16 معلومة وحيلة لجمالك.. اتعرفي عليهم
16 معلومة وحيلة لجمالك من بنات حوا عشان بناتنا الحلوين .. اتفرجي عليهم وشوفي معانا نصايح لمكياج العيون واختيارك لأدوات المكياج وتسريحات تجنن للشعر . نتمني إن النصايح تعجبكم يا احلي بنات <3
وصفة لتطويل رموشك:
جيبي عصايه ماسكرا قديمة واغسيلها كويس قوي وفي علبة صغيرة اعملي خليط متساوي المقادير من زيت الخروع, جل الصبار ومعاهم زيت فيتامين E,حطي منه كل يوم قبل ما تنامي علي رموشك وهتشوفي نتيجة مذهلة من أول اسبوع.
الماسكرا مع اداه ثني الرموش:
جربي تستعملي ال “Lash Curler” أو اداه تني الرموش, اللي بتتني وتطول الرموش وممكن تستعمليها وإنتي بتحطي الماسكرا تدفيهـا لمده 10 ثواني بس بالسشوار, جربي علي ايدك عشان تتأكدي إنها مش سخنة بزيادة, حطيها علي الرموش وبعدين حطي الماسكرا, هتديكي أحسن واقوي تأثير للماسكرا.
4 ادوات رسم الحواجب لازم تعرفيهم:
1- قلم الحواجب: اسهل واشهر طريقة عشان رسم الحواجب وملي الفراغات ومتوفر بكل الألوان.. عشان تتقني الرسمة بلاش تعملي خط واحد تقيل ولكن أكتر من خط رفيعين وممكن في الاخر تنعمي الخطوة أكتر بفرشة حواجب.
2- جل الحواجب: ده بيستعمله البنات اللي حواجبها أصلا تخينة وشعر حواجبها تخين عشان تسرحها وتديها لمعة وسهل جذاب.. نفس التأثير ممكن تعلميه بالفازلين.
3- بودر الحواجب: بيبقي بودرة شبه الايشادو وممكن فعلا نستعمل لو ايشادو بلون الحواجب هيدي نفس التأثير وبعد الرسم بالفرشة بتعته يفضل نحط عليه طبقة من جل الحواجب عشان البودر متسيحشي وتثبت أثناء اليوم.
4- قلم الحواجب السايل: ده ممكن يكون اقل اداه البنات بتستعملها عشان صعوبة استعماله وهو شبه جدا الأيلينر السايل وبيدي تأثير قوي جدا للحواجب ولمعة وبيبقي سهل بمزيل المكياج أو المية.
إزاي تخلي الايلينر أو الايشادو بتاعك يثبت طول اليوم:
جيبي البودرة الشفافة وفرشة الايشادو وبعدين ماتخلصي رسم عينيكي بالايشادو و الايلينر, أمشي بالفرشة وهي فيها البودرة الشفافه علي جفنك المتحرك كله وبعدين حطي الماسكرا. الطريقة ديه هتديكي أحسن تثبيت ويعيش معاكي طول اليوم.
إزاي تخلي الايلينر أو الايشادو بتاعك يثبت طول اليوم
اختيار المكياج لأصحاب البشرة الدهنية:
يفضل وإنتي بتختاري البلاشر أو الايشادو إنك تختاري النوع المت اللي مش بيلمع وبلاش المنتجات أو الألوان اللامعة لأن المت وبعد وقت علي بشرتهم بيتحول للمعة بسيطة وبيبقي شكل حلو علي عكس اللامع مع الوقت بيبقي لامع بزيادة ومدهنن علي الوش.
لو عايزة شعرك ينشف بسرعة:
جربي تنشفي شعرك في تشيرت قطن, هينشف اسرع من لو نشفتيه في فوطة لأن التشيرت القطن بيمتص المية بشكل اكبر من الفوطة.. وكمان الطريقة ديه ممتازة عشان تعملي شعرك كرلي بعد الغسيل بلاش تسرحيه ولفيه في التشيرت لحد لما ينشف وفكيه هتلاقيه اتحول لكيرلي.
