11 سر هيخلوا شعرك يطول بسرعة !

كل بنت بتحلم بشعر طويل وبنقعد ندور على وصفات عشان نخلي شعرنا يطول بس المشكلة بتكون انه بياخد وقت على ما يطول ونشوف نتايج ملحوظة لان الشعر بيكون تالف ومش صحي وده بيأثر عليه ويخليه ميطولش عشان كده احنا النهاردة جيبنا لكل بنات حوا 11 سر هيخلوا شعرك يطول بسرعة  وهتشوفي نتايج ملحوظة في وقت قصير جدا واسرارنا هتخلي شعرك صحي وده اللي هيخليه يطول بسرعة لان الشعر الصحي المفروض بيطول في المتوسط نص بوصة كل شهر.

تعالوا نعرف مع بعض ايه هي الاسرار اللي هتخلي شعرك يطول بسرعة ؟

1- الحصول على الاسماك في نظامك الغذائي:

قبل ما ندور على الوصفات والماسكات للشعر لازم نبدأ الاول من جوه داخل جسمنا لازم الاهتمام يبدأ من جوه لبره لان النظام الغذائي مكمل للوصفات والماسكات لو مهما عملتي ماسكات وانتي مش مهتمة بالتغذية السليمة الماسكات عمرها ما هتجيب معاكي نتيجة عشان ده لازم تعرفي الاكلات الصحية اللي هتساعدك ان شعرك يطول بسرعة ومن الاكلات المهمة والمؤثرة جدا على صحة الشعر هي الاسماك ومش بس للشعر للبشرة كمان وخصوصا الاسماك اللي فيها الاوميجا3 ممكن ناكل السمك اللي فيه اوميجا3 او ناخده عن طريق حبوب زيت السمك الاوميجا3 موجودة في الصيدلية ولكن طبعا الاحسن ناخده طبيعي عن طريق السمك, والدراسات فعلا اثبتت ان انخفاض نسبة الاحماض الدهنية اوميجا3 في الجسم بيبطيء من نمو الشعر وبيخلي الشعر مش صحي وسهل انه يتقصف عشان كده لو عايزة شعر صحي ويطول بسرعة لازم تدخلي السمك في نظامك الغذائي لان ليها مفعول السحر على الشعر والبشرة وهتلاحظي الفرق خلال شهر واحد بس.

وبالنسبة للاسماك الغنية بالاوميجا3 هي التونة, والسلمون, والسردين, والانشوجة, والاسماك الرخوية زي السبيط وبلح البحر والجاندوفلي, والجمبري, والسمك المملح, وفي اكلات تانية فيها اوميجا3 ولكن بنسبة اقل زي بذور الكتان, والمكسرات وخصوصا عين الجمل.

2- شربي شعرك مية:

طبعا نصيحة شكلها غريب لكن هي حقيقة ومؤثرة جدا على الشعر شرب المية مهم جدا جدا للشعر ولصحته عشان كده لازم ناخد كفايتنا من المية يوميا ونشرب مية على قد ما نقدر لان في كتير مننا بينسى شرب  المية خصوصا في الشتا وعشان متنسيش ممكن تخلي دايما جنبك ازازة مية وتشربي منها طول ما انتي قعدة ولو بره البيت خدي ازازة مية معاكي بردوا لان المية تعتبر مرطب طبيعي للشعر افضل من اي شامبو او بلسم, والمفروض اننا في المتوسط نشرب من 6 الى 8 كوبايات سوايل في اليوم وداخل فيهم غير المية الشاي او النسكافية او اي حاجة بنشربها خلال اليوم.

3- ترطيب الشعر من الخارج:

دلوقتي بقى بعد ما عرفنا طريقة ترطيب الشعر من الداخل هنعرف ازاي نرطبه من بره ضروري ترطبي شعرك يوميا بكريمات وزيوت الترطيب وافضل الزيوت لترطيب الشعر هي زيت بذور العنب, وزيت جوز الهند, وزيت الزيتون, وزبدة الشيا, دلكي شعرك وفروة الراس قبل ما تنامي لمدة دقايق باي نوع من الزيوت دي.

