ايه هي الحنة البيضا؟ وفوايدها الجمالية للبشرة والجسم
اكيد كلنا عارفين الحنة السودا والبني واستخدمناها كتير ورسمنا بيها لكن الجديد بقى هي الحنة البيضا الحنة دي نازلة من فترة وانتشرت اوي وبقوا بنات كتير بيفضلوها عن الحنة السودا والبني بيبقى شكلها حلو ومختلف اوي في الرسومات خصوصا لو حنة العروسة.. والحنة البيضا مش بتستخدم بس للرسم هي ليها فوايد تانية كتيرهايلة للبشرة والجسم بتساعد على تبييض الجسم والاماكن الغامقة وبتوحد لون الجسم وبتعالج البقع الغامقة وبتقشر البشرة وتنعمها وبتخلصك من الرؤوس السودا وبتخلي البشرة صحية ومنورة, فاحنا جيبنا لكل بنات حوا النهاردة مجموعة كبيرة من اشكال رسومات بالحنة البيضا ووصفات طبيعية من الحنة البيضا.
تعالوا نشوف مع بعض مجموعة رسومات من الحنة البيضا:
دلوقتي بقى هنعرف مع بعض وصفات طبيعية من الحنة البيضا للبشرة والجسم:
تعالوا الاول قبل ما نشوف الوصفات نعرف فوايد الحنة البيضا للبشرة والجسم اولا بتفتح البشرة والجسم, ولكل البنات اللي بيشتكوا من الاماكن الغامقة زي الكوعين والركب والمنطقة الحساسة الحنة البيضا من الحاجات الهايلة جدا اللي بتفتح الاماكن الغامقة, وبتوحد لون الجسم, بتعالج البقع واثار حب الشباب, ومفيدة كمان لعلاج الحبوب نفسها, بتشد البشرة وبتنعمها, بتعالج الرؤوس السودا يعني هايلة جدااا للبشرة ياللا بقى نشوف الوصفات.
1- وصفة لتفتيح الاماكن الغامقة في الجسم:
المكونات:
– 2 معلقة كبيرة حنة بيضا “موجودة عند العطار”.
– 2 معلقة كبيرة اي نوع صابون اطفال مبشور.
– 2 معلقة كبيرة مية اكسجين بنسبة 20%.
– معلقة كبيرة لبن.
طريقة التحضير والاستخدام:
جيبي طبق ازاز وحطي فيه الصابون المبشور وعليه مية الاكسجين وقلبيهم مع بعض كويس لحد ما الصابون يدوب خالص وبعدين تضيفي الحنة البيضا على خليط الصابون وتقلبيهم كويس مع بعض بمعلقة خشب مش معدنية عشان المعدن ممكن يتفاعل مع الخليط ويضيع مفعولة وبعدين تحطي اللبن وتقلبي كويس وبعدين تدهني المناطق الغامقة بالخليط وتسيبيها نص ساعة وبعدين تغسليها بمية دافية وتدهني كريم مرطب, الخلطة دي للجسم بس مش للوش لان مية الاكسجين حامية على الوش عشان كده هنستخدم الخلطة دي للاماكن الغامقة بس.
2- وصفة لتفتيح بشرة الوش والجسم:
المكونات:
– 2 معلقة كبيرة حنة بيضا.
– معلقة كبيرة مية ورد.
– معلقة صغيرة من اي كريم مرطب انتي بتستخدميه او زيت لوز.
طريقة التحضير والاستخدام:
اخلطي المكونات كلها مع بعض كويس وبعدين حطيها على الوش والجسم وسيبيها نص ساعة وبعدين اغسليه بمية دافية, والماسك ده ممكن تعمليه 3 مرات في الاسبوع.
3- وصفة لتفتيح الجسم:
المكونات:
– 3 معالق كبيرة حنة بيضا.
– معلقة كبيرة كركم.
– معلقة كبيرة لبن بودرة.
– 2 معلقة كبيرة مية ورد.
طريقة التحضير والاستخدام:
اخلطي المكونات كلها مع بعض كويس وادهني بيها الجسم وسيبيها لمدة ساعة وبعدين اغسليها بمية دافية وادهني كريم مرطب, والخلطة تتعمل مرتين في الاسبوع.
4- وصفة لتفتيح الوش وتنعيمه:
المكونات:
– معلقة كبيرة حنة بيضا.
– 2 معلقة كبيرة زيت زيتون.
– معلقة كبيرة عسل ابيض.
طريقة التحضير والاستخدام:
اخلطي كل المكونات مع بعض وادهني بيها بشرتك وسيبيها نص ساعة وبعدين اغسليها بمية دافية, والماسك ده ممكن تعمليه كل يوم لحد ما توصلي للنتيجة اللي انتي عايزاها.
5- وصفة لتفتيح الوش وتوحيد لونه وعلاج البقع الغامقة:
المكونات:
– معلقة كبيرة حنة بيضا.
– معلقة كبيرة زبادي.
– نصف معلقة صغيرة عصير ليمون.
طريقة التحضير والاستخدام:
اخلطي كل المكونات مع بعض كويس وحطيها على بشرتك وسيبيها نص ساعة وبعدين اغسليها بمية دافية وادهني كريم مرطب, والوصفة دي تتكرر 3 مرات في الاسبوع.
نخلي بالنا في كل الوصفات قبل ما نحطها على بشرتنا كلها نجربها الاول على جزء صغير من البشرة كأختبار عشان نشوف بشرتنا حساسة للخلطة ولا لا لان كل بشرة بتختلف عن التانية فضروري نختبرها الاول وبعدين نستخدمها عادي بعد ما نتأكد منها.
