طريقة عمل المانيكير للايدين في البيت بالخطوات

بقلمريهام محمود فيأظافر visibility25179

كل بنات حوا بيتمنوا تبقى ايديهم وضوافرهم دايما شكلها حلو لكن اكيد بيكون صعب اننا نروح دايما صالون التجميل نعمل المانيكير يا اما بسبب الوقت ممكن يكون مش دايما متوفر الوقت نروح او بسبب تكلفة المانيكير في صالونات التجميل مش كلنا بنقدر نتحملها عشان كده احنا النهاردة جيبنالكم طريقة عمل المانيكير للايدين في البيت خطوة بخطوة هتقدري تعمليه لنفسك بخطوات بسيطة وسهلة ويطلع زي صالون التجميل بالظبط.

معلومة مهمة بنات حوا حابة توضحهالكم ايه الفرق مابين الباديكير والمانيكير؟ العناية بالقدمين وضوافر القدمين اسمها باديكير “Pedicureوالعناية بالأدين وضوافر الادين اسمها مانيكير”Manicure” , لكن احنا بقي الشائع عندنا واللي علي طول بنقوله إن تلوين الضوافر هو المانيكير والعناية بيها وتقليمها هو الباديكير وديه معلومة مش صح حبنا نوضحها :)

  • تعالوا نعرف مع بعض الاول الحاجات اللي محتاجينها عشان نعمل المانيكير:

1- مية دافية ومحلول مطهر.

2- اسيتون.

3- مبرد ضوافر خشب.

4- قصافة.

5- بنز لازالة الجلد الميت.

6- كريم مرطب.

7- زيت لازالة الجلد الميت حول الضوافر “موجود في الصيدلية”.

ادوات عمل المانيكير للايدين
ادوات عمل المانيكير للايدين
  • نيجي دلوقتي لخطوات عمل المانيكير للايدين خطوة بخطوة:

1- الخطوة الاولى:

اول حاجة هتجيبي حتة قطن وتنضفي ضوافرك كويس بالاسيتون من اي مانيكير قديم كنتي حطاه.

ازالة المانيكير
ازالة المانيكير

2- الخطوة التانية:

هاتي طبق نضيف وحطي فيه شوية مية دافية وحطي معاه ملح وعصير ليمون عشان يطهر الضوافر وينضفها وسيبي ضوافرك فيه من عشر دقايق لربع ساعة لحد ما الجلد اللي حوالين الضوافر يطرى ويبقى سهل عليكي تتخلصي منه.

انقعي ضوافرك في مية دافية
انقعي ضوافرك في مية دافية

3- الخطوة التالتة:

طلعي ايدك من المية ونشفيها بالفوطة كويس وبعدين ادهني الجلد حوالين الضوافر بزيت ازالة الجلد الميت لو مش متوفر عندك زيت ازالة الجلد الميت او ملقتيهوش في الصيدلية ممكن تحطي بداله كريم مرطب على الجلد حوالين الضوافروبعدين تبدأي تشيلي الجلد ببنز تنضيف الضوافر ممكن قبل ما تشيليه بالبنز تحركي الجلد بعود البرتقان ده عبارة عن عود خشب طويل مخصوص للضوافر ممكن تجيبيه من الصيدلية ولو مش متوفر ممكن تستبدليه بخلة سنان تبدأي تحركي الجلد بالراحة عشان تسهلي عليكي ازالة الجلد وبعدين تشيليه بالبنز, ونخلي بالنا واحنا بنشيل الجلد عشان منجرحش نفسنا يعني نشيله بالراحة وبحذر جدا.

ازالة الجلد الميت
ازالة الجلد الميت

4- الخطوة الرابعة:

بعد كده قصي ضوافرك لو محتاجة تقصريهم شوية وابرديهم بالمبرد الخشب في اتجاه واحد عشان متتقصفش او تتكسر والمبرد الخشب احسن من المعدن لان المعدن بيكسر الضوافر وبيقصفها, ولو انتي ضوافرك بتتكسر بسهولة انسب حاجة انك تبرديهم بشكل مستدير.

قص الضوافر وبردهم
قص الضوافر وبردهم

5- الخطوة الخامسة:

هتدهني ضوافرك وايدك كلها كويس بكريم مرطب.

ادهني ضوافرك وايدك بكريم مرطب
ادهني ضوافرك وايدك بكريم مرطب

6- الخطوة السادسة:

اخر خطوة هتحطي المانيكير او لو مش عايزة المانيكير ممكن تكتفي بس بمقوي الضوافر لتقوية الضوافر وعشان تديهم لمعة.

وضع المانيكير او مقوي الضوافر
وضع المانيكير او مقوي الضوافر

وممكن بعد ما نعمل المانيكير نعمل وصفة بسيطة للايد عشان نحافظ عليها ناعمة على طول هنخلط نص كوباية مية ورد مع نص كوباية جلسرين مع نص كوباية عصير ليمون ونخلطهم كويس مع بعض وادهني ايدك بالخليط, احتفظي بباقي الخليط في اي ازازة عندك وادهني بيه ايدك كل يوم قبل النوم لو استمريتي عليها يوميا ليها تأثير فظيع هتلاقي ايدك بقت حرير.

وصفة لتنعيم الايدين
وصفة لتنعيم الايدين

ولو عايزة ضوافرك تبقى قوية ومتتقصفش انقعيها كل يوم في عصير ليمون لمدة 10 دقايق هتقوي ضوافرك جدا وكمان هتخليها بتلمع وهتبيضهم من اي بقع او اصفرار.

تقوية الضوافر
تقوية الضوافر