اغرب 26 طريقة عشان تهدي اعصابك !
كلنا مع ضغوط الحياة اللي بنمر بيها كل يوم بنتعرض للتوتر والقلق والضغط النفسي بسبب الشغل اوالدراسة او في ايام الامتحانات او لو عندك انترفيو مهم مثلا كل الحاجات دي بتخلينا نقلق ونبقى تحت ضغط نفسي وعصبي كبير وبنحاول على قد ما نقدر نسيطر على اعصابنا بطرق كتير عشان كده احنا النهاردة جيبنالكم طرق غريبة وغير تقليدية هتساعدك عشان تهدي اعصابك وليها تأثير فعال جدا.
تعالوا نشوف ايه هي الطرق اللي هتساعدك عشان تهدي اعصابك ؟
1- اكل المخلل:
المخلل من الحاجات اللي بتخفف التوتر في دراسات كتير اثبتت ان الاكلات المخمرة او المخللة بتقلل جدا من التوتر والضغط العصبي وده بيرجع ان الاكلات دي فيها نوع من البكتيريا المفيدة او الجيدة اسمها “البروبيوتيك” لما بتدخل المعدة ليها تأثير ايجابي على الحالة النفسية وبتخفف من التوتر العصبي والقلق.
ومعلومة بسيطة عن بكتيريا “البروبيوتيك” عشان في اكيد هيسألوا هو في بكتريا مفيدة ؟ هو فعلا في نوعين من البكتريا ضارة ومفيدة وبكتريا “البروبيوتيك” من الانواع المفيدة وبتتسمى البكتريا النافعة او البكتريا الصديقة هي نوع من البكتريا مفيد للصحة العامة وخصوصا الجهاز الهضمي وبتعيد التوازن الحيوي في الجسم عشان كده البكتريا دي ليها تأثيرايجابي على الحالة النفسية, وموجودة في اكتر من نوع اكل زي الزبادي والمخللات وكمان الشيكولاتة.
2- احضني نفسك :
احضني نفسك يعني لفي دراعك حوالين جسمك لمدة دقيقة واحدة كافية جدا انها تغير مودك وتخفف الضغط والقلق او احضني عيلتك واصحابك وكل اللي بتحبيهم او حتى لو مربية حيوان اليف في البيت زي الكلب او القطة لان الدراسات اثبتت ان الحضن او الاحساس بالحب ده بيخفف من التوتر والقلق بشكل ملحوظ جدا جربوها وشوفوا النتيجة.
3- احلام اليقظة:
احلام اليقظة اللي بتكون وانتي صاحية انك تسرحي بخيالك وتتخيلي حاجات ايجابية ده بيخفف التوتر اوي لانه بيحط العقل في مكان تاني بعيد عن الضغوط النفسية واسباب القلق وده بيخفف من الضغط العصبي.
4- ريحي راسك لمدة دقيقتين:
لو حسيتي بتوتر وضغط عصبي خدي نفس عميق وغمضي عنيكي ونزلي راسك لتحت لمدة دقيقة او اتنين الحركة دي بتصفي الذهن وبتخفف من التوتر جدا.
5- سرحي شعرك:
سرحي شعرك او لو عندك حيوان اليف سرحي له شعره لان السر في الحركة المتكررة الحركات اللي ورا بعض دي بتخفف من التوتر وبتساعد الجسم على الاسترخاء.
6- اشربي شاي اخضر:
الشاي الاخضر من الاعشاب المفيدة جدا فيه مادة كيميائية اسمها الثيانين بتساعد جدا على تخفيف التوتر والعصبية يعني كل يوم لو شربتي كوباية شاي اخضر هتخليكي ريلاكس جدا وهتهدي اعصابك.
7- كلي عسل:
خدي كل يوم معلقة عسل العسل من الحاجات المفيدة جدا اللي بتساعد في تخفيف التوتر وبيحارب الاكتئاب والقلق.
8- كلي مانجا:
اقطعي شريحة مانجا وكليها قطمة المانجا دي بتفرز مادة اسمها لينالول بتساعد على خفض مستوى التوتر والقلق.
9- اندغي لبان:
اللبان من اسرع الحاجات اللي ممكن تخفف التوتر لو ندغتي لبان لمدة دقايق بس ده بيخفض مستوى هرمون الكورتيزول وده الهرمون اللي بيزود نسبة القلق في الجسم وبالتالي لما مستواه بيقل في الجسم ده بيخفف من القلق والتوتر.
10- كلي الوجبات الخفيفة المقرمشة:
السناكس المقرمشة والمملحة اثبتت الدراسات انها بتخفف اوي من نسبة التوتر والقلق في الجسم.
11- حطي راسك على المخدة:
لو حاسة انك مضغوطة اوي ومجهدة وعندك حاجات كتير هتعمليها ومعندكيش وقت انك تنامي حطي راسك على المخدة بس لمدة دقايق وحاولي تصفي ذهنك الكام دقيقة دول واتخيلي ان المخدة دي سفنجة بتمتص كل الضغط اللي عندك هتحسي انك ارتحتي والتوتر والضغط العصبي خف كتير.
