ازاى تحافظى على جمالك اثناء الحمل؟

اغلب بنات حوا الحوامل بقوا بيخافوا جدا و يضايقوا لما يحسوا ان مزاجهم هيتغير وشكل جسمهم هيختلف و ده بيأثر على نفسيتهم جدا و بيحسوا انهم مبقوش حلوين زى الاول . فى فترة الحمل لازم تحاولى تحرصى على مزاج و نفسية مستقرة على ا ما تقدرى و متبطليش تثقى فى نفسك و فى شكلك ابدا لأن نفسيتك مش بتأثر عليكى انتى بس لا كمان على صحة مولودك . احنا النهاردة هنساعدكم بشوية نصايح فى السطور اللى جاية عن ازاى تحافظى على جمالك اثناء فترة الحمل ..

1 – الرياضة :

اداء التمارين مرتين فى الاسبوع طول فترة الحمل من اهم و اول الاسباب اللى بتحسن مزاجك و بتساعدك على تحجيم زيادة وزنك و بالتالى شكلك هيبقى احلى و كمان هتسهلك الولادة عشان عضلاتك هتكون اقوى . لازم تشربى مياه كثير اثناء التمارين و يكون الدكتور بتاعك هو اللى سمحلك بيها و من اسهل التمارين فى الفترة دى المشى و السباحة و اليوجا .

2 – اللبس :

اختارى ملابس الحمل اللى تخليكى تحسى بنفسك و بلاش اللبس المبهدل الواسع بزيادة و اللى الوانه مش حلوة و كئيبة . اختارك جيب ملونة و جميلة و بلوزة تلم جسمك و تبينك رفيعة و امشى على الموضة كمان لان ده حقك و يا سلام لو اشتريتى لنفسك طقم لانجيرى مريح و مش ضيق و يخلى شكلك جميل قدام نفسك و زوجك .

3 – الاكسسوارات :

متبخليش على نفس اشترى الشنط اللى بتحبيها و اختارى معاها طقم اكسسوارات بألاوان جميلة و دلعى نفسك دايما و متحسيش انك مختلفة عن نفسك قبل الحمل و افتكرى لما كنتى بتحبى تلبسى و تتزوقى و اختار الشوز الفلات المريحة ليكى و اللى يكون برده شكلها على الموضة و ابعدى تماما عن الكعب لانه خطر و مش مريح فى المرحلة دى الا لو كعب قصير و مضطرة لحضور مناسبة بس .

4 – الاكل :

الاكل عنصر اساسى فى تحسين مزاجنا و تحسين شكل جلدنا و صحة شعرنا . ابعدى ع الدهون و المنبهات و الكافيين فى الفترة دى لانها بتأثر كمان على الطفل و بتخليه متوتر و ركزى اكتر على الخضروات و الفاكهة و تناول الفيتامينات لجسمك و شعرك و جلدك .

5 – الشعر :

تعرفى ان تغيرات جسمك و هرموناتك فى المرحلة دى بتخلى شعرك يتقل و يبقى لامع اكثر ؟ دى فرصة رائعة انك تغيرى من شكل شعرك و تسريحته كل شوية و بلاش نعمل ديل الحصان و الكحكة علاطول . شعرك اكثر حاجة ممكن تخليكى تحسى بجمالك اوعى تهمليه ابدا .

6 – المكياج :

متهمليش فى شراء ادوات المكياج و لا استعمالها بس اتاكدى انها تكون خالية من الكيمائيات و الروائح عشان متضيقيش من ريحتها . استخدمى البودرة المعدنية اللى بتكون خفيفة على بشرتك و مش هتزعجك و استخدمى اى شادو يظهر لون عنيكى و بلاشر او اجمر خدود لونه هادى و طبيعى و احرصى على ترطيب شفايفك بلون هادى او حتى زبدة كاكاو خصوصا لو لون بينك طبيعى . اتاكدى دايما ان كل ما تحسسى نفسك انك جميلة كل اللى حواليكى هيحسوا بكده .