7 استخدامات مفيدة لاكياس الشاى المستعملة !

مفيش حد فينا تقريبا ما بيشربش شاى … لانه المصريين بطبعهم بيحبوا الشاى جدا ومنقدرش ننكر انه الشاى جزء اساسى جدا من النظام الغذائى لاغلبية البنات ، بنحب نشرب شاى بعد الاكل واول لما نصحى من النوم ، لكن بعد ما بنشرب الشاى دايما بنرمى اكياس الشاى او ” فتلة الشاى ” لاننا مبنلاقيش ليها اى فايدة ! بس خلاص مش هترميها بعد كده تاني خالص .. لانك فى المقال ده هتلاقى 6 افكار مختلفة و مفيدة جدا مش هتخليكى ترمى اكياس الشاى بعد كده ابدا !

1- استخدام اكياس الشاى المستعملة فى تنظيف البيت :

الشاى الاحمر العادى اللى بنشربه اكتر من مرة فى يومنا ممكن تستخدميه فى تنظيف البيت ، امزج 2 فتلة من الشاى بعد ما تشربيهو سيبيه يتنقع فترة فى مياة سخنه ، بعد مرور الوقت يعنى حوالى من ربع ساعة ل 20 دقيقة استخدمى المياة دى فى مسح ارضية البيت خصوصا لو كانت من الخشب او ” الباركيه ” ، و هيخلى الارضية نظيفة جدا و بتلمع كأنها لسه جديدة . و ممكن كمان تستخدمى الطريقة دى فى تليمع الانتيكات او الانتريها تو الكراسى الخشب و كمان المرايات و ازاز الشبابيك ، و لنتائج أفضل استخدمى قطعة قماش قطنية  فى التلميع او حطيه فى رشاش من بتاع المياة زى اللى بنستخدمه و احنا بنكوى الهدوم .

2- استخدام اكياس الشاى المستعملة فى ازالة بقع الشحم و الشمع:

اكياس الشاى المستعملة ممكن تستخديها فى ازالة بقع الشحم  او الشمع من على الهدوم او بواقى الشمع اللى بتكون على الشمعدانات ،حطى كيس الشاى المبلول بمياة دافية على البقع و سيبيه شوية و بعدين افركى البقعة بمسحوق الغسيل العادى بتاعك ، و الشمعدانات لمعيها بفوطة قطنية مبلولة بالمياة المنقوع فيها اكياس الشاى .

3- ازالة الروايح من الايدين بعد الطبيخ:

اكياس الشاي مفيدة جدا فى ازالة الروايح ، افركى ايدك بفتلة شاى بعد تقطيعك للبصل او الثوم و هتلاقى الريحة اختفت على طول .

4- ازالة الروايح من البيت:

اكياس الشاى المستعملة ممكن تستخدميها كمان فى ازالة الروايح من البيت ، انقعى اكياس الشاى فى المياة اللى بتنضفى او بتمسحى بيها الارضية ، ممكن كمان تعلقى اكياس الشاى العطرية فى عربيتك او فى شنطتك بعد ما تنشف علشان تخلى فيها دايما ريحة حلوة و معطرة ، او ممكن تحطيها على رف الثلاجة علشان تضيع الروايح الغير مستحبة منها و ممكن كمان فى حذائك او فى الدولاب .

5- الاغراض الجمالية 

كلنا عارفين انه اكياس الشاى الفتلة مفيدة جدا فى القضاء على الهالات السوداء و انها بتريح العين جدا و بتساعدك على الاسترخاء لما تحطيها على عينيكى ، وممكن كمان تستخدمى المياة المنقوع فيها اكياس الشاى و تشطفى بيها شعرك ، ده بيساعد فى انه بيدى الشعر لمعة حلوة و بيساعد فى انه يكون اقوى .

6- لجمال بشرتك :

الشاى الاخضر مفيد جدا جدا لبشرتك و بنعتبره علاج غير مكلف اطلاقا بيضمن جمال بشرتك و نعومتها ونضارتها لانه بيحتوى على فيتامينات مختلفة و كتيرة جدا بتقدر تفيد جسمك و بشرتك ، علشان تعرفى فايدة و استخدامات الشاى الاخضر لبشرتك شوفى موضوعنا عن  وصفات للبشرة من الشاى الاخضر

7- للقضاء علي الالتهابات:

لتهدئة تهيج الجلد زي مثلا حروق الشمس أو الكدمات، قرصات النموس، هاتي كيس الشاي المستعمل وحطيه علي المنطقة المصابة واضغطي عليه عشان تخففي وتهدي الألم وبيساعد علي علاج الكدمات أو الالتهابات.