ازاى تلبسي السكارف فى الشتاء
من اساسيات الشتا اللى بتدفينا من البرد و اللى علاطول بتكون طالعة موضة و ملناش غنى عنها اذا كنا محجبات او بشعرنا , السكارف ! اللى نازلة بالوان و اشكال كثيرة اوى منها التخين و الرفيع و القصير و الطويل و الصوف و منها الكروشيه و منها الخفيف اللى شبه الايشارب و اذا كنا خارجين الصبح او بليل دايما السكارف بتزود شياكة اللبس و بتديله لوك مختلف تماما . تعالى اعرفى معانا ازاى تلبسى السكارف فى الشتاء …
السكارف ليها كذا طريقة تتلبس بيها عشان تليق على اى لبس ممكن تلبسيه زى مثلا ممكن تتلبس على جاكت طويل و تكون متسابة حولين الرقبة من غير ما نربطها جامد . و ممكن برده نعكس الستايل و نربطها جامد على الرقبة و نخبى اطرافها جوه اللبس . و ممكن لو هى سكارف خفيفة شبه الايشارب تتربط على الرقبة و تدى لوك كلاسيك شيك و ممكن نربطها على شكل عقدة على الرقبة و نسيب طرف واحد منها بس اللى باين .
ممكن كمان تتلبس و ندخلها جوه اللبس و هتبان برده شيك جدا و بتتلبس على جاكت قصير كلاسيك او طويل .
ممكن لو بتحبى تلبسى الفيست اللى بيدفى جدا فى الشتا و كل البنات مقبلة عليه تزويديلوا السكارف الخفيف خصوصا لو لونه سادة . كمان البنات اللى بيحبه يلبسوا اللون الاسود السادة بيحتاجوا حاجة تكسر لون الطقم و تنوره من غير ما يغيره الستايل بتاعهم و طبعا السكارف هتسعفهم جدا فى اللوك ده . لو بتلبسى الكوت الطويل و بتكسلى تعملى اى شكل او ربطة برده السكارف هيعمل لوك حلو لو سبتيه زى ما هو و خلتيه نفس لون الشنطة بتاعتك . كمان بيخلى اللوك بتاعنا تحفة لو لبسنا السكاارف على الجاكت الجلد الاسود او البنى او الزيتى و لو بتحبى البلوفرات المخططة ممكن تلبسى عليها سكارف مخطط نفس اللون و الحركة دى طالعة موضة جدا.
