18 نصيحة جمال ومكياج جداد بيقدمهملك موقع بنات حوا
18 نصيحة جمال ومكياج جداد بيقدمهملك موقع بنات حوا .. اعرفي إزاي تكبري شفايفك لو عندك مناسبة مميزة, إزاي تظبطي أكتر رسمة عينيكي.. إزاي تحطي الايشادو صح, وكمان إزاي تطولي رموشك طبيعي.. يلا ابدأي اتفرجي علي الألبوم ونتمني انكوا تستفيدوا بالنصايح الجديدة. يلا نبدأ؟
1- لغبطة خط الأيلينر:
لو ايديكي اتهزت ولغبطي خط الأيلينر, بدل ما تمسحي عينك وتبدأي من الاول.. لمسة من الكونسيلر بقطنة ممكن تعمل عجايب في تنضيف اللغبطة :) وكملي رسمة عينك عادي جدا ..
2- لغبطة الماسكرا:
حركة رخمة جدا بتحصلنا كلنا, لما الماسكرا تسيح أو تلغبط علي الجفن اللي تحت. وقتها يفضل إنك تسيبيها تنشف لانك لما تحاولي تشيليها وهي لسة طرية أو مبلولة هتبهدل الدنيا أكتر.. سيبيها لمدة دقيقة وبعد كدة بقطنة وكونسيلر أو كريم أساس وشليها.. هتتشال بسهولة ومين غير ماتسيب أي اثر.
3- رسم العين بالايشادو:
غالبا في وضع الايشادو بنستعمل 3 ألوان (متوسط ، أغمق، وفاتح أو ملمع )
1- هنبدأ نحط الايشدو باللون المتوسط علي الجفن كله, نغطي منطقة العين كلها.
2- الايشادو الغامق بيتحط في قوس الجفن المتحرك, زي ماهو باين في الصورة.
3- الايشادو الفاتح أو الهايلايتر هنحطه في الزاوية الداخلية وعلى عظمة الحاجب.
امزجي الايشادو بالفرشة المخصصة.
4- أسهل وصفة لنفخ الشفايف «مؤقتا»:
لو عندك مناسبة خاصة وعايزة تنفخي شفايفك “مؤقتا”, جربي الوصفة ديه:
1- تلت معلقة جنزبيل بودر
2- تلت معلقة بابريكا أو فلفل حلو “اختياري”
3- تلت معلقة قرفة بودر
4- نقطة زيت نعناع, بيتباع عند العطار
5- معلقة زيت فيتامين E, أو ممكن كبسولة فيتامين E “اختياري”
6- اخلطيهم مع بعد
7- ادعكي بيهم شفايفك لمدة 30 ثانية.
8- سيبيه على الشفايف لمدة 3 دقايق.
9- اغسليه بمايه فاترة.
10- حطي الروج بتاعك وهتشوفي الفرق في حجم شفايفك هيبقي عامل إزاي.
لأن القرفة والجنزبيل هيسببوا تدفق الدم للشفايف وده هيأثر عليها ويخليها تكبر.. وكمان ممكن يخلي لونها احمر طبيعي..
تأثير الوصفة بيدوم ساعتين أو تلاته بس دول كافيين انهم يخلوا شكل شفايفك جذاب ومغري في مناسبتك الخاصة.
5- للمبتدئات في عالم رسم العين بالايلينر:
طريقة تانية إنك تعكي زي ماإنتي عايزة وبعد كده بقطنة وعليها فازلين حددي الرسمة وظبتيها.
6- رسم الايلينر بالنقط:
بدل ماتتعبي نفسك وترسمي خط كامل مرة وحدة, جربي إنك ترسمي نقط بس , نقط متقطعة ولما تظبتيهم ابقي وصليهم ببعد وعيدي علي الخط مرة كمان.
7- عايزة تطولي رموشك طبيعي؟؟
جربي وصفة زيت اللوز الحلو لتطويل الرموش. تدهني رموشك يوميا بزيت اللوز الحلو قبل ما تنامي وتسيبيه لحد الصبح, بعد فترة من استخدامه هتلاقي رموشك طولت وبقت كثيفة.
8- وضع ايديك وإنتي بتحطي ايلينر:
– يفضل إنك تبقي قاعدة مش واقفة.
– اسندي كوعك علي ترابيزة أو أي سطح مستوي.
– صباعك الصغير يكون مسنود علي خدك زي ماهو بين في الصورة كدة عشان يديكي اكبر قدر من التحكم.
9- من أسهل الطرق لعمل العين سموكي
هنستعمل قلم كحل ناعم وجلتر وماسكرا
أول حاجة تخططي عينيكي زي ما إنتي شايفة في الصورة رقم واحد واتنين بقلم الكحل الناعم..
وبعد كده تملي الفراغ بقلم الكحل برضه
بفرشة الايشدو استعملي الجلتر وافرديه فوق الايشادو
حطي الكحل من جوه وبعد كده الماسكرا
10- تثبيت الروج لاطول فترة أثناء اليوم
حطي الروج وبعد كده نشفيه بمنديل وحطي طبقة بودر (ممكن تستعملي بودر وش أو بلاشر أو حتي ايشادو ابيض), وبعدين حطي طبقة روج تانية.
11- عايزة تظبطي خط الايلينر بظبط؟
ممكن تستعملي شريط لاصق وتحطيه بشكل مايل زي اللي في الصورة كده وحطي الايشادو والايلينر وعكي برحتك وبعدين شيلي الشريط هتلاقي الرسمة مظبوطة بالمللي.
ديه طبعا طريقة تستعمليها في البدايات ومش علي طول لانها ممكن تأثر علي بشرتك.. بس تجربيها في الاول لحد لما تتعلمي إزاي تظبطي الرسمة لوحدك.
12- تعملي ايه لو البلاشر بتاعك اتكسر؟
حطي عليه 10 نقط كحول وامزجيهم مع بعض بمعلقة وبعدين اضغطي عليهم وسيبيه ينشف.. هيرجع زي الأول.
13- لو الايشادو بتاعك اتكسر وعايزة تحافظي عليه:
وتعرفي تخديه معاكي في الشنطة, ممكن تجربي إنك تحطي عليه قطنة عشان تحفظ علي المكسور منه وميتكسرش أكتر.
14 – لأصحاب العيون الضيقة:
جربي إنك تحطي بقلم ابيض جوه عينيك ومش كحل اسود, هيوسع عينيك أكتر.
15- عشان تبيني شفافيك اتخن وشكلها جذاب أكتر:
حطي طبقة زبدة كاكاو وبعدين حطي ايشادو ملمع في نصف الشفايف بظبط.. وبعد كده استعملي قلم تحديد الشفايف وحطي الروج وملمع الشفايف.
16- طريقة تانية لو الماسكرا كلكعت:
جربي إنك تحطي فيها 10 نقط من قطرة الدموع الصناعية هتلاقيها رجعت طرية كأنها جديدة.
17- لو عايزة تفضلي منتعشة وريحتك حلوة طول اليوم:
بدل ماتشيلي معاكي ازازة البرفان كلها وتبقي قلقانة إنها تتكسر أو تكون متقلة الشنطة.. جربي إنك تشبعي اعواد القطن بالبرفان وتشيليها في كيس نضيف محكم الغلق وشيليها في شنطتك واستعمليها علي مدار اليوم.
18- المانيكير لو كلكع:
جربي إنك تحتيه في ماية سخنة بدل ماتحطي فيه الاسيتون.. أنواع كيتير من المانيكير بتبوظ لما نحط الاسيتون عليها.
