اجمل اماكن الفسح في اسكندرية بالنهار
اسكندرية مدينة السحر والجمال والفسح فيها ممتعة سواء في الصيف او في الشتاء واسكندرية في الشتاء بالذات ليها جمال خاص جدا وبتبقى هادية وجميلة وجوها رائع جيبنالكم النهاردة اجمل اماكن الخروج والفسح في اسكندرية في الصبح لكل اللي حابب يزور اسكندرية ويعرف اماكن الفسح فيها.
ياللا تعالوا نعرف مع بعض اجمل اماكن الفسح في اسكندرية:
1- حديقة الشلالات:
حديقة الشلالات موجودة في شارع السلطان حسين بالحي اللاتيني الحديقة جميلة وكبيرة وفيها مجموعة اشجار كبيرة جدا وفيها شلال صناعي حلو اوي والمكان مناسب جدا لو معاكي اطفال لان فيها اماكن للعب الاطفال, ودخول الحديقة مجاني ومواعديها مفتوحة في اي وقت تقدروا تدخلوها.
2- الحديقة الدولية:
الحديقة الدولية موجودة في اول طريق مصر اسكندرية الصحراوية جنب كارفور مواعيدها من 9 الصبح ل9 بالليل في الصيف وفي الشتا من 9 الصبح للساعة 5 المغرب بس الحديقة كبيرة جدا لو عايزة تقضي يوم مع اصحابك او يوم عائلي تبقى انسب مكان ليكي غير الجناين فيها معارض والعاب مائية تبقى مناسبة في الصيف جدا طبعا وفيها كمان ملاهي وفيها مجموعة مطاعم ونادي رياضي وفيها كمان قاعات للحفلات والمؤتمرات واكتر حاجة بتميز الحديقة الدولية ان فيها نماذج حدائق لاكتر من دولة.
3- افريكانو بارك:
من الاماكن الحلوة جدااا لو عايزة تقضي يوم في مكان مفتوح ومختلف روحي افريكانو بارك وقضي يوم في اجواء افريقية ممتعة وطبيعة حلوة, دي تعتبر اول حديقة حيوان مفتوحة في مصر فيها مجموعة كبيرة من الحيوانات في اماكن مفتوحة وتمشي بالعربية جوه الحديقة تتفرجي عليها وفي اماكن بيبقى فيها حيوانات اليفة تقدري تنزلي وتتعاملي معاها عادي وتتصوري, تقدري كمان تعملي رحلة نهرية بالمركب والحيوانات بتبقى حواليكي تتفرجي عليها وانتي راكبة المركب, وفيها كمان شلالات صناعية جميلة يعني هتقضوا يوم تحفة فيها, القرية مكانها في الكيلو 65 على طريق مصر اسكندرية الصحراوي ومفتوحة من الساعة 9 الصبح للمغرب.
4- متحف الاحياء المائية:
لو عايزة تشوفي حاجة جديدة ومختلفة ممكن تروحي متحف الاحياء المائية موجود جنب قلعة قايتباي المتحف فيه مجموعة من الاسماك والبحريات باشكال غريبة وده من الاماكن اللي السياح بيحبوا يزوره جدا, وفي ساحة كبيرة هناك قدام المتحف ممكن تركبوا خيل وعجل او تركبوا مركب وتقضوا يوم حلو, المتحف مفتوح من الساعة 7 ل11 بالليل في الصيف وفي الشتا مواعيده من 9 الصبح ل3 الضهر.
5- المسرح الروماني والمتحف اليوناني الروماني:
من اهم الاماكن الاثرية المعروفة في اسكندرية موجود في منطقة كوم الدكة وده يعتبر من اهم اثار العصر الروماني المسرح عبارة عن مدرج على شكل حرف U والمدرجات بتاعته من الرخام ومترقمة بحروف وارقام يونانية وبيتعمل على المسرح دايما في الصيف حفلات لفنانين, ده غير المتحف اليوناني الروماني اللي فيه مجموعة كبيرة من الاثار اليونانية الرومانية ومجموعة عملات اثرية نادرة وفي مجموعة كبيرة كمان من التماثيل زي راس يوليوس قيصر وراس الاسكندر الاكبر وغيرها من التماثيل.
6- متحف الاسكندرية القومي:
لو عايزة تقضي يوم تتعرفي فيه على التاريخ وتشوفي اثار حلوة لازم تروحي متحف اسكندرية القومي المتحف فيه اكتر من 1800 قطعة اثرية من العصور القديمة لحد العصر الحديث بتوريكي تاريخ مصر وثقافتها وتطور الفنون والصناعات على مر العصور, ومجموعة من العملات لعصور مختلفة, غير كده في قاعة في المتحف مخصوص للاثار الغارقة بتضم مجموعة كبيرة من التماثيل والاثار اللي طلعوها من تحت المية, المتحف موجود طريق الحرية في محطة الرمل.
7- متحف الفنون الجميلة:
لكل اللي غاويين فن ورسم متحف الفنون الجميلة في مجموعة لوحات جميلة جدا اللي بتصور لنا الحياة الريفية المصرية ده غير اللوحات السيريالية والاعمال الفنية المختلفة من تصوير جرافيك ورسم ونحت, وبيتعمل بشكل منتظم في المتحف معارض لفنانين مصريين واجانب, والمتحف فيه اكتر من صالة عرض ومكتبة فنية ومركز ثقافي بيتعمل فيه حفلات موسيقية وندوات ثقافية يعني المكان فني وثقافي ممتع جدا, والمتحف موجود في منطقة محرم بك.
8- متحف المجوهرات الملكية:
المتحف ده موجود في منطقة فلمنج ومن اجمل المتاحف هتشوفوا فيه مجموعة تحفة من مجوهرات الاسرة المالكة من اول محمد علي لحد الملك فاروق, كل حاجة هناك من الدهب والماس, ده غير مجموعة صور ملونة اطاراتها معمولة بردو من الدهب للخديوي اسماعيل واسرته كلها.
9- متحف كفافيس:
المتحف ده اتعمل تخليد لذكرى الشاعر السكندري اليوناني “كوستيس بتروس فوتياديس كفافيس” المتحف موجود فيه تمثال ليه ومجموعة من كتبه واول طبعة من ديوانه وكتابات بخط ايده وشهادات التقدير اللي حصل عليها وصور شخصية ليه ولاسرته ده غير مجموعة شرايط فيديو لافلام اتعملت عنه, والمتحف موجود في منطقة محطة الرمل.
