وصفات مزيلة للعرق ومعطرة لرائحة الجسم
جيبنا النهاردة لكل بنات حوا مجموعة وصفات مزيلة للعرق ومعطرة لريحة الجسم لان اكيد كلنا منقدرش نستغنى عن مزيلات العرق طول الوقت سواء كان في الصيف او في الشتا والسوق مليان بمزيلات العرق ولكن المزيلات الموجودة في السوق بيكون فيها مواد كيميائية بتضر البشرة وبتكون سبب اساسي في اسمرار المنطقة اللي تحت الابط, عشان كده احنا جيبنالك النهاردة مجموعة وصفات طبيعية فعالة جدا تخلصك من رائحة العرق, ومش بس كده جيبنالك كمان وصفات معطرة تخلي ريحة جسمك حلوة على طول.
هنبدأ مع مجموعة وصفات مزيلة للعرق:
- الوصفة الاولى:
المكونات:
3 معالق بيكنج صودا “اللي هي الكربوناتو”.
3 معالق نشا ذرة.
3 معالق زيت جوز هند.
كام نقطة من زيت شجرة الشاي “وده اختياري ممكن تحطيه وممكن لا بس من الافضل تستخدميه لانه بيقتل البكتيريا”.
كام نقطة من اي زيت عطري “زي مثلا زيت اللافندر او الياسمين حسب اختيارك عشان بس تدي للخلطةريحة حلوة”.
طريقة التحضير والاستخدام:
هنخلط البيكنج صودا ونشا الذرة مع بعض وبعدين هندفي زيت جوز الهند شوية ونحط عليه زيت شجرة الشاي ونضيفهم على خلطة البيكنج صودا والنشا ونقلبهم مع بعض كويس ونحط في الاخر الزيت العطري ونقلبه مع الخليط وبعدين نحط الخلطة في برطمان او اي علبة فاضية عندك واستخدمية كل مره بعد الحمام.
- الوصفة التانية:
المكونات:
قطعة شبة “ودي موجودة عند اي عطار”.
معلقة بودرة مسك “بردو موجودة عند العطار”.
معلقتين بودرة تلك.
طريقة التحضير والاستخدام:
هنكسر الشبة ونطحنها كويس لحد ما تبقى بودرة وناخد منها 10 معالق ونحط عليها المسك وبودرة التلك ونخلطهم مع بعض كويس ونحط الخليط اللي عندنا ده في علبة ونستخدمة بعد الحمام.
- الوصفة التالتة:
المكونات:
3 معالق كبيرة زيت جوز هند.
3 معالق كبيرة بيكنج صودا.
2 معلقة كبيرة زبدة الشيا.
كام نقطة من اي زيت عطري.
طريقة التحضير والاستخدام:
هندوب زبدة الشيا وزيت جوز الهند مع بعض على نار هادية وبعدين نحط عليهم البيكنج صودا والزيت العطري ونقلبهم مع بعض كويس وحطي الخليط في ازازة او علبة وسيبيه لحد ما يبرد وبعد كده استخدمية عادي بعد كل حمام, بس خلي بالك احفظيه في مكان حرارتة متوسطة متحطيهوش في مكان حر لانه ممكن يبوظ.
نيجي لمجموعة وصفات هتعطر جسمك وتخلي ريحته حلوة:
- الوصفة الاولى:
هنجيب مكعب مسك ونبشرة ونضيف عليه اي نوع صابون مبشور معطر وبعد الحمام دلكي جسمك بالخلطة وبعدين اغسليه بالمية بس هتلاقي ريحة جسمك حلوة والريحة هتفضل موجودة في جسمك فترة.
- الوصفة التانية:
هنجيب اي نوع زيت اطفال لانه بيكون ريحته حلوة وخفيف على البشرة ونحط عليه شوية مية ورد ونخلطهم مع بعض كويس وتدهني جسمك بالخلطة دي بعد كل حمام, الخلطة دي مش بتعطر الجسم بس بتنعمه كمان وبتخلي بشرتك زي بشرة الاطفال, وممكن تستخدمي مية الورد لوحدها تبلي قطنة وتدهني بيها جسمك بعد الحمام.
- الوصفة التالتة:
هنخلط شوية مية ورد مع جلسرين وزيت مسك ابيض “هتلاقيه عند العطار” نخلطهم كويس مع بعض وندهن بيه جسمنا بعد الحمام.
- الوصفة الرابعة:
هنجيب معلقة فازلين وندوبها على نار هادية وبعدين نحط عليها معلقة من زيت المشمش مع معلقة زيت عنب ومعلقة زيت ليمون “هتلاقوا كل الزيوت دي عند العطار” نقلبهم مع بعض كويس وتحطيهم في علبة او برطمان وتدهني بيهم جسمك بعد الحمام.
- الوصفة الخامسة:
عبارة عن رز مطحون وحجر عطري “هتلاقية عند العطار بروايح كتير في منه ليمون وبرتقان وفانيليا وعود اختاري اللي تحبيه” هنجيب الحجر نبشره كويس هيبقى زي البودرة ونحط عليه معلقة رز مطحون وتقلبيهم مع بعض كويس وحطيهم في علبه وبعد ما تاخدي الحمام وقبل ما تنشفي جسمك رشي من الخلطة على جسمك كله وسيبيه ربع ساعة وبعد كده افركي جسمك لمدة خمس دقايق بحركات دائرية ومش هتكوني محتاجة تغسلي جسمك تاني لانه بشرتك هتمتص الخليط, ممكن تستعملي الخلطة دي مرتين في الاسبوع غير انها بتعطر بتنعم الجسم وتبيضه كمان.
