20 معلومة خاطئة عن العناية بالبشرة !

بقلمريهام محمود فيبشرة visibility22780

بشرتنا بتتعرض لمشاكل كتير زي الحبوب او الجفاف او التجاعيد وده لانها بتتعرض دايما لعوامل كتير بتأثر عليها زي الحر والشمس والرطوبة والتراب وده كله بيسبب لنا مشاكل كتير في بشرتنا عشان كده مهم جدا العناية بالبشرة باستمرار بس احيانا واحنا بنعتني ببشرتنا بنعمل حاجات غلط تضرها من غير ما نعرف او بتوصل لنا معلومات غلط عن العناية بالبشرة وهي في الحقيقة بتكون مالهاش اساس من الصحة عشان كده احنا هنقولكم النهاردة ايه اكتر الحاجات الغلط اللي بنعملها وممكن تضربشرتنا اوايه المفاهيم الغلط عن العناية بالبشرة.

مفاهيم غلط عن العناية بالبشرة
مفاهيم غلط عن العناية بالبشرة

 – ايه هي اكتر المفاهيم الغلط عن العناية بالبشرة ؟

1- منتشر جدا معلومة ان تمارين الوجه بتشد عضلات الوش وبتأخر ظهور التجاعيد والمعلومة دي مش صح خالص لان تحريك عضلات الوش كتير بيزود التجاعيد والخطوط في الوش اكتر لان الوش هو الجزء الوحيد من الجسم اللي العضلات فيه مرتبطة بشكل مباشر بالجلد واي حركة لعضلات الوش بتأثر على الجلد على طول. طبعا فيه حالات تانية بنضطر نعمل فيها تمارين الوجه لما نكون عايزين نعالج الأماكن التخينة زي منطقة الرقبة “اللغد” أو نتخن أو نرفع الخدود… وقتها ممكن نعمل من التمارين ديه بس منكترش منها..

 تمارين الوجه
تمارين الوجه

2- معلومة ان فيتامين E بيعالج ندبات الوجه لحد دلوقتي مافيش اي دراسات تثبت ان فيتامين E بيعالج الندبات ولكن هو مفيد في انه بيساعد على بناء الجلد لان فيه مواد مضادة للاكسدة.

3- معلومة ان مسامات البشرة بتتفتح وتتقفل المعلومة دي مش صح لان مسامات البشرة مفتوحة على طول لان هي اللي بتخلي البشرة تتنفس وبتغذي الجلد بالزيوت الطبيعية اللي بتفرزها البشرة لكن احيانا في بعض الحالات بتكون المسامات واسعة اكتر من حجمها الطبيعي بسبب تراكم الدهون زيادة عن اللزوم او لاسباب وراثية.

4- معلومة ان عامل الحماية من الشمس اللي هو الــSPF كل ما كان اكتر في الكريم الواقي من الشمس ده هيحمينا من الشمس اكتر وده مش صحيح لان عامل الحماية الزيادة مبيعملش فرق كبير في حماية بشرتنا من الشمس يعني الكريم اللي فيه عامل حماية بنسبة 30% مبيزدش مفعولة عن اللي فيه عامل حماية 15% الا بــ 2% بس وعامل الحماية اللي بنسبة 40% مبيزدش مفعولة عن عامل حماية 30% الا ب 1% بس, ده غير انه لازم تحطي واقي الشمس طول ما انتي بره البيت كل ساعة ونص تقريبا لان مفعوله بيروح بعد الوقت ده فلازم ترجعي تحطيه تاني, وكمان مش صح اننا لما بنكون في مكان ضل يعني مش محتاجين واقي من الشمس الواقي مهم حتى في الضل لان تأثير الاشعة فوق البنفسجية بيكون موجود في الضل كمان يمكن بيكون اضعف بس ولكن بيأثر على البشرة بردوا يعني لازم تحطي الواقي في الشمس وفي الضل.

5- الكريمات اللي فيها كولاجين بتعوض البشرة عن الكولاجين الطبيعي المعلومة دي غير اكيدة لانه مافيش دراسات لحد دلوقتي اثبتت ده ولكن اللي ممكن يعوض الكولاجين في البشرة هي حقن الكولاجين دي اللي تعتبر اكتر فعالية على الجلد من الكريمات.

6- معلومة ان الشوكولاتة والاكل المقلي بيسبب حب الشباب لحد دلوقتي مافيش دراسات اثبتت علاقة الاكل بالحبوب او ان الاكل ممكن يكون سبب في ظهور الحبوب ولكن سبب الحبوب الاساسي هي بتكون لغبطة في هرمونات الجسم او بسبب البكتريا والاوساخ الموجودة في الجو وبسبب القلق والتوتر والاكتئاب, الحالة الوحيدة اللي ممكن تسبب حبوب من الاكل هو انك تكوني عندك حساسية لنوع معين من الاكل وده بيعمل التهابات في الجلد وبيسبب ظهور الحبوب.

7- استخدام منتجات للعناية بالبشرة اكتر ده هيخلي بشرتنا احسن الموضوع ده مش صح لان الموضوع مش بالكمية ولكن بنوع المنتج اللي انتي بتستخدمية المهم انه يكون المنتج الصح اللي يمشي مع نوع بشرتك وبالعكس الاستخدام الزيادة عن اللزوم لمنتجات العناية بالبشرة ممكن يجي بنتيجة عكسية ويهيج البشرة ويخليها تلتهب عشان كده الاهم النوع مش الكمية وتأكدي ان الكمية الصغيرة كافية جدا لبشرتك.

