احدث لفات الحجاب..ونصايح لاختيار الحجاب اللي يناسبك
دايما كل بنت محجبة بتحب تدور على الجديد في لفات الحجاب وعلى احدث لفات الحجاب وموضة لفات الطرح ودلوقتي بقى في اهتمام كبير جدا بابتكار لفات طرح جديدة من كل خبراء الفاشون والفاشونيستيس كل يوم بيطلعوا لنا لفات جديدة وخيارات كتير للبنت المحجبة تقدر تختار منها النهاردة جمعنالكم مجموعة من لفات الحجاب تقدروا تختاروا منهم اللي يناسبكم, وكمان جيبنالكم شوية نصايح عشان تعرفوا تختاروا الحجاب الصح اللي يناسبكم.
تعالوا نعرف مع بعض الاول شوية نصايح عشان تعرفي تختاري الحجاب اللي يناسبك:
1- الباندانة من الحاجات اللي طالعة موضة بقالها كام سنة لما تحطي باندانة تحت الطرحة استخدمي دايما باندانة قطن عشان هتخلي الطرحة بتاعتك تثبت اكتر ولما تيجي تحطي الطرحة عليها يادوب بس خلي طرف الباندانة باين من تحت الطرحة.
2- لو هتلبسي اكتر من طرحة فوق بعض لازم تختاري الالوان تكون ماشية مع بعضها عشان ميبقاش المنظر مزعج وشكله مش حلو.
3- خلي بالك دايما ان لون الطرحة يكون ماشي مع لون لبسك ولو لابسة مشجر الطرحة تكون سادة والعكس لو لابسة لبس سادة يبقى الطرحة تكون مشجرة او فيها رسومات عشان يكون في تناسق بين الطرحة واللبس والشكل العام يطلع حلو.
4- اختاري دايما الوان الطرحة اللي تمشي مع لون بشرتك دايما اختاري اللون اللي قريب من درجة لون بشرتك لان ده هيكون انسب لون ليكي.
5- نخلي بالنا كمان من خامة او قماش الطرحة لازم يكون ماشي مع خامة وقماش لبسك, ولما تيجي تختاري الطرحة في انواع اقمشة حاولي تبعدي عنها في الطرح زي الاوراجنزا ونوع الاقمشة الناشفة لانه بيكون صعب لفها وهتتعبك وكمان مش بتبقى حلوة في اللفة, انسب الخامات والاقمشة للطرح هي الخامات الناعمة والاقطان اختاري دايما الحرير على قطن او الشيفونات بكل انواعها والتل كمان بالنسبة للسهرات كل دي من الخامات اللي بتطلع حلوة جدا في لفة الطرحة وبتكون عملية وسهلة.
6- حاولي تختاري لفة الحجاب اللي تمشي مع شكل وشك يعني مش تمشي على الموضة وخلاص لان ممكن تكون الموضة دي مش هتليق عليكي اهم حاجة تختاري اللفة الصح اللي تمشي معاكي وفي مجموعة اللفات اللي هنزلها اكيد هتساعدك كتير وهتلاقي شكل وشك في لفات كتير تقدري تختاري منها, بس كمان هنساعدك اكتر ونقولك ممكن ايه اللي يليق على كل وش.
- بالنسبة للوش المدور الاحسن متلبسيش باندانة لانها هتاخد من حجم الوش وتدوره اكتر ومتشديش الطرحة اوي حوالين الوش عشان متظهريش الخدود اكتر خليها مرخية شوية في اللفة.
- الوش المربع بتكون القورة عريضة والفك بارز ابعدي في لفات الطرحة عن اللفات التركي لان هيطلع شكلها مش حلو عليكي ومتلفيش الطرحة تحت الدقن وتسحبيها لورا اوي لان ده هيبين الفك ويبرزه اكتر انسب لفة هي اللفات الناعمة اللي تداري بيها بروز الفك والبسي باندانة تحت الطرحة عشان تاخد شوية من عرض القورة وتدورلك وشك.
- الوش المستطيل او الطويل البسي باندانة تحت الطرحة وجيبيها على قدام شوية عشان تداري جزء من القورة واعملي كذا تانية في الطرحة من الجنب عشان تدور الوش شوية وتعرضه, وابعدي خالص عن انك تعملي طبقات بالطرحة عند القورة او الرقبة لان ده هيطول الوش زيادة.
- بالنسبة للوش اللي على شكل قلب او مثلث مقلوب بتكون القورة عريضة والدقن رفيعة انسب لفة للوش ده هي اللفات التركي لانها هتعمل توازن لتقسيمة الوش وهتبرز ملامحة بشكل حلو.
- الوش البيضاوي ده تقريبا اكتر وش بيليق عليه كل لفات الطرح ومش متقيد بلفة معينة لان طول وعرض الوش بيكونوا متساويين فتقدري تختاري اي لفة هتليق عليكي.
7- لو انتي محجبة جديد حاولي تختاري لفات حجاب بسيطة عشان يطلع الشكل حلو عليكي لحد ما تتمرني كويس على لفات الطرح الصعبة وتقدري تعمليها لانك لو جربتي لفات طرح صعبة في الاول ومعرفتيش تعمليها ومطلعتش حلوة هتحبطي وتتضايقي فاحسن حاجة تبدأي الاول باللفات البسيطة واحدة واحدة على ما تتعلمي اللفات الصعبة.
تعالوا دلوقتي نشوف مع بعض احدث لفات الحجاب:
لفة التربون دي من اللفات اللي طالعة موضة جدا الفترة دي وستايل جديد ومطرقع وتناسب البنات اللي بيحبوا يكونوا دايما مميزين وبيحبوا التجديد في منها استايلات كتير ودلوقتي كمان ابتكروا فيها لفات جديدة ودخلوا فيها اكسسوارات تجنن وبتدي شكل حلو جدا.
من لفات الحجاب اللي نازلة موضة اوي كمان اللفات التركي حلوة جدا وبتدي شكل حلو اوي للوش.
من اللفات الشيك والانيقة جدا اللي طالعة موضة لفة الفيونكة بتدي شكل حلو جدا للطرحة.
في بقى اللفات اللي الى حد ما تقليدية بس داخل فيها فكرة مختلفة عشان تغير شكلها وتدي الطرحة استايل جديد.
