حب الشباب في الضهر وصفات لعلاجه والوقاية منه
حب الشباب من المشاكل اللي كتيير مننا بيعاني منها سواء حب الشباب اللي بيظهر في الوش اوالجسم ولكن اصعب حب شباب هو اللي بيكون في منطقة الضهر لان بيكون صعب علاجة شوية عن اي حب شباب بيظهر في مكان تاني من بشرتنا لان المنطقة دي بيكون الجلد فيها سميك اكتر من اي منطقة تانية وبتفرز دهون اكتر عشان كده جيبنالكم النهاردة مجموعة وصفات لعلاج حب الشباب في الضهر بشكل خاص وكمان الوقاية منه عشان ميظهرش تاني.
لازم نعرف الاول ايه سبب ظهور حب الشباب عشان دي اول خطوة للوقاية منه:
- السبب الاساسي لظهور حب الشباب هي الدهون الزيادة على البشرة عشان كده البشرة الدهنية هي اكتر نوع بشرة بيظهر فيها حب الشباب لانها بتفرز دهون زيادة عن اي نوع بشرة تاني لان الدهون دي بتسد المسام وده اللي بيخلي الحبوب تظهر على بشرتنا.
- ممكن حب الشباب يظهر بسبب لخبطة في هرمونات الجسم وده بيكون بسبب التوتر او اننا مش بنام عدد ساعات كافية عشان كده لازم ناخد كفايتنا من النوم ونحاول نبعد عن التوتر والقلق.
- حب الشباب ممكن يظهر كمان بسبب اننا بنستخدم منتجات للبشرة مش ماشية مع نوع بشرتنا او فيها زيوت في مكوناتها, عشان كده لازم نخلي بالنا اننا نستخدم منتجات تمشي مع بشرتنا وتكون خالية من الزيوت.
- ممكن يكون اسبابه وراثية مالناش دخل فيها تكون افراز الدهون الزيادة دي وراثة.
- الاكل اللي فيه دهون وسكريات كتير وكمان الملح الزيادة.
ايه هي طرق الوقاية من حب الشباب؟
- اول حاجة نضافة البشرة لازم نحافظ على نضافة البشرة على طول عشان الدهون متتراكمش وتسد المسام وتسبب لنا حب الشباب, ودايما استخدمي مية دافية لما تغسلي بشرتك يعني متكونش سخنة اوي ولا باردة, كمان مستخدموش ليفة خشنة اوي على البشرة لان ده ممكن يهيج البشرة ويطلع لنا حبوب.
- ابعدي عن اللعب فيها وإنك تقشريها بايديك لأن ده ممكن ينقل الحبوب من مكان للتاني.
- بعد الاستحمام لازم نتأكد إننا نشطف الشعر كويس من البلسم, لأن ممكن باقاياه لو لمست بشره الضهر, تأثر عليه وتتسبب في ظهور الحبوب.
- حاولي تنامي علي جنبك وبلاش ضهرك, واحرصي دايما علي تغيير الملايات أول بأول.
- بلاش استعمال منعم الأقمشة وإنتي بتجهزلي هدومك.
- الضهر زيه زي أي جزء تاني من الجسم بيحتاج ماية وتغذية , عشان كده لازم نحافظ عليه ونديله احتياجه.. بعد غسيل الضهر يفضل ترطيبه بكريم خالي من الزيوت أو بزيوت طبيعية زي الافندر, زيت شجرة الشاي أو زيت جوز الهند .
- حاولي تعملي تقشير للبشرة على الاقل مرة في الاسبوع عشان تشيلي الجلد الميت وتنضفي المسام من الزيوت والدهون اللي ممكن تسدها.
- اهم حاجة دايما بنكررها شرب المية اشربي مية كتير لانها بتخلص الجسم من السموم وبتنضفه من جوه وده لوحده كافي انه يحميكي من الحبوب.
نيجي دلوقتي لمجموعة وصفات لعلاج حب الشباب في الضهر.
