طريقة المكياج البرونزي خطوة بخطوة

المكياج البرونزي من اساليب المكياج اللي طالعة موضة بقالها فترة وبيدي طلة حلوة للوش وطبيعية في نفس الوقت ويعتبر المكياج البرونزي من اكتر اساليب المكياج اللي تنفع لخروجاتنا اليومية بالنهار مع الاستايل الكاجوال وفي نفس الوقت تنفع للخروج بالليل وللسهرات باضافة لمسات بسيطة للمكياج النهاري البرونزي نقدر نحوله لمكياج سهرة, النهاردة هنتعلم مع بعض بالخطوات ازاي نعمل المكياج البرونزي.

• ياللا نعرف مع بعض خطوة بخطوة طريقة المكياج البرونزي:

1- الخطوة الاولى:

هنحط ايشادو على العين بلون نحاسي على الجفن المتحرك ونفرد اللون على الجفن كله من اول خط الرموش لحد فوق وبعدين نمزج معاه ايشادو بني بلون اغمق وندمجهم مع بعض كويس بالفرشة.

2- الخطوة التانية:

بالايشادو البني الغامق هنعمل خط على الرموش من فوق ومن تحت ونعمله سموكي بسيط يعني نبدأ بالفرشة نفرد الايشادو بعيد شوية عن خط الرموش نعمل خط تخين شوية حاجة بسيطة جدا, وبعد كده نرسم خط ايلاينر رفيع على خط الرموش اللي فوق وبعد كده هنحط الماسكارا السودا على الرموش من فوق ومن تحت.

3- الخطوة التالتة:

هنحط كريم اساس برونزي اغمق بدرجتين من لون البشرة عشان نوحد لون بشرتنا ونداري اي عيوب ونحط بعدها الكونسيلر لو عندك هالات سودا ولو معندكيش ممكن تستنغي عنه وبعدين هنحط البودرة البرونزية بطريقة الكونتور هنركز على منطقة عضمة تحت الخد ومنطقة الجبهة عند منبت الشعر عشان نبرز جمال الوش اكتر.

4- الخطوة الرابعة:

هنستخدم بلاشر برونزي ونبدأ نحطة على عضمة الخد وندمج البلاشر كويس بالفرشة مع البودرة البرونزية على الوش عشان يطلع شكلها حلو وطبيعي.

5- الخطوة الخامسة:

في الخطوة الاخيرة هنحط روج بلون نحاسي ناعم او ممكن نكتفي بملمع شفايف بلون نحاسي لو عايزة لوك طبيعي اكتر.

كده نبقى خلصنا خطوات المكياج البرونزي الناعم اللي ينفع للخروجات بالنهار.

• طيب ازاي نحوله لسهرة ؟

• ممكن بلمسات بسيطة جدا تحوليه لمكياج سهرة هتطبقي نفس الخطوات اللي فاتت بس كل اللي هتعمليه لما تيجي تحطي الايشادو كثفيه على عنيكي وخليه سموكي اكتر وممكن تدخلي معاه ايشادو اسود من اول نص الجفن لحد الزاوية الخارجية بتاعة العين وندمجه كويس.
• وبالنسبة للبلاشر استخدمي بلاشر برونزي بيلمع عشان تبرزي شكل خدودك اكتر.
• والروج بدل اللون الفاتح او الالوان النيود استخدمي الوان زي الفوشيا او الاحمر اللي بيلمع هتغيرلك الطلة خالص وهتخليها مناسبة جدا للسهرات.