12 وصفة للبشرة والشعر من مكونين اتنين بس!

بقلمريهام محمود فيشعر visibility26421
لكل بنات حوا الحلوين لو زهقتي من الوصفات المعقدة, واللي مليانة مكونات وبتفضلي تحتاري عشان تلقيها فين وتجيبها منين؟؟؟ جايبينلكم النهاردة 12 وصفة للبشرة والشعر هايلين والميزة في وصفاتنا النهاردة ان مكوناتها من حاجتين اتنين بس لان في كتير من البنات بيكسلوا يعملوا الخلطات اللي فيها مكونات كتير ونقول لسه هنعمل ده كله او ساعات تكون فيها مكونات مكلفة عشان كده النهاردة ريحناكم من ده كله وجيبنالكم وصفات للبشرة والشعر من مكونين اتنين بس وكلها متوفرة وموجودة في مطبخنا… .وصفات لتقشير الجسم, لعلاج حب الشباب, للرؤوس السودة, لل relaxation والإسترخاء , مزيل عرق, اسيتون طبيعي, مزيل مكياج , التخلص من القشرة وكمان ترطيب الشعر.. اعرفوهم معانا وإن شاء الله ينالوا اعجابكم…

وصفات للبشرة والشعر

وصفات للبشرة والشعر

  • نبدأ الاول مع مجموعة وصفات للبشرة والجسم:

  • وصفة لتقشير البشرة والجسم:

المكونات:

  1. ملح او سكر واحد منهم حسب اختيارك الاتنين هيعملوا نفس النتيجة.
  2. زيت زيتون او زيت لوز او زيت جوز هند بردوا واحد بس حسب اختيارك.

الطريقة:

هتحطي شوية سكر او ملح وعليهم شوية من الزيت اللي هتختاريه ومتخليش الخليط ولا سائل اول ولا جامد اوي خلي سمكه متوسط وممكن تزودي عليه كام نقطة من اي زيت عطري عشان تدي ريحة حلوة لجسمك هتاخدي حمام سخن عشان تفتحي المسام وتبدأي تفركي جسمك بالخليط بحركات دائرية لمدة 10 دقايق وبعدين اغسلي جسمك بمية باردة, الوصفة دي لاغنى عنها لتقشير الجسم لانها بتشيل الجلد الميت وبتبيض وتوحد لون الجسم عشان كده ضروري تواظبي عليها على الاقل مرة في الاسبوع.

وصفة لتقشير الجسم
وصفة لتقشير الجسم
  • وصفة لعلاج حب الشباب:

المكونات:

  1. خيارة.
  2. 2 معلقة كبيرة عسل.

الطريقة:

نهرس الخيار كويس في الخلاط وبعدين نضيف عليه العسل اغسلي وشك بمية دافية وبعدين حطي عليه الماسك وسيبيه ربع ساعة وقبل ما تغسليه دلكي وشك في حركات دائرية كام دقيقة وبعدين اغسلي وشك كويس بمية دافية.

الوصفة دي مفيدة جدا لعلاج حب الشباب وللي بشرتهم حساسة او بتلتهب بسرعة الوصفة دي بتهدي الوش جدا وبترطبه.

وصفة لعلاج حب الشباب
وصفة لعلاج حب الشباب
  • وصفة لتنضيف البشرة ومنع ظهور الحبوب:

المكونات:

  1. خيارة.
  2. بياض بيضة.

الطريقة:

نهرس الخيار في الخلاط وبعدين نحط عليه بياض البيض ونخلطهم مع بعض كويس ونحط الخليط على بشرتنا ونسيبه 20 دقيقة لحد ما ينشف على الوش وبعدين تغسلي وشك بمية دافية كويس وبعدين مية باردة.

الوصفة دي مفيدة جدا للي بشرتهم دهنية بشكل خاص لانها بتنضف الوش من الدهون الزيادة, وممكن تعملي الوصفة مرة واحدة بس في الاسبوع.

