سمعتى عن ” الشامبو الجاف “؟
” الشامبو الجاف ” هو الجديد فى عالم العناية بالشعر، وفى الفترة اللى فاتت انتشر الكلام عنه بصورة كبيرة جدا و ان كان مفيد ولا ولا ، و ازاى نقدر نستخدمه وهل ممكن نلاقيه بسهولة ولا ولا ، فى المقال ده هتلاقى ملف كامل عن ” الشامبو الجاف ” ايه هو و ازى تقدرى تستخدميه و كمان مميزاته و فوائده ..
– ايه هو الشامبو الجاف ؟
الشامبو الجاف هو مكون سحرى بالنسبة لشعرك ، لانه بيقدر يوفر النظافة المطلوبة لشعرك من غير ما تضطرى تعرضى شعرك للمياه ، هو عبارة عن مادة جافة فى صورة بودرة او سبراى بتقدرى تستخدميه كبديل للشامبو العادى و من غير ما تحتاجى تبللى شعرك بالمياه و بيديكى النتيجة المطلوبة بالنسبة لنظافة الشعر وكمان بقى متوفر فى الصيدليات و تقدرى تحصلى عليه بسهولة ، فلو عندك كلية او شغل بدرى و مفيش وقت علشان تلحقى تغسلى شعرك ” الشامبو الجاف” بيعتبر افضل حل ليكى فى الوقت ده .. شوفي من هنا طريقة عمل الشامبو الجاف في البيت بنفسك.
– مميزات الشامبو الجاف :
- يتميز بأنه يقدر يمتص الزيوت الزائدة و الاتربة من فروة الرأس .
- تقدرى تستخدميه كبديل للشامبو العادى من غير ما تحتاجى تعرضى شعرك للمياة .
- مثالى فى حالات الطوارئ ، لو محتاجة تحصلى على شع نظيف بسرعة قبل سفر او خروجة و مش عايزة تعرضى شعرك للمياة خصوصا لو لسه شعرك كان مفرود بمكواه او تم تجفيفه بسيشوار الشعر .
- استخدامه آمن جدا على الشعر المعالج بالكيرياتين .
– اعتبارات ضرورية عند استخدام ” الشامبو الجاف ” :
- ماتستخدميش الشامبو الجاف و شعرك مبلل بالمياه ، لان تأثيره هيبقى مختلف و يمكن يديكى نتائج غير مرضية ، لكن ممكن يستخدم مع الشعر الجاف ” الغير مبلل بالماء ” بس .
- الشامبو ده مش بديل عن الشامبو العادى ، لأنه بعد استخدامك ليه 3 مرات متتاليين ضرورى جدا انك تغسلى شعرك كويس أوى باستخدام الشامبو العادى .
- لو شعرك من النوع الدهنى ، تأكدى من وصول بودرة الشامبو الجاف للجذور و استخدمى فرشاة الشعر العادية لتوزيعه .
- لو بتستخدمى الشامبو الجاف فى صورة السبراى ، اتأكدى انك تبعدى زجاجة الاسبراى عن جذور شعرك بمسافة 10 سنتيمتر علشان تتجنبى انه السبراى يتراكم على شعرك او على فروة الرأس .
- لو شعرك اتحول لونه الى الابيض بعد استخدام الشامبو الجاف متقلقيش ، لانه بيحتاج دقائق قليلة لحد ما يقوم بامتصاص الاتربة و الزيوت الزائدة المتراكمة على الشعر ، فى الحالة دى قومى بتدليك فروة رأسك بنفس طريقة التدليك اللى بتسخدميها فى حالة غسيل الشعر بالشامبو العادى و هتلاحظى اختفاء اللون تدريجيا و عودة شعرك للونه الطبيعى .
- ضرورى جدا انك تقومى بتمشيط شعرك بعد الانتهاء من غسيله بالشامبو، و ممكن تستخدمى السيشوار علشان تقدرى تتخلصى من كميات الشامبو الزيادة فى شعرك بسهولة .