8- دايما في مفهوم عندنا كده ان البشرة كل ما تكون جافة من الدهون مش هيطلع فيها حبوب وده مش صح لان جفاف البشرة زيادة عن اللزوم بيتسبب في ظهور الحبوب لان البشرة الجافة بتدي اشارة للخلايا الدهنية عشان تفرز دهون اكتر وده بيخلي الحبوب تظهر عشان كده لازم نرطبها دايما بالكريمات المرطبة.

9- كمان من الحاجات الغلط جدا ان البشرة الدهنية عشان بتفرز دهون تبقى مش محتاجة ترطيب وده مش صح بردوا حتى البشرة الدهنية محتاجة مرطب استخدمي لها مرطب خفيف يمشي مع البشرة الدهنية, واي نوع بشرة محتاجة المرطب لانه بيحافظ على توازن البشرة.

مرطب البشرة الدهنية
مرطب البشرة الدهنية

10- مضادات الاكسدة بتزيل التجاعيد المعلومة دي مش صح هي بتحمي الجلد من الاضرار ولكن مش بتزيل التجاعيد او بتمنعها.

11- دايما في اعلانات منتجات العناية بالبشرة بيقولوا ان المنتج ممكن يعالج مشكلة بشرتك في وقت قصير ده لا يتعدى اكتر من انه دعايا لكن هو مش صحيح لان الجلد بيحتاج فترة عشان يتعالج من اي مشكلة وتشوفي نتايج ملحوظة مش اقل من شهر او شهر ونص عشان تبدأي تشوفي نتايج لاي منتج بشرة.

12- دايما بيتقال ان خلايا الجلد بتتجدد في فترة بالليل واحنا نايمين لكن ده مش صحيح لان البشرة بتجدد على طول على مدار اليوم مش بالليل بس, ولكن اللي ممكن يأثر على البشرة بس هو ان احنا منامش عدد ساعات كفاية ده بيسبب اجهاد البشرة وبيقلل انتاج الكولاجين في البشرة عشان كده لازم ننام عدد ساعات كافية.

13- معلومة ان منتجات البشرة بتقعد 3 سنين ده مش صح لان منتجات البشرة غالبا اقصى فترة صلاحية ليها هي سنة واحدة بس من اول ما تفتحيها وتبدأي استخدامها لان مكوناتها والمواد الحافظة اللي فيها مش بتقعد اكتر من سنة.

14- معلومة ان تقشير وصنفرة البشرة مفيد وان كل ما قشرنا بشرتنا هنخليها صحية اكتر هو صحيح مفيد ولكن التقشير زيادة عن اللزوم بيجيب نتيجة عكسية وبيهيج البشرة عشان كده لازم منقشرش بشرتنا زيادة ونستخدم دايما مرطب للبشرة بعد التقشير مناسب لنوع بشرتنا لان زي ماقولنا لازم الترطيب لاي نوع بشرة.

 تقشير وصنفرة البشرة
تقشير وصنفرة البشرة

15- فيتامين A بيسبب ترقق الجلد وده غير صحيح بالعكس الدراسات اثبتت ان نقص فيتامين A هو اللي ممكن يسبب ترقق الجلد لانه بيساعد على تجديد البشرة وبيخلق خلايا جديدة صحية لبشرتنا.

16- معلومة انه لازم تستخدمي مزيل المكياج مش صح او مش لازم تستخدمي مزيل المكياج الا في حالة واحدة انك تكوني حاطة مكياج ضد الماية ساعتها هيكون استخدام مزيل المكياج ضروري لكن لو حاطة مكياج عادي هتشيليه بس بغسول البشرة هيكون كافي جدا.

17- معلومة ان التونر ضروري لاي بشرة التونر ضروري اكتر للبشرة الدهنية اللي بتفرز دهون كتير وبتحتاج تنضيف عميق اما بالنسبة للبشرة العادية والجافة بتكون مش محتاجة التونر تكتفي بس بغسول البشرة المناسب لنوع بشرتك.

18- معلومة ان تفريغ حب الشباب او عصره من الدهون اللي فيه هيخليه يخف بشكل اسرع لكن الموضوع ده غلط جدا ولازم تتجنبيه خالص لان عصر الحبوب هيخليها تلتهب زيادة وهيخلي الحالة تسوء وهتسيب بقع وعلامات على بشرتك, افضل حاجة انك تجيبي فوطة مبلولة بماية دافية وتحطيها على مكان الحباية لمدة 3 دقايق وتكرري الموضوع  ده تلات مرات في اليوم الماية الدافية هتطري الجلد حوالين الحباية وهتطلع لوحدها من غير ما تسيب اثر.

 تفريغ حب الشباب او عصره من الدهون
تفريغ حب الشباب او عصره من الدهون

19- معلومة ان معجون السنان بيخفف الحبوب وتحطيه علي وشك كله ده مش صح لان المعجون ممكن يخلي الجلد يلتهب ويسبب له حروق لان داخل فيه مكونات ممكن تهيج البشرة. ولو هتستعمليه يبقي علي مكان الحبايه بظبط لا يمين سنه ولا شمال سنه.

20- زبدة الكاكاو بتمنع علامات تمدد الجلد للحامل ده مش صح زبدة الكاكاو بترطب الجلد بس ولكن مش بتمنع علامات تمدد الجلد.