موضة الجاكيت الروب لشتا 2016
الجاكيت الروب كان موضة زمان و رجعت تانى فى سباق موضة شتا 2016 و مصممين الازياء قدروا يبتكروا اشكال و انواع كتير من الجاكيت ده و استخدموا فيه الصوف و الحرير و النيلون و القطن و كمان الكشمير و عشان ستايل و قماشة الجاكيت ده بيدفى جدا بدأنا نلاقيه منتشر فى المحلات و الشوارع البنات بقوا لابسينه فى كل مكان ول وقت لسهولة لبسه و لانه مناسب لكل الاوقات و المناسبات و كمان شكله شيك جدا و بيلم الجسم .تعالى اتفرجى معانا على موضة الجاكيت الروب لشتا 2016…
الجاكيت الروب من احسن الملابس اللى بتدى شكل رائع لباقى طقم هدومك خصوصا لو كنتى لابسة كل حاجة نفس اللون و كمان بيساعد على تحديد وسطك و بيدى لجسمك شكل رفيع و ممكن ليكى الاختيار تربطى الحزام بتاعه او تسيبيه و فى كلتا الحالتين برده هيرفعك و يطولك..
بجانب الشكل الشيك جدا اللى بيديهولك الجاكيت ده ممكن كمان ينفع يكون كاجوال و يتلبس فى اى مشوار سريع او خروجة خفيفة مع الاصحاب لو لبستى معاه شوز سنيكرز او كوتشى و عليهم بنطلون جينز و ممكن كمان تلبسى تحته توب او فستان على الركبة معاه بوت جميل و فى الحالة دى هيكون احلى لو قفلنا الجاكيت بالحزام و مسبناهوش مفتوح لكن لو لبستى جينز ممكن تسيبيه مفتوح و تسيبى الحزام زى ما هو..
لما نيجى لاختيارك للالوان بتاعت الجاكت عمرك ما هتكونى غلط لو اختارتى الالوان النيود زى البيج و الكريمى بكل درجاتهم و ممكن كمان تختارى الوان قوية و مختلفة زى الاخضر الفيروزى او العنابى و دول من اكثر الالوان موضة السنة دى و لو عايزة بقى يبقى شكل الجاكت بتاعك احلى ممكن تجيبيله حزام جديد غير الحزام بتاعه و تلبسيه عليه و نوعى فى الالوان زى ما تحبى و تدى للجاكت بتاعك لوك جديد و مميز…
