خريطة حب الشباب على الوش ممكن تقولك ايه عن صحتك!
حب الشباب على البشرة في بعض الحالات مش بتكون مجرد حبوب عادية ولكن ممكن تقولك عن حاجات كتير بتحصل في جسمك من جوه ومش ظاهرة وانك ممكن تكوني بتعاني من مشكلة صحية معينة وكل مكان بيظهر فيه الحبوب في الوش بيدل على مشكلة صحية مختلفة في الجسم يعني حبوب الجبهة غير حبوب الدقن غير حبوب الخدود وهكذا والطريقة دي هي طريقة قديمة في الطب الصيني كانوا بيستخدموها للكشف عن اي مرض من خلال حبوب الوش واماكنها, عشان كده جيبنالك النهاردة خريطة حب الشباب في الوش اللي هتقولك كل مكان بيظهر فيه الحبوب في الوش ممكن تكون ايه المشكلة الصحية اللي عندك.
تعالوا نعرف واحدة واحدة مع بعض اماكن حب الشباب في الوش وممكن تقولنا ايه:
حبوب القورة:
حب الشباب اللي بيظهر في القورة ده ممكن يدل على ان في مشاكل في الجهاز الهضمي والامعاء او مشاكل في الكبد, وممكن يكون بسبب التوتر او انك نومك مش منتظم, وممكن كمان الحبوب تظهر بسبب الرجيم وانك مش بتاخدي كميات كافية من البروتين في اكلك, الغريب كمان انه ممكن تظهرلك حبوب الجبهة بسبب منتج معين استخدمتيه لشعرك وعمل رد فعل على بشرتك بان تظهرلك حبوب على القورة, عشان نحل مشكلة حبوب القورة دي نعمل ايه ؟ لازم تاخدي كفايتك من النوم تنامي مش اقل من 7 ساعات كل يوم, تشربي مية كتير عشان تطردي السموم وتنضفي جسمك من جوه, كلي الخضار والفاكهة اللي تدي جسمك الفيتامينات اللي محتاجلها وابعدي عن الاكل اللي في بهارات كتير او حراق لان ده بيزود الحبوب, وحاولي تبعدي او حتى تقللي شوية من الاكل والعصاير اللي فيها نسبة سكر كتير, وبالنسبة لمنتجات الشعر او البشرة اللي ممكن تعمل رد فعل على بشرتك حاولي تتأكدي قبل ما تستخدمي اي منتج انه مش هيهيج بشرتك ويسبب لها اي حبوب.
الحبوب اللي فوق وبين الحواجب:
حب الشباب اللي بيظهر بين الحواجب ده ممكن يدل على ضعف الدورة الدموية عندك, او مشكلة في المرارة, او بيدل على انك بتاكلي اكل فيه دهون كتير خصوصا الوجبات التيك اواي او “الجنك فود”, وعشان تعالجي المشكلة دي اشربي كمية مية كافية كل يوم, وابعدي عن الاكلات اللي فيها دهون كتير.
حب الشباب على الانف:
الحبوب اللي بتظهر على منطقة الانف دي ممكن يكون سببها سوء تغذية يعني جسمك مش بياخد كل الفيتامينات اللي لزماه, وممكن تكون بسبب الامساك وعسر الهضم او ضعف في الدورة الدموية, وعشان تحلي المشكلة كلي الاكلات اللي فيها فيتامين B بشكل خاص وقللي من الاكلات اللي فيها بهارات وملح كتير, دلكي منطقة الانف عملية التدليك دي هتخفف من الحبوب جدا.
حبوب الخدين:
حبوب الخدود ممكن يكون سببها مشاكل في الرئتين او الكبد او الاجهاد او الاكل بكميات كبيرة وممكن يكون سببها كمان مشاكل في المعدة, والخد الشمال بالذات ممكن تظهر فيه حبوب اكتر بسبب استخدام الموبايل لانه بيكون مش نضيف من استخدامنا فكل الاوساخ اللي عليه دي بتتنقل لوشنا وخصوصا منطقة الخد عشان كده حاولي تنضفي شاشة الموبايل كل يوم, ومن اسباب الحبوب دي كمان هي فرش المكياج اللي مش نضيفة عشان كده لازم تنضفي الفرش على طول, اكياس المخدات كمان بتقل لوشنا اوساخ كتير وبتسبب لنا حبوب لازم نغير اكياس المخدات باستمرار, يعني لحل المشاكل دي كلها هي النظافة وغسل الوش كويس اكتر من مره في اليوم وتنضيف كل حاجة بنستعملها.
حبوب فوق الشفايف:
الحبوب دي غالبا بتظهر بسبب مشاكل في المعدة او بسبب بردو الاكلات اللي فيها بهارات كتيراو الاكلات المقلية في الزيت, وممكن الحبوب اللي فوق الشفايف تظهر بسبب معجون السنان ممكن تكون فيه مكونات مش ماشية مع بشرتك فبيسبب ظهور الحبوب, والحل لمشكلة الحبوب في المنطقة دي انك تكتري من اكل الخضار والفاكهة.
حبوب الدقن:
الحبوب اللي في منطقة الدقن بيكون سببها لخبطة في هرمونات الجسم , او بسبب بردو معجون السنان او انك بتلمسي باستمرار المنطقة دي وبتنقلي الاوساخ ليها فبتسبب في ظهور الحبوب, والحل ليها انك تشربي مية كتير وتنامي عدد ساعات كافية, كتري من الاكل اللي فيه اوميجا3 زي التونة والسلمون, حاولي متحطيش ايدك على وشك عشان متتنقلش اي حاجة من الايد للوش واغسلي دايما ايدك ووشك عشان يبقوا نضاف على طول.
حبوب الاذن:
في ساعات بيظهر حبوب عن منطقة الاذن دي ممكن يكون سببها مشاكل في الكلى او نقص فيتامينات اومش بتشربي كمية مية كفاية في اليوم, وعشان تحلي المشكلة دي اشربي كمية مية كتير وابعدي عن المشروبات اللي فيها كافيين زي القهوة والنسكافية, وقللي الملح في الاكل.
شوفي كمان 5 علاجات طبيعية لحب الشباب
