5 ماسكات سحرية من القهوة لجمال بشرتك

بقلمريهام محمود فيبشرة visibility396378

القهوة من الحاجات اللي في كتير مننا يومهم مش بيبدأ ولا مزاجهم بيتظبط غير بفنجان قهوة يظبط المود ويجدد نشاطنا لكن المفاجأة بقى ان القهوة مش بتعدل مزاجنا وبتنعشنا من بره بس لكن بتنعش بشرتنا كمان لانها مفيدة جدا جدا للبشرة والجلد لان فيها مواد مضادة للاكسدة والمواد دي مفيدة جدا لتجديد الجلد وعلاج اي مشاكل فيه زي الانتفاخات اللي تحت العين ومقشر رائع للجلد لانها بتدخل في المسام وتنضفها من جوه وبتعالج البقع وفوق ده كله انها مناسبة لكل انواع البشرة.

ماسكات من القهوة للبشرة
ماسكات من القهوة للبشرة

– ياللا بقى نعرف مع بعض افضل 5 ماسكات للبشرة من القهوة:

1- ماسك القهوة والعسل:

الماسك ده رائع للبشرة بيرطبها ويخليها منورة وجميلة.

المكونات:

  • معلقة كبيرة قهوة.
  • معلقة كبيرة عسل.

طريقة التحضير والاستخدام:

هنجيب طبق صغير هنحط فيه القهوة والعسل ونخلطهم مع بعض كويس جدا بعد كده هتفردي الخليط على بشرتك وتعملي مساج للبشرة بانك تدلكي بشرتك بالراحة في حركات دائرية وبعدين هتسيبيه على وشك 20 دقيقة لحد ما ينشف وبعدين تغسلي وشك بالميه.

2- ماسك القهوة والشوفان:

الماسك ده مقشر ومرطب للبشرة.

المكونات:

  • معلقة كبيرة قهوة.
  • معلقة كبيرة شوفان مطحون.
  • معلقة كبيرة زبادي.

طريقة التحضير والاستخدام:

هنخلط القهوة والزبادي والشوفان مع بعض كويس لحد ما تتكون عندنا عجينة مش سايلة اوي ومش سميكة اوي يعني يكون سمكها مناسب عشان تفرديها على وشك بسهولة بعدين هتفردي الخليط على وشك ورقبتك وتسيبيه نص ساعة وبعدين هتغسلي وشك بمية دافية.

3- ماسك القهوة والكاكاو:

الماسك ده بيعالج اي اضرار او تلف في الجلد لان القهوة والكاكاو فيهم مواد مضادة للاكسدة بتجدد الجلد.

المكونات:

  • معلقة كبيرة قهوة.
  • معلقة كبيرة كاكاو.
  • شوية لبن للعجن.

طريقة التحضير والاستخدام:

حطي القهوة والكاكاو مع بعض وحطي عليهم اللبن شوية شوية لحد ما تبقى عندك عجينة سمكها كويس متكونش سايلة اوي بعد كده حطي الخليط على وشك ورقبتك وسيبيه نص ساعة وبعدين تغسلي وشك بالمية.

4- ماسك القهوة وزيت الزيتون:

الماسك ده مفيد جدا للبشرة الجافة بشكل خاص لانه بيرطب الجلد جدا.

المكونات:

  • معلقة كبيرة قهوة.
  • معلقة كبيرة زيت زيتون.

طريقة التحضير والاستخدام:

هنخلط القهوة وزيت الزيتون كويس ونحطه على الوش والرقبة ومتسيبهوش ينشف اوي سيبيه بس 3 دقايق مش اكتر وبعدين اغسلي وشك بالمية وهتحسي بالفرق من اول استخدام للماسك ده هتلاقي بشرتك ناعمة ومنورة.

5- ماسك القهوة والليمون:

الماسك ده مفيد جدا للي بشرتهم دهنية لان فيه ليمون وبينضف المسام من جوه.

المكونات:

  • معلقة كبيرة قهوة.
  • شوية عصير ليمون على قد ما تعجني القهوة بيها.

طريقة التحضير والاستخدام:

اعجني القهوة مع عصير الليمون لحد ما يبقى عند خليط مناسب تقدري تفرديه على وشك حطيه على الوش والرقبة وسيبيه نص ساعة وبعدين اغسليه بالمية.

وبعد ما تعملي الماسكات هتلاقي بشرتك احلى بكتير ودي الفوايد اللي هتعملها الماسكات لبشرتك:

القهوة بتزود الدورة الدموية في البشرة وده هيخلي بشرتنا صحية ومنورة.

المواد المضادة للاكسدة اللي موجودة في القهوة بتنضف البشرة والمسام من جوه.

القهوة بتحمي بشرتك كمان من الاشعة فوق البنفسجية وده هيحمي جلدك من التلف.

وبكده هتخلي بشرتك حلوة وصحية ومنورة بحاجة بسيطة وطبيعية من مطبخك ومش مكلفة بدل المنتجات الغالية واللي ممكن كمان تكون مضرة للبشرة.