4- ترطيب وتغذية الشعر بعمق وبشكل صحيح:

الترطيب العادي مش كافي لازم تعرفي ترطبي شعرك وتغذية بعمق وهو انك تعملي ماسك مناسب لنوعية شعرك على الاقل مرة كل اسبوعين او تلاتة, هتحطي الماسك المناسب لشعرك وتسيبيه على الشعر من نص ساعة ل 40 دقيقة  وتركزي عليه السيشوار عشان يفتح مسام فروة الراس والمرطب يدخل في المسام ويغذي فروة الراس والشعر ولو مش هتستخدمي السيشوار ممكن تغطي شعرك بطاقية او كيس وتحطي عليه فوطة سخنة او تسيبيه فترة اطول على شعرك.

5- اتعاملي مع اطراف الشعر زي باقي الشعر:

في كتير مننا بيركزوا اهتمامهم على الشعر وفروة الراس وبيهملوا الاطراف لكن لازم تتعاملي باهتمام مع اطراف الشعر زي باقي الشعر بالظبط ضروري انك تقصي الاطراف المقصفة كل فترة بانتظام الخطوة دي مهمة جدا عشان تتخلصي من كل الشعر المقصف والتالف والشعر يطول بشكل صحي.

6- سرحي شعرك بـمشط خشب واسع:

لما تيجي تسرحي شعرك وهو مبلول يفضل إنك تستعملي المشط الخشب الواسع ومش الفرشة البلاستك, ده هيساعدك إنك تسلكيه وتسرحيه من غير مايتكسر ولا يتقصف.

7- اعملي تسريحات تحافظ على شعرك:

من التسريحات اللي بتحافظ على صحة الشعر وتحميه وتخليه صحي الضفاير وخصوصا الراستا اللي هي الضفاير الافريقية الرفيعة, وتسريحة الكحكة, الستايلات دي بتحمي الشعر وبتحافظ عليه اكتر من الجو والتراب او اي حاجة ممكن تأثر عليه, وهنلاقي مشاهير كتير بيستخدموا الستايلات دي عشان يحافظوا على شعرهم.

8- تجنبي تجفيف الشعر:

ابعدي عن تجفيف الشعر بالسيشوار بعد ما تغسلية لان في كتير مننا بيقعوا في الغلطة دي يكونوا مستعجلين او معندهمش وقت وينشفوا الشعر بالسيشوار احسن حاجة تخليه ينشف على طبيعته وياخد وقته لان تنشيف الشعر بالسيشوار بيقصفه ويكسره.

9- ابعدي عن منتجات الشعر اللي فيها مواد كيميائية مضرة:

في منتجات كتير للشعر في السوق بتأثر بشكل سلبي على شعرنا وبتنشفه وتقصفه لان بيكون فيها مواد كيميائية بتضر الشعر حاولي انك تبعدي عن المنتجات دي واستخدمي المواد الطبيعية زي الاعشاب والزيوت الطبيعية, والزبدة الطبيعية زي ما قولنا زيت الزيتون وزيت جوز الهند وزبدة الشيا الحاجات دي افيد بكتير للشعر.

10- تجنب الحرارة العالية:

حاولي على قد ما تقدري تتجنبي السيشوار او استخدام الحرارة العالية على شعرك لان الحرارة هي العدو الاول للشعر بتأثر على صحة الشعر جدا وبتخليه يتقصف عشان كده اللي بيعملوا شعرهم دايما بالسيشوار هيلاحظوا ان شعرهم دايما ناشف ومقصف لان الحرارة العالية بتسحب الرطوبة من الشعر وبتنشفه, حاولي تخلي شعرك على طبيعته احسن وانتي لو اتبعتي كل النصايح اللي قولنا عليها هنا هيبقى شعرك صحي وطري ومش هيحتاج سيشوار, وممكن تعملي تسريحات الشعر اللي مش محتاجة سيشوار يعني تسيبيه كيرلي على طبيعته, او تعمليه ضفاير, او كحكة.

11- الصبر:

اخر حاجة هننصحك بيها هي الصبر وانتي بتنفذي النصايح يعني متستعجليش عشان تشوفي النتايج مش مثلا من اول اسبوع تلاقي مافيش نتيجة توقفي ومتكمليش لان في كتير مننا كده وده اللي بيخلي مافيش اي حاجة تنفع معانا او تجيب نتيجة زي ما قولنا اقل حاجة شهر بعد ما تنفذي النصايح دي عشان تشوفي النتايج المطلوبة وان شاء الله لو مشيتو عليها هتلاحظو الفرق, وكمان نخلي بالنا من اي منتجات بنشتريها للشعر منشتريش اي حاجة غير لما نشوف مكوناتها ونتأكد انها مش مضرة لشعرنا.