي او بشرتي مش هتتعرض للشمس فترة طويلة لا لازم تحطي الواقي حتى لو مشوار جنب بيتك لان اي ضوء او اشعة بسيطة هتضر البشرةز
5- حطي الواقي قبل ما تخرجي من البيت بنص ساعة تقريبا مش قبل ما تخرجي على طول عشان بشرتك تاخد وقتها انها تشرب الواقي ومفعوله يشتغل يعني مينفعش تحطيه بعد ما تخرجي.
دلوقتي ياللا نشوف وصفات لعمل كريم واقي الشمس:
1- الوصفة الاولى:
المكونات:
– معلقة كبيرة شمع عسل او صابونة شمع العسل “وهنلاقيها في الصيدلية او عند العطار”.
– 2 معلقة كبيرة اكسيد الزنك”موجود في الصيدلية باكتر من نسبة تركيز 5% هيديكي نسبة حماية SPF من 2-5, واللي بنسبة تركيز 10% هيديكي نسبة حماية من 6-11, وبنسبة 15% هيديكي نسبة حماية من 12-19, وبنسبة 20% هيديكي نسبة حماية 20 وطبعا ده افضل حماية”.
– 1/3 كوب زيت بذور العنب”موجود عند العطار”.
– كبسولة فيتامين E “من الصيدلية”.
– معلقة كبيرة جل صبار”من الصيدلية- او لو انتي زارعة صبار في البيت ممكن تاخدي منه هيكون احسن طبعا”.
– 30 نقطة من اي زيت عطري “زيت الخزامي- زيت الياسمين – زيت الورد – زيت اللافندر – زيت البرتقان”
– نص كوباية مية مغلية.
طريقة التحضير:
هنكسر شمع العسل ونضيف عليه زيت بذور العنب ونسيحهم في حمام مية على النار يعني هنحط مية على النار ونحط جواها طبق فيه الشمع والزيت ونقلبهم مع بعض لحد ما يسيحوا كويس بعد ده هترفعيه من على النار وهتضيفي عليهم اكسيد الزنك وكبسولة الفيتامين, بعد كده هنجيب نص كوباية المية المغلية ونضيف عليها جل الصبار ونقلبهم على النار مع بعض لمدة دقايق وبعدين نضيفه لخليط شمع العسل والزيت واكسيد الزنك اللي احنا حضرناه, اخر حاجة هنضيف الزيت العطري عشان ندي ريحة حلوة للكريم, بس لو بشرتك حساسة من الزيوت العطرية ممكن تستغني عنه ومتحطيهوش, حطي الخليط في اي علبة عندك واحفظيه في التلاجة وحطي منه قبل ما تكوني خارجة زي اي كريم واقي بالطريقة اللي احنا قولنا عليها.
2- الوصفة التانية:
المكونات:
– 100 جرام زبدة شيا.
– 100 جرام زيت جوز الهند.
– 2 معلقة كبيرة اكسيد الزنك.
– معلقة كبيرة شمع العسل.
طريقة التحضير:
هنسيح الزبدة وشمع العسل وزيت جوز الهند مع بعض في حمام مية وبعدين هنرفعهم من على النار وهنضيف عليهم باقي المكونات وتخلطيهم كويس مع بعض وممكن تستخدمي المضرب الكهربا عشان يتخلطو كويس هيبقى عندك خليط زي الكريم سايل شوية هتسيبيه لحد ما يبرد وهتلاقي سمكه تخن شوية بعد ما يبرد وبقى زي كريم البشرة حطيه في اي علبة عندك واحفظيه في التلاجة.
3- الوصفة التالتة:
المكونات:
– نص كوباية زيت لوز.
– 2 معلقة كبيرة زبدة الشيا.
– ربع كوباية زيت جوز هند.
– 2 معلقة كبيرة اكسيد الزنك.
– 10 نقط زيت بذور الجزر.
– 20 نقطة اي نوع زيت عطري.
طريقة التحضير:
هنحط كل المكونات ماعدا اكسيد الزنك مع بعض على النار في حمام مية ونقلبهم لحد ما يسيحوا كويس وبعدين نرفعهم من على النار ونضيف لهم اكسيد الزنك ونقلب كويس وبعدين هنحط الخليط في علبة ونسيبة لما يبرد وبعدين نحطه في التلاجة, وممكن يقعد معاكي في التلاجة لمدة 6 شهور مش هيحصله حاجة.
التلات وصفات دول هنلاحظ انهم قريبين من بعض في المكونات وبعض المكونات بس متغيرة يعني قدامنا بدائل لو في حاجة مش موجودة ممكن نستخدم وصفة مكوناتها كلنا موجودة عندنا او ممكن نلاقيها, بس المكون الاساسي فيهم كلهم هو اكسيد الزنك مهم لانه هو اللي بيحجب اشعة الشمس وبيحمي بشرتنا من ضرر الاشعة فوق البنفسجية.
4- الوصفة الرابعة:
المكونات:
– 3 معالق كبيرة زبدة كاكاو.
– 3 معالق كبيرة زيت جوز الهند.
– 3 معالق كبيرة زيت زيتون.
– 3 معالق كبيرة زيت لوز حلو.
– 3 معالق كبيرة زيت سمسم.
– 500 ملل شاي احمر بارد مركز.
طريقة التحضير:
سخني زبدة الكاكاو وزيت جوز الهند مع بعض على نار هادية وتقلبيهم لحد ما يسيحوا وبعدين تضيفي عليهم زيت الزيتون وزيت السمسم وزيت اللوز وتخلطيهم كويس مع بعض وبعدين تضيفي الشاي المركز البارد يعني تكوني محضرة الشاي من قبلها وسيبيه يبرد خالص وتضيفيه على الخليط وتحطيهم في ازازة وترجي الخليط كله مع بعضه كويس وتسيبيه لحد ما يبرد خالص وبعدين تحطيه في التلاجة, ادهني بيه بشرتك قبل ما تخرجي في الشمس ورجي الازازة كل مرة قبل كل استخدام.
5- الوصفة الخامسة:
الوصفة دي بتتعمل قبل ما تخرجي للشمس بتحمي البشرة من الشمس يعني تعتبر واقي بس بيتعمل قبل ما تكوني خارجة وتغسليه زي طريقة اي ماسك للبشرة.
المكونات:
– 20 ملليجرام لبن.
– 10 ملليجرام عصير ليمون.
– 25 جرام عشبة زولا “موجودة عند العطار”
– 10 جرام دقيق.
– 5 جرام كركم البشرة “موجود عند العطار”
طريقة التحضير:
هنخلط الكركم والدقيق وعشبة زولا ونقلبهم مع بعض ونضيف عليهم اللبن وعصير الليمون ونخلطهم كويس مع بعض هيبقى عندنا خليط شبة الكريم ادهنية على بشرتك وسيبيه نص ساعة وبعدين اغسليه بمية دافية وادهني بشرتك بقطنة فيها مية ورد, الوصفة دي تعمليها قبل ما تخرجي هتحمي بشرتك من الشمس.
