نصايح للتخلص من انتفاخات تحت العين

انتفاخات تحت العين مشكلة بتواجهنا و بتأثر على جمال عيوننا ساعات و بتحصل نتيجة للخبطة فى الدورة الدموية و قلة النوم و الارهاق و الاكل الغير صحى . لكن فى حجات بسيطة ممكن تعمليها عشان تتجنبى المشكلة دى و تحافظى على جمال عنيكى و بريقها . تعالى شوفى معانا نصايح ووصفات للتخلص من انتفاخات تحت العين ..

ايه هى النصائح اللى لازم اعرفها عشان اتجنب المشكلة دى ؟!

– اوعى تنامى من غير ما تمسحى المكياج بتاعك و استخدمى قطنة و كريم مزيل للمكياج مناسب لبشرتك او حتى زيت زيتون و اغسلى وشك بمنظف لطيف على البشرة.
– لو انتى من الناس اللى بتفضل تنام على جنبها او على بطنها حاولى تتجنبى النومة دى لانها بتزود المشكلة . الجاذبية الارضية بتخلى السوائل اللى فى جسمك تتجمع تحت العيون و بالتالى بتساعد فى مشكلة الانتفاخات . حاولى تنامى على ضهرك و زودى مخدة تحت راسك عشان ترفع راسك اكثر .
– لو انتى من البنات اللى بيجيلهم حساسة و رشح و عطس فى موسم الحساسية زى الشتا و الخريف هتكونى اكثر عرضة للمشكلة دى و ان عنيكى تتنفخ .حاولى تواظبى على الادوية اللى بتعالج الحساسية دى و بتقلل الرشح و احرصى على تجفيف عنيكى بقطعة قماش او منديل مش جامد على البشرة كل ما تحسى انها مدمعة بزيادة .
– ابعدى عن المأكولات المملحة بزيادة لان الصوديوم بيسبب انتفاخات الجسم خصوصا لو المنطقة دى حساسة تحت العين و بيحبس فيها المياه .
– استخدمى كونسيلر مناسب لعنيكى و حطيه بالريقة اللى اتكلمنا عليها قبل كده و بعد لما تختارى اللون المناسب لعلاج مشكلتك و بلاش تدعكى تحت عنيكى و انتى بتحطيه .

طيب و الوصفات الطبيعية اللى ممكن تساعدنى ؟؟

1 – بياض البيض :

بيساعد على شد الجلد و القضاء على التجاعيد و تهدئة الانتفاخات .
هتفصلى 2 بياض بيضة و تضربيهم سوا لحد ما يتماسكوا و بعدين استخدمى فرشاة و افردى بيها الخليط على قطعة قماش و حطيها تحت عنيكى ربع ساعة و سيبيها تنشف و بعدين تغسلى وشك و ممكن تكررى كذا يوم فى الاسبوع .

2 – الخيار :

الخيار الساقع حل عملى و مضمون من زمان ناس كثير بتستعمله للتخلص من المشكلة لان مليان بإنزيمات بتساعد على التخلص من الالتهابات و بتشد الجلد و تهديه و كمان بيخلصك من السواد اللى تحت العين و التجاعيد .
هتجيبى خيارة و تقطعيها حلقات و بعدين حطى الحلقات فى التلاجة تسقع 10 دقائق و بعدين وزعى الحلقات على عنيكى و سيبيهم 10 دقائق او لحد ما تكون الحلقة دافية و نكرر العلاج ده كذا مرة فى اليوم .

طيب لو مستعجلة و عايزة انزل و لسه صاحية من النوم اعمل ايه !

حل غريب بس اثبت فعاليته جدا عند ناس كثير و بقى يعتب علاج منتشر و حل سريع للمشكلة . المعالق الساقعة ! هتساعد على تهدئة الشعيرات الدموية و قبض المسام و بالتالى تخفيف الانتفاخ . سيبى 5 ملاعق فى التلاجة 15 دقيقة و بعدين طلعيهم و ابدأى بالضغط من الناحية المدورة تحت عنيك لحد ما المعلقة تلاقيها دافية و غيريها بواحدة تانية من التلاجة .