اعملي مثبت المكياج بنفسك في البيت
لكل بنات حوا اللي بيشتكو دايما من ان المكياج بيسيح على وشهم بسرعة ومش بيقعد فترة طويلة جيبنالكم النهاردة طريقة مثبت المكياج بمكونات طبيعية تقدري تعمليه بنفسك في البيت المثبت هيحافظ على مكياجك اطول فترة ممكنة خصوصا لو هتقضي يومك كله بره البيت أو عندك مناسبة أو فرح أو حتي لو عروسة وحابه تعملي مكياجك لنفسك ومحتاجة المكياج يثبت معاكي لاخر اليوم, وكمان للبنات اللي بشرتهم دهنية ودايما عندهم شكوى ان المكياج بيبوظ بسرعة او البشرة بتمتصه لان طبيعة البشرة الدهنية بتكون المسام فيها واسعة فبتشرب المكياج, لكل المشاكل دي جيبنالك طريقة مثبت المكياج بمكونات طبيعية تقدري تعملية بنفسك في البيت وطريقته سهلة وبسيطة جدا.
فكرة مثبت المكياج موجودة من فترة وكل ماركات المكياج المشهورة دلوقتي بتنتجها زي NYX و L’Oreal , KIKO و MAC.. بس لو بصيتي علي مكونات أي منتج من دول هنلاقي إن الماية والجلسرين هما العنصرين الاساسين في الوصفة ومعاهم مواد كمواية تانية. عشان كده ده سهل علينا إننا نقدر نعمل منتج بس بمكونات كلها طبيعية وفي البيت بنفسك مين غير تكلفة.
قبل ما نعرف طريقة المثبت هنقولك شوية نصايح بسيطة هتساعدك لتثبيت المكياج مع استخدام المثبت:
- اول حاجة واهم حاجة انك تختاري ماركة مكياج كويسة عشان تثبت على الوش والاهم انها متضرش بشرتك لان الماركات الرخيصة او اللي مش معروفة بتضر البشرة, ولما تيجي تشتري اي منتج اتأكدي انه مكتوب عليه “Long Wearing” او “Water Proof” يعني بيقعد مدة طويلة وضد الميه ده هيضمن لك ان المكياج من النوع اللي بيثبت اطول فترة.
- قبل المكياج حطي برايمر لانه بيضيق المسام وده بيخلي البشرة متشربش المكياج وبيثبته فترة طويلة خصوصا للي بشرتهم دهنية, ده غير انه بيداري عيوب البشرة وبيحميها من الجو والتراب والرطوبة.
- وفي حاجة مهمة جدا يمكن مش بناخد بالها منها او نفكر انها مش مؤثرة وهي ان توزيع المكياج كويس بطريقة صح على البشرة بيثبته فترة اطول عشان كده لازم توزعي المكياج كويس على وشك وادمجيه مع بعض كويس جدا لان ده هيخليه يثبت فترة اطول بكتير جدا.
- ممكن قبل ما تحطي المكياج خالص تدهني وشك بعصير ليمون وسيبيه لما ينشف وبعدين اغسليه وحطي المكياج بتاعك عادي الليمون هيساعد انه يقفل المسام ووشك ميشربش المكياج.
- بعد ما تحطي كريم الاساس ممكن تمرري مكعب تلج على وشك وتستني لما وشك ينشف خالص وبعدين تحطي البودرة وتكملي باقي المكياج عادي الطريقة دي بتساعد في تثبيت كريم الاساس على الوش اطول فترة.
دلوقتي بقى تعالوا نعرف مع بعض مكونات مثبت المكياج وطريقته:
المكونات:
- كوباية صغيرة ميه مقطرة أو ماية معدنية.
- نصف كوباية صغيرة ماية ورد.
- نصف كوباية صغيرة جلسرين.
- وازازة ببخاخة عشان نحط فيها المثبت.
طريقة التحضير والاستخدام:
هنحط الميه المقطرة مع الجلسرين مع ماية الورد في الازازة ونرجها كويس عشان نخلط المية والجلسرين مع بعض كويس, وبعدين هتستخدميه عادي هترشي على وشك منه بعد ما تخلصي المكياج, ولما تيجي ترشي المثبت خلي في مسافة بسيطة بينه وبين وشك وانتي بترشي يعني تخلي الرذاذ بتاعه بس يجي على وشك عشان متغرقيش وشك بزيادة وتبوظي تاثيرة..
فيه ناس كمان بتحط منه مرتين, مرة قبل المكياج ومرة بعد. حاولي تجربي الاول في يوم تكوني قاعدة في البيت فيه ويك ايند مثلا قبل ماتجربيه في يوم خروج لحد لما تتقني الكمية اللي تترش وبعده عن وشك وإنتي بترشيه.
يحفظ في التلاجة, ويفضل إنك تغيريه وتعملي منه جديد مرة كل اسبوعين لشهر بحد اقصي.
ده هيساعد إن المكياج يثبت وميسحش ويكمل معاكي طول اليوم وكمان بيرطب الجلد لان فيه جليسرين, حل رائع في الصيف وفي الشتا كمان, بكده ومين غير مصاريف كتير قدرتي تعملي مثبت مكياج لنفسك في البيت, جربيها وشاركنا النتيجة :)
