ايه هي أشكال الوشوش المختلفة؟ وإزاي أعرف شكل وشي؟

هل حد قالك قبل كده إن شكل قصة الشعر ديه لايقة قوي علي شكل وشك؟ أو اختيارك للنضارة أو رسمة حواجبك مثلا؟ ممكن منركزش أو وقتها في الكلام ده بس الحقيقة إن فعلا فيه أشكال مختلفة من الوشوش وكل شكل وش بيليق عليه أشكال مختلفة من تسريحات الشعر أو لفات الحجاب أو طريقة المكياج.. تعالوا نتعرف مع بعض النهرده ايه هي أشكال الوشوش المختلفة وإزاي أعرف شكل وشي عشان أعرف اختار اللي يناسبني.

1 – الوش المستطيل:

الوش المستطيل اللي بيكون طوله أكتر من عرضه, كمان هنلاحظ إن عرض الفك والقورة ومنطقة الخدود تقريبا واحد.. 

2 – الوش البيضاوي:

الوش البيضاوي اللي هو عبارة عن شكل بيضة مقلوبة.. طولة أكتر من عرضه بس بحاجة بسيطة والقورة عريضة بس برضه بنسبة بسيطة والفك والدقن بيبقوا مدورين..

المميز في الوش البيضاوي انه أكتر أشكال الوجوه تناسقا واللي تقريبا أي حاجة بتليق عليه :) من أكتر الوشوش جمالا وحظا وهنلاقي إن في مكياج الوشوش التانية دايما بنحاول نوصل بالوش لشكل الوش البيضاوي.

3 – الوش المدور:

الوش المدور بيتميز بالخدود المليانه وحدوده ناعمة وطوله بيبقي اد عرضه تقريبا.. القورة والدقن بيبقي عرضهم اقل عرض الخدود. كمان الدقن بتبقي مدورة ومفيش فيها الحدة اللي بتبقي موجودة في باقي الوشوش.

4 – الوش المربع:

الوش المربع بيبقي طوله اد عرضه تقريبا وهو الوش اللي فيه عضم الفك قوي وبارز مع وجود القورة العريضة … بيتشارك مع الوش المستطيل في إن عرض القورة والخدود والفك تقريبا زي بعض.

احلي حاجة في الوش المربع إن بيتميز بشكل قوي ثاقب والبنات اللي بتتميز بالوش المربع شكلهم بيبقي مميز جدا وضحكتهم كمان مميزة زي البنات أصحاب الوش المستطيل.

5- الوش الماسي:

الوش الماسي هو أشكال الوشوش النادرة, الوش العريض من منطقة الخدود بس ضيق عند القورة وعند الدقن, كأنه علي شكل ماسة.. كمان طوله غالبا بيبقي أكتر من عرضه.

احلي حاجة في الوش الماسي, انه لما تكون قورتك صغيرة ودقنك رفيعة تفتكري ايه أكتر حاجة هتبقي بارزة في الوش؟ العيون.. صح كده :) عشان كده أصحاب الوش الماسي مفروض يهتموا بمكياج عيونهم لانها أكتر حاجة بتاخد النظر لما أي حد بيشوفهم.

6- الوش اللي علي شكل قلب:

الوش اللي علي شكل قلب شبه جدا الوش المدور مع اختلاف إن الدقن بتبقي اصغر وبارزة عن باقي الوش عشان كده بنقول انه شكل قلب.. وممكن برده نبصله انه علي شكل مثلث مقلوب قاعدته عند القورة وراسه عند الدقن..وطوله بيبقي أكتر من عرضه حاجة بسيطة.

احلي حاجة في الوش اللي علي شكل قلب إنه عشان الدقن الرفيعة البارزة بيدي تحديد أكتر  وتركيز للشفايف وغير إن شكل القلب بيدي شكل مميز وبراءة مش بنلاقيها في باقي الوشوش.