12- عدي الارقام بالعكس:
لو حسيتي بالقلق والتوتر اوي عندك امتحان او مقابلة شغل مثلا ومتوترة عدي الارقام بالعكس بشكل بطيء يعني 10.9.8.7 وهكذا الطريقة دي بتساعد على الاسترخاء جدا وبتخفف من القلق والتوتر, وبتساعد على النوم كمان يعني لو عندك ارق ومش عارفة تنامي جربيها هتلاقي نفسك نمتي على طول.
13- غمضي عينك:
لو انتي في شغلك ووسط الزحمة والدوشة وحسيتي ان عليكي ضغط عصبي مش قادرة تتحملية غمضي عينك لمدة دقايق بس دي طريقة فعالة جدا في تخفيف الضغط العصبي وهتخليكي تستعيدي الهدوء والتركيز.
14- اعملي مساج لايدك:
من الحاجات المفيدة جدا للاسترخاء وتخفيف التوتر اعملي مساج لايدك حطي اي لوشن على الكف في النص من جوه وابدأي اعملي مساج بصوابعك على المنطقة دي هتحسي ان التوتر والضغط خف جدا وهتحسي بالاسترخاء.
15- افركي رجلك في كورة:
جيبي اي كورة صغيرة عندك في حجم كورة الجولف او التنس كده وحطيها تحت رجلك وابدأي حركي رجلك عليها لورا وقدام الطريقة دي بتعمل مساج للرجل وبتساعد على الاسترخاء وبتخفف جدا من التوتر.
16- اضغطي على كورة بايدك:
الكورة الصغيرة اللي بيتعمل بيها تمارين الايد امسكيها واضغطي عليها ده بيخفف جدا من التوتر والعصبية.
17- حطي مية باردة على منطقة المعصم:
لو حسيتي بالتوتر والضغط العصبي حطي مية باردة على منطقة المعصم اللي هي ما بين كف الايد والدراع لان المنطقة دي فيها الشرايين الرئيسية في الجسم ولما تحطي عليها مية باردة هتهدي الجسم وتخفف التوتر.
18- غسل الاطباق:
مش في كتير مننا لما بيحس بتوتر او عصبية بتلاقي نفسك دخلتي تغسلي الاطباق او اي حاجة قدامك لا اراديا وبتحسي بعدها انك هديتي ؟ فعلا الموضوع ده بيخفف التوتر جدا الحركات اللي بنستعملها في غسل الاطباق دي بتساعد الجسم على الاسترخاء وبتخفف التوتر والضغط العصبي جدا.
19- الجري في المكان:
لو معندكيش وقت او مكان تجري فيه عشان تخففي من التوتر ممكن تعملي تمرين الجري في المكان لمدة دقايق بس ده بيساعد اوي على تخفيف التوتر والضغط.
20- اكتبي اللي حاسه بيه:
هاتي ورقة واكتبي عليها كل اللي انتي حاسة بيه او الحاجة اللي مسببة لك توتر مجرد الكتابة دي وانك تخرجي مشاعرك على الورق هتريحك جدا وتخفف من التوتر اوي.
21- اسمعي اغنيتك او موسيقتك المفضلة:
شغلي الاغنية او الموسيقى اللي بتحبيها واقعدي اسمعيها ده بيغير المود خالص وهيخليكي تسترخي وتبعدي عن التوتر.
22- ارقصي:
الرقص من الحاجات اللي بتخفف التوتر جدا واثبتت الدراسات ان الناس اللي بيمارسوا الرقص نسبة التوتر عندهم بتقل جدا شغلي اي موسيقى ارقصي عليها لمدة خمس دقايق بس وهتلاقي التوتر عندك خف جدا.
23- حلي الكلمات المتقاطعة:
حل الكلمات المتقاطعة او الالعاب اللي فيها الغاز بتخفف جدا من التوتر لان التركيز في اللعية هيخليكي تبعدي عن اسباب التوتر والقلق.
24- شمي ورد او زيت عطري:
الروايح الحلوة ليها تأثير كبير جدا في تغيير المود خلي دايما في ورد من النوع اللي بتحبيه في مكان الشغل او في البيت, او هاتي اي زيت عطري زي زيت الياسمين او الخزامي او اي نوع انتي بتحبيه وحطي منه كام نقطة على ايدك وشميها دي هتساعدك انك تسترخي وتخلصك من التوتر.
25- شمي القهوة والفواكة الحمضية:
ريحة القهوة والفواكة الحمضية زي الليمون والبرتقان من الحاجات اللي بتخفف التوتر جدا عشان كده في كتير مننا مودهم مش بيتظبط الصبح غير لما يشربوا قهوة مش بس شربها مفيد ريحتها كمان مفيدة لانها بتقلل من هرمونات التوتر في الجسم.
26- اضحكي:
من الحاجات اللي بتخفف التوتر جدا هي الضحك لان الضحك بيزيد من تدفق الدم وبيزود مناعة الجسم يعني مثلا اقري نكت او اتفرجي على اي حاجة مضحكة ده هيغير مودك ويخفف التوتر.
ان شاء الله الطرق تعجبكم وتفيديكم جربوها وشاركونا الطرق اللي هتستخدموها والنتايج بعد التجربة :) .
