قبل رسم الحواجب اعرفي 10 اخطاء متقعيش فيها !

بقلمريهام محمود فيمكياج visibility31193

رسم الحواجب من الحاجات اللي لازم نهتم بيها جدا لان الحواجب هي اللي بتحدد شكل الوش وبتبرز جمال العيون واول حاجة بتلفت النظر في الوش هو تناسق الحواجب مع العيون عشان كده لازم نهتم بشكلهم جدا ونختار الرسمة الصح اللي تليق على وشنا عشان تبرز جمال الوش وتطلعه احلى, عشان كده جيبنالك النهاردة اكتر 10 اخطاء ممكن تقعي فيهم وتخلي حواجبك تطلع بشكل مش حلو.

  • تعالوا نعرف مع بعض اكتر 10 اخطاء في رسم الحواجب ممكن نقع فيهم

  • في البداية كده قبل ما تشيلي شعر الحواجب خدي حمام سخن عشان المية السخنة بتفتح بصيلات الشعر وبتخلي الشعرة طرية واسهل انك تشيليها من غير الم, وممكن عشان تطري الشعر ويتشال بسهولة اكتر افركي حواجبك بشوية كحول بسيط جدا وبعدين ابدأي شيلي الشعر.

واكيد مش عشان تساوي حواجبك لازم تاخدي حمام :) ممكن بس تبلي فوطة بمية سخنة وتفركي بيها حواجبك لمدة دقايق بس عشان تطري الشعر وتقدري تشيليه بسهولة وخصوصا لو انتي فتلة شعرك تخينة وبتكون صعبة في الشيل.

وفي طريقة تانية كمان ممكن بالسيشوار على درجة حرارة مش عالية اوي ومن بعيد تبدأي توجهي الهوا السخن ناحية الحواجب عشان تطري الشعر, كل الطرق دي هتسهل عليكي جدا وهتخليكي تشيلي الشعر من غير اي الم نهائي.

  • متشيليش شعر حواجبك زيادة عن اللزوم متحاوليش ترفعيهم او تخليهم قصيرين اوي لان هيطلع شكلهم مش حلو دايما خلي بداية الحاجب يبدأ من منطقة منتصف الانف, شيلي بس الشعر اللي في النص بين الحاجبين بالملقاط او الشمع او باي طريقة انتي متعودة عليها.
اخطاء في رسم الحواجب
اخطاء في رسم الحواجب
  • متخليش بداية الحواجب تكون تخينة ونهايتها رفيعة اوي من الاخر ويطلع الحاجب شبه الفاصلة :) وشكلها مش حلو خلي الرسمة دايما في تناسب في السمك ما بين بداية ونهاية الحاجب.
اخطاء في رسم الحواجب
اخطاء في رسم الحواجب
  • في بنات كتير بيشيلو حواجبهم خالص ويعملوا تاتو ودي اسوأ حاجة ممكن تتعمل لان الحواجب بيكون شكلها مش طبيعي الاحسن انك بس تملي فراغات الحواجب بملون حواجب مناسب للون حواجبك شكلهم هيطلع طبيعي واحلى بكتير.
اخطاء في رسم الحواجب
اخطاء في رسم الحواجب
  • ابعدي عن رسمة الحاجب على شكل نص دايرة لان بتخلي في مساحة كبيرة زيادة عن اللزوم بين الحواجب والعيون والشكل بيطلع مش حلو.
اخطاء في رسم الحواجب
اخطاء في رسم الحواجب
  • خلي لون الحواجب دايما نفس درجة لون الشعر او اقرب لون للون شعرك لان في بنات بيكون شعرهم اصفر وتعمل الحواجب سودا ده مينفعش خالص لان بيبقى شكلها شاذ جدا ومش حلو, وكمان ابعدي عن الحواجب التخينة زيادة عن اللزوم خلي سمكهم مناسب ولا تخينة اوي ولا رفيعة اوي.
اخطاء في رسم الحواجب
اخطاء في رسم الحواجب
  • متحدديش حواجبك زيادة عن اللزوم وتبقى خطوط الرسمة باينة من فوق ومن تحت خلي دايما ايدك تكون خفيفة وانتي بترسمي حواجبك وبعد ما ترسمي بالقلم ادمجي اللون كويس بفرشة الحواجب مع شعر الحواجب عشان يبان طبيعي.
اخطاء في رسم الحواجب
اخطاء في رسم الحواجب
  • وانتي بتساوي حواجبك متقصريش الحاجب من الاخر لازم تكون نهاية الحاجب ماشية مع اخر زاوية العين عشان يبقى في تناسب بين العين والحاجب.
اخطاء في رسم الحواجب
اخطاء في رسم الحواجب
  • متخففيش حواجبك او تخلي لونهم فاتح اوي ومتبقاش ظاهرة في الوش, زي ماقولنا دايما خلي اللون زي لون الشعر او اقرب درجة للون الشعر.
اخطاء في رسم الحواجب
اخطاء في رسم الحواجب
  • وزي ما قولنالك متقصريش الحاجب اوي كمان متطوليهوش زيادة عن اللزوم من الاخر دايما خلي الطول مناسب ولا قصير اوي ولا طويل زيادة وزي ما قولنا يكون ماشي مع اخر زاوية العين دي بتكون انسب طريقة عشان تقدري تحددي الطول المناسب لحواجبك.
اخطاء في رسم الحواجب
اخطاء في رسم الحواجب

كده نكون خلصنا تقريبا الاخطاء اللي اغلب البنات بيقعوا فيها, واخر نصيحة ليكي عشان تحددي شكل وطول الحاجب المناسب ليكي وتحددي اول ونص واخر الحاجب ويطلع شكله مظبوط, هتجيبي قلم وتحطية على الانف من الجنب في اتجاه الحواجب دي هتكون بداية الحاجب, وبعدين هتخلي القلم زي ما هو على الانف من الجنب بس هتميليه شوية وانتي مثبتاه على الانف لحد نص العين والنقطة دي هتبقى نص الحاجب اللي تترسم على شكل قوس وبعدين هتميلي القلم من طرف الانف لاخر العين دي هتبقى نهاية الحاجب عندك وكده تكوني حددتي الشكل  الصح لحاجبك حسب شكل عينك واللي يمشي مع شكل وشك.

ودي صورة هتوضحلكم الطريقة اكتر

الطريقة الصحيحة لرسم الحواجب
الطريقة الصحيحة لرسم الحواجب