وصفة لتنضيف البشرة ومنع ظهور الحبوب
وصفة لتنضيف البشرة ومنع ظهور الحبوب
  • وصفة لازالة الرؤوس السودا:

المكونات:

  1. معلقتين صغيرين بيكنج صودا.
  2. معلقة صغيرة عسل.

الطريقة:

نخلط العسل والبيكنج صودا مع بعض ونفردها على الوش ونسيبها تقريبا 20 دقيقة لحد ما تنشف على الوش وبعدين تفركيها من على وشك بحركات دائرية واغسلي وشك بمية دافية وبعدين مية باردة, هتلاقي الرؤوس السودا طلعت مع الماسك.

وصفة لازالة الرؤوس السودا
وصفة لازالة الرؤوس السودا
  • وصفة لازالة الشعر الزائد من الجسم:

المكونات:

  1. صبار الالوفيرا.
  2. زيت زيتون.

واي زيت عطري تحبيه ده اختياري ممكن تحطيه وممكن لا.

الطريقة:

هنجيب مقدار من زيت الزيتون ونضيف عليه قده تلات مرات جيل الالوفيرا وطبعا الكمية بردو حسب طول وكثافة شعرك (يعني لو مثلا كوباية زيت زيتون يبقى عليها 3 كوبايات جيل الالوفيرا) نخلطهم مع بعض كويس وتحطيها في اي برطمان عندك ولما تيجي تشيلي الشعر من جسمك تبلي المنطقة اللي عايزة تشيلي منها الشعر بالمية وبعدين تدهني عليها من الخليط وتشيلي الشعر بمكنة الحلاقة بالراحة عشان متجرحيش نفسك هتلاقي الشعر طلع بسهولة.

وصفة لازالة شعر الجسم
وصفة لازالة شعر الجسم
  • وصفة للتخلص من اجهاد وتعب الجسم:

الوصفة دي مفيدة جدا لو جسمك مرهق وتعبان بعد يوم طويل ومحتاجة حاجة تريحك الوصفة دي هتفيدك وهتحسي بعدها براحة واسترخاء لجسمك.

المكونات:

  1. نص كوباية ملح.
  2. 10 نقط زيت لافندر.

الطريقة:

هتملي البانيو مية دافية وتحطي فيها الملح وزيت اللافندر وتسترخي فيها ربع ساعة مثلا او على قد ما انتي تحسي ان جسمك ارتاح لان الطريقة دي نتيجتها فورية هتحسي انك جسمك ارتاح على طول مش محتاجة وقت, وننصحك انك تشربي مية كتير قبل الحمام وبعده, والوصفة دي تنفع للرجل بس لو في يوم مثلا عملتي مشاوير كتيرورجلك وجعاكي مش شرط تعملي حمام كامل لجسمك ممكن تحطي مقدار مية دافية في طبق على قد ما تنقعي رجلك بس وتحطي فيها معلقة ملح واحدة وكام نقطة زيت لافندر وتنقعي فيها رجلك شوية.

وصفة للتخلص من اجهاد وتعب الجسم
وصفة للتخلص من اجهاد وتعب الجسم
  • وصفة مزيل عرق:

المكونات:

  1. من 10 ل20 نقطة من اي زيت عطري حسب اختيارك “ممكن تختاري زيت اللافندر او الياسمين او الليمون اي نوع انتي تحبيه اكتراو المتوفر”.
  2. ربع فنجان بيكنج صودا “اللي هي الكربوناتو”.

الطريقة:

اخلطي البيكنج صودا مع الزيت كويس وحطيهم في ازازة وحطي من الخليط ده بعد الحمام بس قبل ما تستخدمية رجي الازازة كويس كل مره قبل الاستعمال.

وصفة مزيل عرق
وصفة مزيل عرق
  • وصفة لعمل الاسيتون:

المكونات:

  1. خل.
  2. عصير ليمون.

