ايه هي اداة تني الرموش “Lash Curler” ؟ ونصايح في استخدامها
اداة تني الرموش أو ال lash curler من الحاجات اللي في بنات كتير يمكن ميعرفوهاش لانها مش منتشرة اوي في مصر لكن في الفترة الاخيرة بدأت تتعرف وبدأ استخدامها ورغم انها مش منتشرة لكن الاداة دي من الادوات اللي بتدي تاثير حلو جدا على الرموش لانها بتتني الرموش وبتديها طول وبتظهرها وممكن تخليكي تستغني اصلا عن الماسكارا خالص لو انتي مش بتحبي تستخدمي الماسكارا كتير وبتخافي تأثر على رموشك الاداة دي بتحل محل الماسكارا احنا النهاردة هنعرفكم عليها اكتر ونقولكم نصايح لاستخدامها بالطريقة الصحيحة.
تعالوا الاول نعرف مع بعض نصايح لازم نعملها قبل استخدام اداة تني الرموش:
النصايح دي مهمة جدا نعملها قبل ما نستخدم اداة تني الرموش عشان تدينا النتايج المطلوبة.
1- اول حاجة لازم ننضف الرموش كويس من اي اثار مكياج او ماسكارا لان لو في مكياج على الرموش مش هتدينا النتيجة المطلوبة عشان كده لازم تنضفي الاول الرموش ومكياج العين الاول بمزيل مكياج العيون.
2- قبل ما تستخدميها على رموشك سخنيها شوية عشان هتجيب نتيجة احسن معاكي في انواع منها نازلة هي بتسخن نفسها ممكن تشتريها ولو عايزة واحدة ارخص ممكن تشتري واحدة من النوع العادي مش بيسخن نفسه وممكن انتي تسخنيها شوية بالسيشوار.
3- هتحطي الاداة بعد ما تسخنيها على جذور الرموش وتثبتيها على الجذور من 10 ل 30 ثانية.
4- لو زودتي مدة الاداة على الرموش طبعا هتديكي نتيجة احسن وتطول الرموش اكتر.
5- متسحبيش ابدا الاداة على رموشك لان ده ممكن يأذي الرموش بس ثبتيها على الرموش من غير ما تسحبيها.
6- في بنات بتحط الماسكارا الاول وبعدين تستخدم الاداة وده غلط جدا لان ده هيخلي الرموش تمسك وتلزق في بعضها زي ما قولنا نضفي الرموش كويس من المكياج واستخدمي الاداة على رموش نضيفة خالص من الماسكارا.
7- بعد ما تستخدمي الاداة على الرموش سيبي رموشك كام دقيقة وبعدين حطي الماسكارا بتاعتك عادي.
اداة تني الرموش
8- فيه طريقة تانية إنك تستعملي ال “Lash Curler” وإنتي بتحطي الماسكرا تدفيهـا لمده 10 ثواني بس بالسشوار, جربي علي ايدك عشان تتأكدي إنها مش سخنة بزيادة, حطيها علي الرموش وبعدين حطي الماسكرا, هتديكي أحسن واقوي تأثير للماسكرا.
دلوقتي بقى تعالوا نعرف الطريقة الصح لاستخدام اداة تني الرموش:
1- بعد ما نتأكد من ان رموشنا نضيفة زي ما قولنا افتحي اداة تني الرموش وخلي عينيكي مفتوحة وابدأي حطي الرموش اللي فوق بين الاداة.
2- ابدأي بالزاوية الداخلية للعين قربي الاداة قد ما تقدري من الجفن بس من غير ما تضغطي على بشرتك ولا على الرموش ابدأي اتني الرموش بالراحة من غير ضغط على الاداة.
3- سيبي الاداة على الرموش زي ما قولنا من 10 ل30 ثانية ولو لقيتي انك محتاجة تكرري تني الرموش مرة تانية عادي ممكن تعمليها مرة كمان بنفس الطريقة.
