اهم 26 اكلة هتساعدك في تخسيس الوزن !

تخسيس الوزن مشكلة بتقابل بنات كتير جدا ومش بيعرفوا ايه الطرق الصح او ايه نوعيات الاكل اللي المفروض ياكلوها  عشان تساعدهم انهم يخسوا وفي كتير بيفتكروا انك تخسي يعني متاكليش وده طبعا غلط جدا لانك مش بتمنعي نفسك من الاكل بس انتي بتمنعي الفيتامينات عن جسمك كمان .. والمشكلة الاكبر كمان مش بتكون في زيادة الوزن بس لا الزيادة دي بتسبب امراض كتير زي القلب والسكر والضغط وارتفاع نسبة الكوليسترول في الدم عشان كده لازم نحاول ناكل اكلات صحية ويكون فيها سعرات حرارية قليلة هتخلينا نخس ونحافظ على صحتنا في نفس الوقت, عشان كده احنا النهاردة هنساعدكم في ده وجيبنالكم اهم الاكلات الصحية اللي هتساعدك لتخسيس وزنك يعني هتاكلي وتخسي في نفس الوقت :).

• هنبدأ مع بعض بقائمة بأهم الفواكة اللي هتساعدك في تخسيس الوزن:

الفاكهة طبعا ضرورية جدا لصحتنا ولكن فايدتها كمان بتزيد لانها هتساعدك انك تخسي بشكل فعال جدا وفي دراسات كتير اثبتت ان الناس اللي بياكلوا فاكهة اكتر بيتعرضوا اقل لزيادة الوزن لان الفاكهة بتسيطر على السعرات الحرارية وبتخليكي متاكليش كتير وفي نفس الوقت بتديكي الفيتامينات اللي محتاجها جسمك ومصدر هايل للطاقة وبتحافظ على رطوبة الجسم لانها بتوفرلك كمية كبيرة من المية  ومش بس كده كمان بتحسن عملية الهضم والدورة الدموية وبتنضف الجسم من السموم وده بينعكس كمان على البشرة وبيخليها حلوة ومنورة, عشان كده الفاكهة من الحاجات المهمة جدا اللي هتساعدك تخسي وفي نفس الوقت مش هتأثر على صحتك لكن بالعكس هتخلي صحتك احسن بكتير.

• طيب ايه هي الفواكة اللي انتي محتاجاها عشان تخسي؟

• الافوكادو:

في ناس كتير لما تيجي تعمل رجيم بتمشي على نظام رجيم الكربوهيدرات اللي بيكون معتمد على الاكلات اللي فيها كربوهيدرات بس ومافيهاش دهون خالص وده ممكن يجي بنتيجة عكسية ويزود الوزن مش يقللوا عشان كده الافوكادو مفيدة جدا لتخسيس الوزن لان فيها نسبة دهون حوالي 20 جرام دهون ولكن الدهون دي صحية اسمها احماض دهنية احادية غير مشبعة ودي دهون مش بتزود الوزن بالعكس دي بتزود الهرمونات اللي بتساعدك انك تفقدي وزن, وبتحول الدهون لطاقة وده بيمنع ارتفاع نسبة السكر في الدم وكمان الافوكادو غنية جدا فيتامين E, وعشان الافوكادو يجيب معاكي نتيجة سريعة لتخسيس وزنك ممكن تعملي منه سلطة وتحطي معاه فلفل هالبينو” واللي ميعرفش فلفل الهالبينو ده نوع من الفلفل المكسيكي الحراق وطبعا معروف ان الحاجات الحراقة بتحرق الدهون وهتلاقوه موجود في السوبر ماركت” عشان كده الهالبينو مع الافوكادو بيحرق الدهون بشكل اسرع بكتير جدا.

• التوت والفراولة:

التوت والفراولة ليهم نفس الفايدة والتأثير تقريبا هما من الفواكة اللي بتساعد جدا لتخسيس الوزن لان فيهم نسبة سعرات حرارية قليلة جدا وبيساعدوا على حرق الدهون غير كده انهم بيخلوا المعدة تشتغل بشكل احسن وبيطردوا السموم من الجسم لان فيهم كمية كبيرة جدا من المواد المضادة للاكسدة, والتوت مفيد جدا كمان للقلب لانه بيقضي على الكوليسترول السيء في الجسم, ولكل اللي بيشتكو من دهون البطن بشكل خاص التوت هيفيدك جدا لان دراسات كتير اثبتت ان التوت بيقلل الدهون في البطن , ده غير انه فيه عناصر كتير مفيدة للجسم زي حمض الفوليك والبوتاسيوم وفيتامين C وده من الفيتامينات اللي بتساعد جدا في رفع نسبة الحرق في الجسم.