الطريقة:

نجيب طبق صغير ونحط فيه مقادير متساوية من الخل وعصير الليمون وتجيبي قطن تعمليه على شكل كور صغيرة وحطيها في خليط الخل والليمون وسيبيهم وجهزي طبق تاني حطي فيه مية سخنة وانقعي ايديكي فيه 10 دقايق وبعد كده تاخدي كرات القطن اللي انتي نقعتيها في خليط الخل والليمون وتحطيها على ضوافرك 30 ثانية وشيلي بيها المانيكير من على ضوافرك, ولو انتي حاطة نوع مانيكير تقيل مش بيتشال بسهولة ممكن تستخدمي الكحول بعد ما تعملي ضوافرك بخلطة الاسيتون.

وصفة لعمل الاسيتون
وصفة لعمل الاسيتون
  • وصفة مزيل مكياج العيون:

المكونات:

  1. ماء مقطر.
  2. وزيت زيتون.

الطريقة:

تجيبي اي ازازة فاضية عندك وتملي نصها بالمية وبعدين تحطي حوالي تلت كمية المية زيت زيتون وتستخدمي الخليط ده عادي تشيلي بيه مكياج العين بالقطنة, والوصفة دي مش بس بتشيل المكياج كمان بترطب الجلد حوالين العين لان المنطقة دي دايما بتبقى حساسة ومحتاجة عناية خاصة.

وصفة مزيل مكياج العيون
وصفة مزيل مكياج العيون
  • ودي مجموعة وصفات للشعر:

  • وصفة لترطيب الشعر:

المكونات:

  1. ثمرة افوكادو متوسطة.
  2. 2 معلقة كبيرة عسل.

الطريقة:

هنجيب ثمرة الافوكادو ونهرسها كويس لحد ما تبقى ناعمة خالص وبعدين نحط عليها العسل نقلبهم مع بعض ونحط الخلطة على الشعر ونسيبها 20 دقيقة ونغطي الشعر بطاقية الحمام او كيس عادي وقبل ما نغسله ندلك الخليط على الشعر وفروة الراس كويس وبعدين تغسلي شعرك كويس بالشامبو والبلسم.

الوصفة دي سحرية ونتيجتها روعة على الشعر بترطب الشعر جدا بسبب العسل, والافوكادو بيغذي الشعر وبيرطبه.

وصفة لترطيب الشعر
وصفة لترطيب الشعر
  • وصفة لترطيب فروة الراس:

المكونات:

  1. سكر بني.
  2. زيت زيتون.

الطريقة:

هتجيبي كمية من زيت الزيتون اللي تناسب طول وكثافة شعرك وتحطي عليها السكر البني كمية واحدة واحدة لحد ما تلاقي الخليط عندك مش سايل اوي ولا ماسك اوي يعني سمكه متوسط وبعدين حطي الخليط على الشعر ودلكي بيه فروة الراس كويس وسيبيه لمدة ربع ساعة او 10 دقايق وبعدين اغسلي شعرك عادي بالشامبو والبلسم.

وصفة لترطيب فروة الراس
وصفة لترطيب فروة الراس
  • وصفة للتخلص من قشرة الشعر:

المكونات:

  1. زيت زيتون.
  2. شوفان.

الطريقة:

هنجيب كمية من الشوفان حسب طول وكثافة الشعر ونطحنه كويس لحد ما يبقى بودرة ناعمة وبعدين نضيف عليه زيت الزيتون ونحطه على الشعر ونسيبه نص ساعة وبعدين نغسل الشعر بالشامبو والبلسم.

وصفة لعلاج قشرة الشعر
وصفة لعلاج قشرة الشعر

ان شاء الله الوصفات هتفيدكوا جدا جربوها وشاركوا معانا النتايج اللي تعمل وصفة تقولنا النتيجة.