إزاي تتعاملي مع مكياجك المكسور أو الناشف؟
أهلا يا اغلي بنات.. مشكلة كبيرة ورخمة بتقابلنا كلنا هي إن المكياج بتعنا ممكن يتكسر في الشنطة واحنا بره أو يتكسر جوه البيت وممكن كمان لو سبنا ايلينر جيل أو مانيكير فترة طويلة من غير استخدام ينشف.. وقتها معظم البنات بتضطر ترمي المكياج وتشتري غيره, بس احنا النهرده جيبنلكم أفكار جامدة جدا هتساعدك إنك توفري فلوسك.. تعالي اعرفي معانا إزاي تصلحي المكياج المكسور وترجعيه كأنة جديد..
تصليح الروج المكسور
لو الروج بتاعك اتكسر ممكن تاخدي الجزء المكسور منه و حطيه في علبة محكمة الغلق واستعمليه بعد كده علي شفايفك بفرشة الروج.
وممكن فكرة تانية, بولاعة سيحي الجزء المكسور من صباع الروج وثبيته بأديكي كويس واضغطي عليه.. سيبيه ينشف 10 دقايق وهتلاقيه رجع كأنه جديد.
إزاي تصلحي الايشادو أو البودر المكسور
الحركة اللي بتحصل معانا كلنا, إن علبة الايشادو أو البودر بتعتنا تتكسر ويا سلام لو كانت لسه جديدة, بتضايق قوي وقتها.. بس ولا يهمك شوفي معانا الطريقة ديه عشان ترجعي العلبة المكسورة جديدة. هنجيب ازازة كحول من الصيدلية, وهنحط كام نقطة منها علي البودر المكسورة وبعدين نخلطها وندوس عليها ونثبتها في العلبة بتعتها. سيبيها تنشف وهتلاقي رجعت جديدة زي الاول!
أو ممكن تحوليه لاحمر شفايف كمان .. اخلطي شوية منه في معلقه مع فازلين أو مرهم ترطيب الشفايف بفرشة وبعد كده استعمليه علي شفايفك كروج!
ممكن كمان تعملي منه مانيكير بنفس اللون .. اخلطي شوية منه في ازازة مانيكير شفاف وبعد كده رجيها كويس وكده إنتي عملتي مانيكير باللون المفضل ليكي !
تعملي ايه مع قلم الكحل الناشف؟
لو قلم الكحل بتاعك نشف وبيوجعلك عنيكي وإنتي بترسميها, بدل ماترميه جربي تسيحي السن بتاعه على ولاعة, هتلاقيه بقي تحفه وبيرسم العين كأنه جيل أو ايلينر سائل.
طولي عمر الماسكرا الناشفة
عشان تطولي عمر الماسكرا الناشفة جربي تحطي فيها كام نقطة من قطرة العين Visine أو أي قطرة تانية من اللي بتعمل دموع صناعية.
طريقة تانية عشان تنقذي بيها الماسكرا وهي إنك تحطيها في كوباية ماية سخنة عشان تسيح وتعرفي تستفادي بكل نقطة فيها.
تعملي ايه لو الايلينر الجل نشف؟
ممكن تجربى انك تحطيها فى كيس بلاستيك و حطيه جوه كوبايه مايه مغليه لحد لما تبرد , هتلاقيه فك ورجع كأنة جديد.
طريقة تانية, جربي إنك تحطي فيها كام نقطة من زيت البيبي وقلبيها كويس بدبوس هيرجع طري زي الاول.
تعملي ايه لو المانيكير كلكع؟
المانيكير لو كلكع, جربي إنك تحتيه في ماية سخنة بدل ماتحطي فيه الاسيتون.. أنواع كيتير من المانيكير بتبوظ لما نحط الاسيتون عليها.