• التفاح:

طبعا مافيش حد مش بيحب التفاح دلوقتي هتحبيه اكتر كمان لما تعرفي انه هيخليكي تخسي لان التفاح فيه سعرات حرارية قليلة جدا كمان فيه كمية كبيرة من الالياف اسمها الياف البكتين والالياف دي بتخلي الجسم ميمتصش الدهون وبتسد النفس عن الاكل لفترة طويلة, جربي  تاكلي تفاحة كل يوم قبل الاكل هيخليكي تحسي انك شبعانة وهتاكلي كمية اكل اقل بكتير من اكلتك اللي انتي متعودة عليها, وكمان لو حسيتي بجوع في اي وقت بدل ما تاكلي اكل يزود وزنك اكتفي بس بتفاحة هتشبعك وفي نفس الوقت مش هتزود وزنك.

• الشمام والبطيخ:

الفواكة دي فيها نسة مية كبيرة جدا وده بيساعد انه يطرد السموم من الجسم وبيحسن عملية الهضم جدا وتخسيس الوزن بشكل صحي, ده غير ان البطيخ فيه مادة اسمها الليكوبين والمادة دي بتحمي من السرطان وامراض القلب.

• الفواكة المجففة:

الفواكة المجففة زي الزبيب والخوخ والمشمش والتمر دول بقى لو حطتيهم مع فواكة طازة وعملتي منهم سلطة فواكة لذيذة كده ده بيخسس الوزن جدا, وغير كده انها فيتامينات ومعادن كتير مفيدة للجسم بتقوي مناعة الجسم وهتحميكي من الفيروسات والانفلونزا.

• جوز الهند:

فاكهة لذيذة وطعمها حلو وكمان بتخسس لانك لما هتاكليها هتحسسك بالشبع لفترة طويلة وهتحسي ان معدتك مليانة ومش عايزة تاكلي, ده غير انها مفيدة جدا للي عندهم الغدة الدرقية وكلنا عارفين ان الغدة دي لو فيها مشاكل بتسبب زيادة الوزن فجوز الهند بيخلي الغدة الدرقية تشتغل بشكل كويس وتظبطها.

• الليمون:

الليمون من الفاكهة اللي بتحافظ على صحة الكبد وده هيخلي الجسم يحرق الدهون بشكل كويس, لو شربتي كل يوم الصبح كوباية ليمون ده هيساعدك جدا في تخسيس وزنك لانه بيمنع تراكم الدهون في الجسم.

• الجريب فروت:

من الفواكة اللي بتخسس الوزن جدا لان فيه نسبة مية كبيرة فلما بتاكليه بيملى معدتك ويخليكي تحسي انك شبعانة ومش عايزة تاكلي وفي مواد مضادة للاكسدة ودي بتساعد في تخسيس الوزن وبتظبط نسبة الانسولين المسئول عن السكر في الجسم, ده غير انه بياخد وقت في الهضم وده بيخليه ياخد من طاقة الجسم ويحرق سعرات حرارية اكتر, ممكن تاكليه كل يوم بدل وجبة العشا لو استمريتي عليه كل يوم ومن غير ما تغيري طريقة اكلك خالص ده لوحده هيخليكي تخسي 20 كيلو تقريبا في 13 اسبوع.

• الطماطم:

كلنا بناكل الطماطم كل يوم في اكلنا او في السلطة لما هتعرفي فوايدها في التخسيس هتاكلي منها اكتر لان الطماطم فيها فيتامين C ومادة الليكوبين ودي بتخلي عملية الحرق اسرع بكتير, وفيها كمان المواد المضادة للاكسدة اللي اتكلمنا عليها اكتر من مره في الفواكة اللي فاتت انها بتساعد على التخسيس, ده غير انها مفيدة جدا للقلب والاوعية الدموية, لو في اي وقت حسيتي بالجوع  بين الوجبات ممكن تاكلي الطماطم بدل الوجبة اللي ممكن تتخنك تقطعي الطماطم في طبق وعليها كام نقطة زيت زيتون وكام نقطة خل وتعملي طبق لذيذوخفيف ويخسس في نفس الوقت.

بس حابة اوضح نقطة عارفة حد هيجي يسأل ويقول ايه ده هي الطماطم من الفواكة J ؟ هجاوب واقول ايوه هي بتتصنف فاكهة مش خضار رغم اننا بنستعملها في الطبيخ بس هي من الناحية العلمية فاكهة وده كان للتوضيح بس للبنوتات اللي ممكن تسأل السؤال ده J.

• الموز:

الموز مليان الياف بتسد النفس عن الاكل وتحسسك انك شبعانة وفيه نشا بيخلي الجسم ميمتصش الكربوهيدرات وده بيخلي الجسم يحرق الدهون بشكل اكبر, ده غير ان الموز من اكتر الحاجات اللي فيها مادة البوتاسيوم والمادة دي بتبني العضلات وده بيخلي الجسم يحرق دهون اكتر.