اعرفي الاختلاف بين الوان الكونسيلر:
1 – الكونسيلر الاصفر, بيوحد لون البشرة بشكل عام وبيدينا ضى و حياة للجلد المرهق او الباهت لونه و بيعيدله الحيوية.
2- الكونسيلر الروز او البينك أو الخوخي بيدي شكل طبيعي للأماكن الغامقة علي الوش وبيشيل السواد تحت العين و الزرقان و العروق.
3 – الكونسيلر الاخضر: بيخفي المناطق الحمرا على الوش زي أثر الحبوب والبقع الحمرا وكمان ده افضل لتغطية حب الشباب، مش بنستعمله على الأجزاء الغامقة في الوش زي الهالات السودا مثلا.
زيت جوز الهند لإزالة المكياج:
اتكلمنا قبل كده عن زيت جوز الهند وفوايده المذهلة.. ممكن نستعمله بدي لوشن أو بديل للبلسم.. كمان ممكن نستعمله لإزالة المكياج حتي النوع ال water proof بيشيلها بمنتهي السهولة, حتي منه حوالين عينك وبعدين بقطنة زيلي المكياج بسهولة وببساطة.
إزاي تحتفظي بالسلاسل بتعتك وإنتي مسافرة؟
جربي إنك تدخليها في شاليمو وحطيها في الشنطة بأمان وبكده تتأكدي إنها عمرها ماهتتكلكع وتعدي ساعة تفكي فيها وإنتي بتطلعيها من الشنطة..
اعملي مانيكيرك باللون اللي بتحبيه:
لو عندك بلاشر أو أيشادو بتحبيه, ممكن تستغليه وتعملي منه مانيكير بنفس اللون .. في طبق صغير اخلطي كمية من الايشادو وحطي عليه كمية صغيرة من المانيكير الشفاف واخلطيهم مع بعض بخله سنان..وابدأي طبقي منه علي ضوافرك!
عايزة تعملي رسمة في ضوافرك بالمانيكير؟
استغلي فرشة ايشادو قديمة عندك وحطي عليها أكتر من لون وبعد كده طبقيها علي ضوافرك وفي الاخر طبقة المانيكير الشفافة عشان تثبتي اللون وتحافظي عليه.
عشان تسهلي تنشيف شعرك بالسشوار:
قبل ماتبدأي تفردي شعرك بالفرشة الاول نشفيه بايديك بس دقيقيتن ولو ينفع تسندي السشوار علي التسريحة بتعتك زي ماهي عاملة كده في الصورة هيكون اسهل واسهل.. ده هينشف الشعر الاول ويخلي خطوة فردة بالسشوار اسهل.
اعملي المانيكير الفرنش في البيت:
باستعمال استك وشديه علي الجزء اللي قدام من صباعك وحطي درجة اللون الأبيض بتاع الفرنش واستني عليه 10 ثواني وبعدين شيلي الاستك واعملي الصباع اللي بعده.
اعملي ال Missy Bun أو الكحكة المنكوشة الساحرة:
أول خطوة هنعمل ديل حصان عالي, وبعد كده هنعمل في لمة الشعر فتحة في النص بإدينا.. الخطوة اللي بعدها إننا هندخل ديل الحصان فيها وبعد كده نتنيه لورا ونلمه بالبنس..
سيبي باقي الشعر يقع علي كتافك في شكل انسيابي.. إن لمه الكحكة تكون غير محكومة تماما هو ده اللي بيدي للمه الشعر ديه جاذبية وسحر..
تسريحة ولم شعرك مش هتاخد منك أكتر من 30 ثانية:
افرقي شعرك نصين من ورا, اربطيهم مرة واتنين وبعد كده ثبتي بالبنس من فوق وتحت ولو عندك أي اكسسوار للشعر ممكن تحطيه وهيدي شكل شيك قوي وستايل مختلف لشعرك.
زهقانة من تسريحة شعرك؟
جربي إنك تلبسي الباندانا بيتعمل منها أشكال تحفة وبتغير شكلك وتدي شكل جديد ومنتهي الشياكة.. شوفي الطريقة الموضحة خطوة بخطوة للباندانا.
