ازاي نداري الهالات السودا بالمكياج خطوة بخطوة ؟

بقلمريهام محمود فيمكياج visibility23824

في بنات كتير بيعانوا من مشكلة الهالات السودا ولما بيحطوا المكياج بتكون باينة تحت عيونهم الهالات وبتضايقهم وده بسبب اننا مش بنعمل الطريقة الصح عشان نداري الهالات السودا عشان كده احنا النهاردة جيبنالكم طريقة اخفاء الهالات السودا بالمكياج خطوة بخطوة.

اخفاء الهالات السودا بالمكياج
اخفاء الهالات السودا بالمكياج

ياللا نعرف مع بعض بالخطوات ازاي نداري الهالات السودا بالمكياج ؟

1- الخطوة الاولى:

اول خطوة هي ترطيب البشرة تحت العين عشان الكريم المرطب هيخلي المكياج بتاعك يتفرد على البشرة كويس وميتكتلش ويثبت لفترة طويلة.

2- الخطوة التانية:

هنحط البرايمر تحت منطقة العين والبرايمر بيسهل فرد ودمج كريم الاساس على البشرة وبيحمي بشرتك يعني بيكون زي طبقة عازلة بين المكياج وبشرتك.

3- الخطوة التالتة:

الخطوة التالتة اللي هنعملها هي الكونسيلر والخطوة دي مهمة جدا جدا لانه هي بيعتمد عليها نجاح المكياج واخفاء الهالات بشكل صح وناجح اختاري لون الكونسيلر اللي يمشي مع لون بشرتك واللون يكون افتح بدرجة او درجتين عن لون بشرتك, واتكلمنا قبل كده عن ألوان الكونسيلر وموضح تحت صورة خريطة ألوان الكونسيلر وإن اللون المناسب عشان نخفي الهالات اللي لونها بيبقي اسود أو ازرق إننا نختار كونسيلر لونه روز او بينك أو خوخي برتقالي وتأكدي انه هيخفي الهالات لان في بنات كتير بيقعوا في غلطة بيختاروا لون كونسيلر فاتح وبيفتكروا ان كل ما كان اللون افتح كل ما دارى الهالات لكن ده غلط جدا لو انتي بشرتك بيضا او فاتحة انسب لون كونسيلر عشان الهالات هو الخوخي المتوسط, ولو بشرتك متوسطة او سمرا يبقى انسب لون كونسيلر هو الخوخي الغامق او اللون البرتقاني, ولما نيجي نحط الكونسيلر نحط طبقة خفيفة منكترش عشان ميتكتلش تحت العين ويعمل خطوط.

خريطة ألوان الكونسيلر
خريطة ألوان الكونسيلر

 4- الخطوة الرابعة:

بعد الكونسيلر هنيجي للخطوة الرابعة وهي كريم الاساس هنستخدم بردو لون كريم الاساس القريب من لون بشرتنا ونحط منه طبقة خفيفة وندمجة كويس مع الكونسيلر بالسفنجة.

5- الخطوة الخامسة:

اخر خطوة هنحط البودرة هي اللمسة الاخيرة للمكياج بتاعنا عشان نثبت بيها المكياج.

6- الخطوة السادسة:

الخطوة دي اختيارية يعني ممكن تعمليها او لا وهي الهايلايت عشان تدي اضاءة تحت العين اختاري هايلايت يكون افتح من لون البشرة بدرجة واحدة وافضل نوع هايلايت هو القلم لانك بتقدري تتحكمي فيه اكتر وفي الكمية وانتي بتحطيها, وممكن تستخدمي قلم الهايلايت تعملي بيه اضاءة على منطقة فوق عضمة الخد حطي بس نقطتين وارسمي بيهم مثلث مقلوب في المنطقة اللي تحت العين لحد عضمة فوق الخد وادمجيه كويس على بشرتك ده هيزود الاضاءة تحت العين وهيخفي الهالات, وعشان تزودي الاضاءة اكتر كمان وتوسعي العين ممكن تحطي ايشادو لامع على الجزء الداخلي للجفن باللون العاجي او البيج هيضيء العين اوي وهيظهرها اوسع.

وده فيديو هيوضحلكم الخطوات اللي قولناها خطوة خطوة: