افكار تجنن للاحتفال وتقديم هدايا الفلانتين

ريهام محمود
ريهام محمود
في
حب
30678

 عيد الحب خلاص بعد كام يوم وكل المرتبطين والمتجوزين بيستنوا اليوم ده عشان يعبروا عن حبهم لشريك حياتهم ولو بحاجات بسيطة لان الهدية حتى مهما كانت بسيطة بتعني كتير وليها معني كبيرعند شريك حياتك لكن كل سنة بنحتار في هدايا عيد الحب عشان كده احنا النهاردة جيبنالكم مجموعة افكار تجنن لهدايا الفلانتين ليكي وليه ومنها افكار غير تقليدية وازاي نقضي اليوم ده وننبسط فيه بحاجات بسيطة ومش مكلفة.

لو حابة تختاري هديته علي حسب شخصية برجه شوفي من هنا ولو حابب تختار هديتها علي حسب شخصية برجها شوف من هنا 

تعالوا نشوف مع بعض افكار غير تقليدية للاحتفال في اليوم ده وإزاي ممكن نقدم هدايا الفلانتين :

1- من الهدايا الرومانسية اللي ممكن تتعمل في يوم زي ده مجموعة كروت صغيرة ونكتب على كل كارت سبب من اسباب حبك لشريك حياتك ويتحطوا في ظرف عنوانه مثلا “20 سبب بحبك عشانهم ” والهدية دي تنفع ليكي وليه هي هدية بسيطة جدا ولكن هيبقى معناها كبير جدااا.

افكار لهدايا الفلانتين 1
افكار لهدايا الفلانتين 1

2- في فكرة كمان جديدة وغير تقليدية وهي كتابة رسايل على كروت فيها كلمات حب لشريك حياتك وكل رسالة بكلمات مختلفة طبعا ويتكتب عليها تواريخ يعني كل رسالة تتفتح في يوم معين مش كلها تتفتح يوم عيد الحب والميزة بقى في الفكرة دي إنكم ممكن تبدأها من قبل عيد الحب وهتستمر كمان لبعد عيد الحب وتبقي مستنية تعرفي ايه اللي مكتوب في كل رسالة والفكرة دي بردوا تنفع ليكي وليه.

افكار لهدايا الفالنتاين 1
افكار لهدايا الفالنتاين 1

3- من الهدايا اللي بتتقدم ليها فترة بس عمرها ماهتبطل وهتبسط البنت جدا فكرة صندوق او سبت الهدايا المليان شوكولاتة وحاجات حلوة من اللي خطيبتك او مراتك بتحبهم ومعاهم كارت مكتوب فيه كلمات حب ويا سلام لو معاهم كمان ورد, دي من الحاجات اللي ممكن تبسط اي بنت وهتبقى احلى هدية بالنسبة لها.

سبت هدايا
سبت هدايا

4- ممكن كمان تعملي له مفاجأة في اليوم ده لما يكون بره البيت تملي البيت بالونات وكل بالونة تكتبي عليها كلمة حب ولما يدخل البيت يتفاجأ بيها او ممكن تكتبي رسايل حب على ورق صغير وتحطيها جوه البالونات وتخليه يفرقع البالونات عشان يقرا الرسايل الفكرة دي لذيذة لانها هتعمل جو حلو اوي يعني حب ولعب في نفس الوقت.

افكار لهدايا الفالنتاين 2
افكار لهدايا الفالنتاين 2

5- لو محتارة تجيبيله ايه ومش عارفة تختاري هدية, ممكن تشتري له حاجة انت عارفة انه نفسه فيها او عايز يشتريها وكان مكسل أو مستغليها أو معندوش وقت انتي تفاجئية وتجيبهاله يوم عيد الحب وتلفيها لفة حلوة ومعاها كارت مثلا مكتوب عليه كلمات وبردو نفس الفكرة بالنسبة ليك ممكن تجيبلها حاجة كان نفسها فيها ومكنش في فرصة انها تشتريها الفكرة دي هتفرق كتير اوي لانه كل طرف هيحس ان التاني مهتم وحاسس بيه وبيحبه اوي وعارف هو محتاج لايه.

افكار لهدايا الفلانتين 2
افكار لهدايا الفلانتين 2

6- جربي تكتبي كلمات حب على ورق على شكل قلوب مثلا او تكتبي على كل ورقة لحظة حلوة كانت بينكم تفكريه بيها وتوزعيهم في البيت في اماكن عارفة انه يشوفها او هيفتحها في الدولاب مثلا او في درج او على السرير وكل ما يفتح مكان يلاقي ورقة مكتوب عليها كلمة حب هتبسطه جدا والفكرة بردوا تنفع ليكي وليه يعني انت كمان ممكن تعمل نفس الفكرة.

افكار لهدايا الفلانتين 3
افكار لهدايا الفلانتين 3

7- ممكن ليك انت بقى في اليوم ده تريحها خالص وتعملها انت مثلا اكله هي بتحبها يعني مش لازم سهرة في مكان او في مطعم ممكن انت في البيت تعملها جوالمطعم وتعملها الاكل اللي بتحبها الفكرة دي هتبسطها جدا لانها هتحس انك عايز تريحها ولو حتى يوم وانك اهتميت حتى انك تتعلم اكلة معينة لو مبتعرفش تعملها عشان تعملهالها في اليوم ده.

افكار لهدايا الفالنتاين 3
افكار لهدايا الفالنتاين 3

8- حاولوا بقي انتم الاتنين في اليوم ده طول ما انتم في الشغل او بره البيت تبعتيوا رسايل حب على الموبايل او رسالة صوتية,كنوع من التهيئ للاحتفال بعد الشغل.

افكار لهدايا الفالنتاين 4
افكار لهدايا الفالنتاين 4

9- لو في اطفال في البيت ممكن في اليوم ده يروحوا عند مامتك او مامتها وتحاولوا تخلوا اليوم ده ليكوا انتوا الاتنين بس تستمتعوا بيه مع بعض.

10- لو حابة تعملي الاحتفال في البيت ومش هتخرجوا بره ممكن تنفذي الأفكار ديه للمنيو بتاعت اكلك وشوفي أفكار ديكور ممكن تزيني بيها بيتك اليوم ده: 

  • الفطار والغدا: جربي إنك تعملي الاكل اليوم ده كله علي شكل قلوب, من أول البيض في الفطار أو البان كيك, لحد البرجر والبطاطس, الجمبري أو حتي البيتزا في الغدا أو العشا. هتدي لمسة رومانسية جميلة وهتعمل جو مرح للاحتفال بتعكم.
فطار وغدا الفلانتين
فطار وغدا الفلانتين
  • الحلو: من أول الجلي اللي هو اسهل حاجة , للبسكوت للكيك اللي شكل قلوب.. برده بتبقي احلي بكتير لو تعبتي وعملتي منها بنفسك ليه.
الحلو في الفلانتين
الحلو في الفلانتين
  • الديكور: ممكن تزيني البيت اليوم ده من أول اوضة نومك لحد ترابيزة الليفينج والسفرة اللي هتقدمي عليها العشا, وممكن تحطوا لبعض الهدايا جوه الطبق قبل الكل ومعاها كارت فيه كلام بتعبروا بيه عن احساسكم لبعض.
ديكور الفلانتين
ديكور الفلانتين
  • دي افكار لكروت ممكن تعمليها بنفسك بسيطة وسهلة جدا:

كلها افكار بسيطة جدا ومش مكلفة واهم حاجة فيها هي المعنى وانك تعبر عن حبك بحاجات بسيطة لكن هتفرق اوي وان شاء الله تكون الافكار عجبتكم وياللا نفذوها وشاركونا بعد التنفيذ بقى وقولوا لنا تأثيرها كان ايه وكل عيد حب وانتوا في حب.

مقالات متعلقه

هدايا عيد الحب لشريكك ممكن تعمليهم بنفسك

هدايا عيد الحب لشريكك ممكن تعمليهم بنفسك

افكار جديدة للوك بتاعك عشان تبقي متألقة ومميزة في عيد الحب

افكار جديدة للوك بتاعك عشان تبقي متألقة ومميزة في عيد الحب

ازاي توصلي للبشرة اللي بتحلمي بيها بأبسط طريقة في البيت

ازاي توصلي للبشرة اللي بتحلمي بيها بأبسط طريقة في البيت