اعملي مكياج ناعم وهادي بالخطوات عشان يطلع تحفة فى الصور
في بنات كتير مش بيحبوا المكياج التقيل او الالوان الغامقة في المكياج وبيفضلوا المكياج الهادي عشان كده احنا النهاردة جيبنالكم طريقة مكياج ناعم وهادي هيطلعك بلوك طبيعي جدا.
ياللا نعمل مع بعض خطوة بخطوة مكياج ناعم وهادي:
1- اول حاجة هنعملها هنحط كريم الاساس ونمزجة كويس على البشرة.
2- تاني خطوة هنحط الكونسيلر بتاعنا تحت العين عشان نغطي اي هالات سودا والكونسيلر مش بس لتحت العين الكونسيلر ممكن نداري بيه اي عيوب في البشرة يعني ممكن نحطه حوالين فتحات الانف لو حابين نخليها تظهر بشكل اصغر ونحطة على خطوط الضحك في الوش اللي بتكون في القورة او حوالين الفم ونمزجه كويس على البشرة والافضل انك تفرديه على البشرة بالفرشة عشان ده هيديكي نتيجة احسن بكتير.
3- تالت خطوة هي البودرة الشفافة والبودرة دي بتدي اضاءة للوش حلوة اوي هنحطها في منطقة وسط القورة ووسط الانف والدقن هتنور الخطوة دي هتنور وشك اوي وتبرز الملامح.
4- هنيجي بعد كده لرسم الحواجب لازم نهتم برسمتهم جدا عشان بتكمل مكياج العيون وبتظهر جمالهم لما ترسمي الحواجب ابعدي عن الرسمة اللي تبقى حادة واوفر اوي املي الحواجب بشكل طبيعي بقلم الحواجب ابدأي الرسمة من الجزء السفلي للحاجب وابدأي امليه بالقلم وانتي ماشية بيه على الحاجب لحد الاخر عشان تبقى الرسمة مظبوطة وميبقاش في جزء في الحاجب مرسوم اكتر من جزء ويطلع شكله طبيعي.
5- هنرسم دلوقتي الايشادو وهنستخدم تلات درجات لون متوسط او طبيعي يكون اقرب لون للون بشرتك ولون اغمق منه وهايلايتر الطريقة دي هتوسع العين جدا هنبدأ نحط اللون الطبيعي على الجفن اللي فوق كله ونفرده كويس.
وبعدين هنحط اللون الغامق عند التنية بتاعة الجفن.
والهايلايتر هنحطة عند زاوية العين الداخلية وعلى عضمة الحاجب, لو عايزة اللوك يكون اقوى شوية ممكن تحطي اللون الغامق عند الزاوية الخارجية للعين وتمزجية مع خط اللون الغامق اللي عملناه عند تنية الجفن, واهم حاجة تستخدمي الفرشة عشان تمزجي الالوان مع بعض كويس وتبقى متداخلة مع بعضها مش خطوط منفصلة.
6- دلوقتي نيجي للايلاينر هنحط الايلاينر بالفرشة خط رفيع جدا عند خط الرموش وكل ما كانت رسمة الايلاينر قريبة من خط الرموش كل ما كانت احسن وشكلها احلى.
7- هتحطي طبقة من الماسكارا على الرموش اللي فوق واللي تحت وتبدأي تمشي بالفرشة من جذور الرموش لفوق ولو عايزة تظهري الرموش اكتر ممكن تحطي طبقة ماسكارا تانية, ممكن تحطي رموش صناعية حسب رغبتك بس حطيها بعد الماسكارا عشان شكلهم هيطلع طبيعي اكتر حطي طبقة رقيقة من لاصق الرموش والصقي الرموش بتاعتك ابدأي الزقيهم من الزاوية الخارجية للعين واضغطي عليهم بالراحة بصوابعك عشان تلزق كويس, وممكن تسيبي لاصق الرموش ينشف شوية لمدة ثواني وبعدين تحطي الرموش.
8- عشان نبرز عضم الوش ونبرز جماله اكتر هنستخدم تلات حاجات الهايلايتر, والكونتور, واخر حاجة البلاشر, هنحط الهايلايتر عند منطقة اعلى الخدود والزاوية الداخلية للعين ووسط الانف وفوق الشفة اللي فوق في المنطقة اللي في النص بس, وهنحط الكونتور عند الفك وعلى الانف من الجنب وتحت عضمة الخد وعلى الجبهة من الجنبين عند منبت الشعر, اخر حاجة هي البلاشر هنستخدم لون فاتح طبيعي هنحطة على عضمة الخد ونمزج كل اللي احنا حطناه ده كويس مع بعضه بالفرشة عشان ميبقاش في خطوط في الوش.
9- نيجي لخطوة البرونز و هنستعمل فرشة عريضه و هنركز فى الجزء اللى تحت عضمه الخد و هندمج بالفرشة على شكل دواير.
10- نيجي لاخر لمسة في مكياجنا وهي الروج هنستخدم لون نيود عشان يطلع بشكل طبيعي هنحطة بالفرشة الخاصة بالروج وتضغطي بيها على الشفايف كويس عشان يثبت ويديكي تغطية كاملة للشفايف.
بكده نكون خلصنا كل الخطوات بتاعتنا لمكياج ناعم وهادي وطبيعي وده الشكل النهائي للمكياج.