- الوصفة الاولى:
المكونات:
نص معلقة زيت شجرة الشاي.
كوباية مية.
الطريقة:
هنخلط زيت شجرة الشاي مع المية وبقطنة نبدأ ندهن الضهر بالخليط ونسيبه لحد ما ينشف وممكن تنامي بيه وتغسليه الصبح, الوصفة دي فعالة جدا في علاج حب الشباب لان زيت شجرة الشاي بيقتل البكتيريا اللي بتسبب حب الشباب يعني علاج ووقاية في نفس الوقت.
- الوصفة التانية:
المكونات:
كوباية خل تفاح.
2 كوباية مية.
الطريقة:
هنخلط خل التفاح مع المية ونحطهم في ازازة ببخاخ ونرش منها على الضهر ونسيبها 20 دقيقة لحد ما تنشف وبعدين تغسلي جسمك بمية دافية, خل التفاح من افضل الحاجات الطبيعية اللي ممكن تعالج حب الشباب.
- الوصفة التالتة:
المكونات:
معلقة كبيرة قرفة.
2 معلقة كبيرة عسل.
ونص معلقة عصير ليمون.
الطريقة:
نخلط المكونات كلها مع بعض كويس وندهنه على منطقة الضهر ونسيبة 20 دقيقة وبعدين نغسله بمية دافية.
- الوصفة الرابعة:
المكونات:
معلقة كبيرة بيكنج صودا.
كمية مية كافية عشان تعجني بيها البيكنج صودا.
الطريقة:
نعجن البيكنج صودا بالمية لحد ما تبقى عجينة قوامها متوسط كده ونحطها على الضهر ونسيبها ربع ساعة او لحد ما تنشف وبعدين نغسلها بمية دافية.
- الوصفة الخامسة:
المكونات:
10 نقط زيت لافندر.
مية دافية.
الطريقة:
نملى البانيو مية دافية ونحط فيها زيت اللافندر وننقع جسمنا فيها لمدة 20 دقيقة, والوصفة دي تكرريها 3 مرات في الاسبوع.
- الوصفة السادسة:
المكونات:
معلقة زيت قرنفل.
ربع كوباية زيت زيتون او زيت لوز.
الطريقة:
هنخلط زيت القرنفل مع زيت الزيتون او زيت اللوز حسب اختيارك ونجيب قطنة وندهن ضهرنا بالخليط ده ونسيبه على الضهر فترة لحد ما الجلد يشربه كويس وبعدين نغسله بمية دافية, الافضل تدهني ضهرك بالخليط ده مرتين في اليوم عشان يجيب نتيجة اسرع معاكي.
- الوصفة السابعة:
المكونات:
نص كوباية ملح.
مية دافية.
الطريقة:
املي البانيو مية دافية وحطي فيها الملح وانقعي جسمك فيها نص ساعة, ولو انتي بشرتك دهنية بعد ماتنقعي جسمك متنشفيهوش سيبيه ينشف لوحده وبعدين ادهنية بمرطب, اعملي الطريقة دي مرتين في اليوم ولو مش هتقدري خليها مره في اليوم وهتلاحظي نتيجتها خلال اسبوع وان الحبوب بدأت تخف جدا.
في النهاية ونصيحتنا الاخيرة ليكي ضروري تدخلي في اكلك الخضار والفاكهة كتير كل يوم لازم تاكلي خضار وفاكهة طازة خصوصا التفاح والكمترى والعنب والاناناس, وتبعدي خالص عن عن الاكل والعصاير اللي فيها سكر كتير والشاي والقهوة والمخللات والحاجة الساقعة والايس كريم والاكل المعلب, والاكلات المقلية في الزيت لان الحاجات دي كلها بتزود المشكلة حاولي تاكلي اكل صحي لان العلاج بيبدأ من جوه قبل بره, لو مشيتي على النظام ده فترة هتلاقي حب الشباب اختفى خالص وهتلاقي بشرتك بقت صحية وشكلها احلى.