• الرمان:

الرمان كمان من الفواكة اللي فيه مواد مضادة للاكسدة وبينضف الجسم من السموم وده بيخلي الجسم يشتغل بشكل احسن ويزود عملية حرق الدهون وبيسد النفس عن الاكل, ومفيد جدا للقلب لانه بيمنع تراكم الدهون على شرايين القلب, ممكن كل يوم على الفطار تشربي كوباية عصير رمان, او تعملي طبق شوفان لذيذ كده وتحطي عليه رمان وتاكليه في الفطار.

• البرتقان:

احنا دلوقتي في الشتا وموسم البرتقان وموجود كتير في السوق البرتقان معروف انه في كمية كبيرة من فيتامين C وده زي ما قولنا بيساعد في عملية حرق الدهون عشان كده فرصتكوابقى والبرتقان موجود كتروا من اكله الشتا ده.

• نيجي دلوقتي لانواع الخضار اللي بتخسس الوزن:

من الحاجات اللي بتخلي في انواع من الخضار فعالة في تخسيس الوزن انه بيكون فيها نسبة سعرات حرارية قليلة ونسبة الياف عالية وده بيخليكي تحسي بالشبع بسرعة, ده غير انواع الخضروات اللي فيها نسبة مية كبيرة وبتملى المعدة وتخليكي تحسي انك مش عايزة تاكلي فاحنا جمعنالكم النهاردة انواع الخضار اللي هتساعدك انك تخسي بشكل اسرع.

• الكرفس:

ده من الخضروات اللي فيها نسبة مية كبيرة وسعرات حرارية قليلة ونسبة الياف كتير اللي هي بتكون مسئولة عن هرمونات الشبع في الجسم عشان كده الكرفس من انواع الخضار الفعالة جدا في تخسيس الوزن.

• الخيار:

من احسن انواع الخضار اللي بتساعد على التخسيس لان فيه بردو نسبة مية كتير بتملى المعدة وتحسسك انك شبعتي ومش عايزة تاكلي غير انه فيه سعرات حرارية قليلة, وغير انه بيخسس اكله كمان مفيد للبشرة جدا وبيخلي شكلها صحي وبينعم ويطري الجلد وبيعالج الهالات السودا يعني هتخسي وتحافظي على جمالك في نفس الوقت ممكن تشربيه عصير او تاكليه مع السلطة او تاكلية لوحده حسب ما تحبي اكتر.

• البروكلي:

من انواع الخضار اللي مافيهاش دهون خالص وفيه كمية كبيرة من الكربوهيدرات ودي بتاخد وقت كبير على ما تتهضم فده بيخليكي حاسة انك شبعانة لوقت طويل, ده غير انه فيه عناصر غذائية كتير مفيدة زي الحديد والكالسيوم والمغنسيوم وده بيخليه يحافظ على الطاقة في الجسم يعني لو يومك مليان وعندك حاجات كتير هتعمليها كلي بروكلي في اليوم ده هيحافظ على طاقة جسمك طول اليوم ويخسسك في نفس الوقت.

• الكرنب:

الكرنب من الخضار اللي بيخسس جدا طبعا مش المحشي منجيش ناكل محشي عشان نخس اوعوا J الكرنب لوحده في نسبة دهون قليلة جدا ونسبة الياف عاليه بتخسس الوزن, ممكن تقطعيه مع السلطة وتاكليه او ممكن تعملي شوربة كرنب بتبقى طعمها حلو جدا.

• الفاصوليا:

الفاصوليا كمان من الخضار اللي مليان بالالياف وزي ما قولنا لما بتاكليها ده بيخليكي تحسي انك شبعانة لفترة طويلة وفيه كمان نسبة بروتينات كبيرة وبيخلي نسبة السكر في الدم مظبوطة.

• السبانخ:

السبانخ من الخضار اللي بيساعد جدا على التخسيس لانه بيقلل نشاط الخلايا اللي بتخليكي تحسي بالجوع وتاكلي كتير,  ده غير انه مفيد جدا لانه مليان فيتامينات زي فيتامين K , A, B6, C, E وعناصر غذائية مهمة  زي الحديد والكالسيوم والمغنسيوم والفوسفور والثيامين وده كله بيخلي الجهاز العصبي يشتغل بشكل احسن وبيقوي عضلات الجسم وبيظبط ضغط الدم في الجسم ومفيد جدا للعضم, ممكن تاكلي السبانخ مطبوخة او تحطيها مع السلطة.

