اتعرفي معانا على طرق تلوين الشعر اومبري

بقلمريهام محمود فيشعر visibility25657

احنا اتكلمنا قبل كده على طريقة تلوين الشفايف درجات او اومبري النهاردة هنتكلم عن تلوين الشعر اومبري “Ombre” او درجات الطريقة دي بتكون بتلوين الشعر بلونين او اكتر وطريقة الاومبري ظهرت بقالها فترة وبقى في بنات كتير بيعملوها ومشاهير كتير اعتمدوا استايل الاومبري, وتلوين الشعر اومبري ليه طرق واساليب كتير وتنفع لكل استايلات الشعر سواء القصير او الطويل او الكيرلي او الستريت يمشي مع اي شعر وبيدي شكل حلو اوي ومختلف, احنا النهاردة جمعنالكم استايلات الاومبري المختلفة للشعر وتقدري تختاري منها اللي يناسبك واللي تحبيه اكتر.

 تعالوا نعرف ازاي تعملي شعرك اومبري بنفسك في البيت:

1-اختيار اللون المناسب:

اول خطوة هنعملها هي اختيار اللون المناسب ودي تعتبر اهم خطوة لان لو اختارتي اللون غلط او مش لايق عليكي هيطلع مش حلو ومش هيديكي النتيجة المطلوبة لو كان لون شعرك الاصلي اسود او بني غامق يبقى انسب لشعرك تعملي بيه تدريجهي الالوان النحاسي, والاحمر, والبني الفاتح, ولو لون شعرك الاصلي اشقر او كستنائي يبقى اعملي الاومبري بالوان الاشقر بتدريجاتة او باللون العسلي.

2- الاستعداد للصبغة:

تاني خطوة هنستعد للصبغة قبل ما تعملي الاومبري لازم متكونيش غاسلة شعرك قبلها بيومين من تطبيق الصبغة على الشعر لان ده بيحمي فروة الراس من تأثير الصبغة لان الدهون اللي بتفرزها الفروة بتحميها من الصبغة.

3- تحضير الشعر قبل الصبغة:

دلوقتي هنيجي لمرحلة تحضير الشعر سرحي شعرك كويس وقسمية لاربع اجزاء.

4- تطبيق الصبغة:

جيبي ورق الومنيوم وقسمية ل15 قطعة وحطي حاجة على كتفك عشان تحمي هدومك من الصبغة قسمي كل جزء من الاربع اجزاء اللي انتي قسمتيهم ل3 اجزاء وابدأي اصبغي كل خصلة من الشعر واصبغي من تحت منطقة الودان وبعد ما تصبغي كل خصلة لفيها بورق الالومنيوم واصبغي باقي الخصل بنفس الطريقة ولفيها بالالومنيوم, لو مستخدمة لونين هتعملي بيهم التدريج اعملي باللون الاول جزء من الشعر وبعدين اعملي اللون التاني تحتيه من غير تحديد خطوط يعني بشكل عشوائي مش لازم تكون كل الخصل زي بعض بالظبط يعني خلي الالوان داخلة في بعضها بعد كده هتسيبيه على شعرك الوقت المحدد على علبة الصبغة وبعدين شيلي ورق الالومنيوم واغسلي شعرك بمية دافية نزلي منه كل الصبغة كويس وبعدين اغسليه بالشامبو والبلسم.

ولو هتعمليه عند الكوافير طبعا هيكون بنفس الخطوات وهو هيكون بروفيشنال اكتر طبعا وهيكون عارف الالوان اللي هتليق عليكي.

 دلوقتي ياللا نشوف مع بعض بالصور استايلات مختلفة لتلوين الشعر اومبري:

– استايلات تدريج الشعر بيكون الاعتماد واللعب فيها باللون اكتر بيكون ياما لون واحد افتح من لون الشعر الاصلي او بلونين او تلات الوان وفي استايلات فيها اكتر من لون مع بعض وبيدخل فيها الوان جريئة زي البنفسجي والبينك والاخضر والاحمر الناري والبرتقاني والازرق.

– اما بالنسبة لستايلات التدريج بيكون ياما على اطراف الشعر بس وده يمشي اوي للبنات اللي مش بيحبوا يلونوا شعرهم كله او بيحبوا الاستايلات البسيطة, وفي طريقة تانية ممكن يتعمل من نص الشعر, وفي طريقة تلوين خصل الشعر من قدام بدوران الوش كله الطريقة دي بتنور الوش اوي, او ممكن يتعمل بطريقة الهايلايت والصور هتوضحلكم الطرق اكتر.

الاستايلات دي بكل درجات اللون البني الغامق والفاتح والدهبي والنحاسي ما بين التدريج بلون واحد او بلونين او تلات الوان.

ودي مجموعة استايلات اومبري بدرجات الاشقرما بين الفاتح والغامق وما بين الاشقر والاحمر او الاشقر والبني.

درجات الاومبري باللون الاحمر وتدريج بالاحمرمع البني.

طبعا البنات اللي شعرهم قصير اكيد ليهم نصيب من الاومبري لان زي ما قولنا هو يمشي مع كل الاستايلات ودي مجموعة لتلوين الشعر اومبري للشعر القصير.

الستايل ده بقى للبنات اللي بتحب الستايلات الجريئة التدريج معمول ما بين لونين وتلات الوان مع بعض وبالوان جريئة زي البينك والبنفسجي والبرتقاني والازرق والاحمر والاخضر والرمادي.