احدث صيحات الفضة موضة 2016
الاكسسوارات الفضة ليها عشق خاص و كثير مننا بيحرص انه يتابع الاشكال و الالوان الجديدة منها سواء كانت عقد او اسورة او خواتم و تعتبر الفضة مميزة جدا لانها ممكن تتلبس فى اى وقت و على لبس و بتشيكه و تخلى شكله مميز جدا .جايبنلكم تشكيلة جديدة من بيوت الفضة العالمية زى عزة فهمى و غيرها و هنفرجكم انهاردة على اجدد حاجات نزلت و لقينا عليها اقبال شديد من الناس . تعالوا اتفرجوا مع بنات حوا على احدث صيحات الفضة في موضة 2016 …
1 – الخواتم :
الخواتم الفضة مش بتبطل تكون موضة ابدا و السنة دى بدل ما البنات بيلبسوا خاتم واحد طلعت تقليعة لبس الخواتم الكتير فى الايد الواحدة و بيوزعها على الاصابع بشكل فنى جميل و بمختلف الاحجام فى منها الصغير و ف اللى بيءنفع يتلبس على عقلة الاصبع بس و فى منها الكبير اللى بيتلبس فى اى صباع و بتكون كلها زخارف جميلة و بعضها مستوحى من التراث الهندر و رسومات الافيال و غيرها و للبنات اللى بيحبوا الاحجار الكريمة نازلهم الخواتم دى بنفس الستايل بس زودولها الاحجار بألوانها الجميلة زى الموف و الاخضر و الازرق و الاحمر و البنى و دى غالبا بيتلبس معاها عدد خواتم اقل لان احيانا الحجر الكريم بيكون كبير شوية و بياخد كثير من شكل الايد و برده نزل منها انواع صغيرة خالص للبنات اللى بيحبوا الحجات الرقيقة و الحجر بيكون صغير جدا و بيبان بالعافية بس الوانه بتكون رائعة و ساحرة و ممكن يتلبس كذا لون مع بعض فى ايد واحدة او الايدتين . غالبا بتتباع فى المحلات بالمجموعة و المجموعة بيكون فيها عشر خواتم و بتوزعيهم على ايديكى الاتنين بالشكل اللى تحبيه.
2 – الاسورة و العقد و الحلق :
الاعقاد اللى طالعة موضة اوى الفترة دى هى اللى بيكون فيها حجر واحد كريم و بتتميز بألوان رقيقة جدا و و بقت منتشرة جدا وسط البنات لانها بتليق على كل اللبس و فيها منها الطويل القصير و ده بيخليها مناسبة للحجاب كمان و فى منها نوع بيتشحن فى ضوء الشمس و لو فضلتى لابساه طول اليوم هتلاقيه بينور بليل ! و بيكون شكله وهمى و سحرى جدا .الاحجار دى انتشرت عشان فيها صفات علاجية و مهدئة للاعصاب بس لو كانت اصلية و الاصلية غالبا بتكون نادرة و سعرها غالى شوية . اما الاسورة اللى كانت موضة و لسه مستمرة السنة دى زى ما نزل فى كوليكشن عزة فهمى هى الاسورة اللى مكتوب عليها عبارات الحب و الاغانى و الكلمات الرقيقة زى كلمة مودة و سعادة و فى منها كمان فى نفس المجموعة الحلقان و الاعقاد اللى مطعمة بنفس الزخارف و الكلمات المميزة . و كمان لو بتحب الاحجار الكريمة هتلاقى نازل منها الفضة المطعم بالاحجار الملونة . كمان العقد اللى بقى موضة اوى هو الشكل الفرعونى زى الجناحات و الجعران و غيرها و بتدى شياكة غريبة لللبس.و موجود منها كمان الحلقان الفرعونية المميزة .