• الفلفل:

الفلفل بيحرق السعرات الحرارية بشكل كبير جدا وسريع وبكل الوانه سواء الفلفل الاحمر او الاصفر او الاخضر, وفي طبعا فيتامين C بنسبة كبيرة, حاولي دايما تحطيه مع السلطة ويا سلام بقى لو حطيتي من كل الالوان عشان تدي شكل حلو للطبق ويشجعك انك تاكليه اكتر.

• البرسيم :

البرسيم يا بنات بيساعد على التخسيس تخيلو غير انه مليان فوايد اولا فيه فيتامينات كتير جدا زي فيتامين K, A, B, B12 وفيه عناصر مفيدة زي الكالسيوم والمغنسيوم والزنك والفوسفور وحمض الفوليك والكلوروفيل وبيقلل ضغط الدم العالي وبيقوي جهاز المناعة فوق كل الفوايد دي انه بيخسس من هنا ورايح هناكل برسيم J, ممكن تحطيه مع السلطة او اضافة في اي نوع ساندوتش يا سلام لو ساندوتش جبنة مع الطماطم والبرسيم J .

• الجرجير:

الجرجير احنا دايما بنحطة في السلطة لكن منعرفش انه بيخسس هو من انواع الخضار اللي بتخسس وليه فوايد كتير لانه مليان فيتامينات زي فيتامين K, C وفيه كالسيوم وبيتاكاروتين والعناصر دي كلها بتقوي جهاز المناعة وبيسيطر على معدل ضربات القلب وضغط الدم.

• البصل:

البصل في نسبة سعرات حرارية قليلة جدا وفيه عناصر بتساعد على تخسيس الوزن وبتحمي الجسم من امراض كتير من ضمنهم السرطان وتقريبا البصل بناكلوا على طول لانه بيدخل في معظم الاكل اللي بناكله كل يوم وفي السلطة بس ممكن ننوع في طريقة اكله بردوا غير الاكل والسلطة ممكن نعمل شوربة بصل بيبقى طعمها يجنن ننوع عشان منزهقش.

• الخضروات الورقية اللي لونها اخضر:

زي الخس واللفت الاخضر والسلق كل الخضروات دي مفيدة جدا للتخسيس وبشكل خاص للي حابة يكون ليها وسط صغير الخضروات دي هتساعدك جدا لانها بتنحت منطقة الوسط فيها سعرات حرارية قليلة ونسبة الياف عالية وفيتامينات, ده غير انها مفيدة من الناحية الصحية لانها بتحمي القلب من تصلب الشرايين ومفيدة للي عندهم نسبة السكر في الدم قليلة.

• الحبوب الكاملة:

الحبوب الكاملة اللي هي زي الشوفان والقمح الكامل والارز البني والصويا والشعيروالذرة وبذر الكتان والعيش البني دول كلهم بيخسسو الوزن جدا لانها بتخلي الجسم يحرق ضعف السعرات الحرارية لانها بتاخد وقت اكبر في الهضم, وفيها نسبة كبيرة من البروتين والمعادن والالياف ومضادات الاكسدة وده بيحسن الجهاز الهضمي والمعدة وبيمنع الامساك وبيحمي من امراض القلب والاوعية الدموية والسكتة الدماغية والسكر والسرطان, عشان كده حاولوا تدخلوا في اكلكوا الحبوب الكاملة على قد ما تقدروا.

• في حاجات تانية غير الخضار والفاكهة بتخسس الوزن هنحطهم ضمن الاكلات بتاعتنا:

• السلمون:

السلمون فيه سعرات حرارية قليلة جدا ده غير طبعا انه من اكتر الاكلات اللي فيها اوميجا3 ودي مفيدة جدا للقلب, ممكن تعملي وجبة خفيفة جدا من السلمون وجنبها بروكلي مسلوق وبطاطس مهروسة دي تعتبر وجبة كاملة ومفيدة وفي نفس الوقت سعراتها الحرارية قليلة جدا.

• المسكرات:

كلنا واخدين فكرة ان المسكرات فيها دهون كتير وبتتخن لكن بالعكس المكسرات فيها نسبة الياف عالية جدا وده بيخليكي تحسي انك شبعانة ومش عايزة تاكلي وبتحافظ على هرمونات الغدة الدرقية اللي بتساعد في عملية الحرق دي بتنشطها اكتر كمان في الجسم, وفيها اوميجا3 واحماض دهنية بتخلي الجسم ينتج هرمون التستوستيرون والهرمون ده بيخلي الجسم يحرق الدهون بشكل اسرع, والافضل انك تاكلي المكسرات النية وابعدي عن المحمصة والمملحة.

وبكده نكون جمعنا تقريبا معظم الاكلات الصحية اللي هتخليكي تخسي بسرعة وبشكل صحي.