عايزة تحافظي علي نضارة بشرتك؟ ابعدى عن ال 5 اكلات دول
مفيش بنت من بنات حوا مش عايزة بشرتها تكون نضرة و جميلة علاطول و زى ما احنا عارفين ان جمالنا مش بيظهر بس بالمكياج و التجميل لكن البشرة الجميلة الصحية بيكون اساسها العناية و التنظيف و كمان الاهم من كده الاكل الصحى . جايبنلكم انهاردة اكلات بنستخدمها تقريبا كل يوم و احنا مش عارفين ان هى بتدمر بشرنتا ! تعالوا اعرفوا معانا الاكلات دى فى السطور اللى جاية …
1 – الملح :
الملح الزيادة فى الاكل بيزود نسبة المياه فى الجسم و بيحبسها تحت الجلد و بيعمل انتفاخ و زيادة فى الوزن و بيخلى جلدك شكله منتفخ و مش حلو و من الحجات المملحة المضرة جدا اللى لازم نقلل منها فى اكلنا المخللات و الشيبسى و ملح الطعام اللى لازم نقلل منه يعنى حاولى متحطيش ملح كثير فى الاكل و انتى بتطبخى خصوصا لو بتعملى رجيم .
2 – الكافيين :
الكافيين بيزود من الكورتيزول فى الجسم و هو هرمون لما بيتم افرازه بزيادة بيخلى الجلد يبقى مش صحى و بيتجعد بدرى و بيزود جفافه و عشان كده لازم نقلل من تناول منتجات الكافيين زى القهوة و الشاى و الشوكولاتة خصوصا لو بنستخدمهم كل يوم لأن تأثيرهم قوى جدا على البشرة و نضارتها .
3 – المعلبات :
الاغذية المصنعة اللى بنشتريها بكثرة من السوبرماركت و المعلبات تعتبر كارثة صحية لانها مليانة ملح و صوديوم و بتخلى الاكل يفقد تقريبا كل مكوناته الصحية الفيتامينات اللى فيه و ده بيأثر على جلدنا جدا و خصوصا لوجود المواد الصناعية اللى فيه و قلة الالياف .
4 – المأكولات المقلية :
المأكولات دى و استخدامها بكثرة بتسبب فى ظهور الحبوب و بتزود الدهون فى الجلد و بتدمر مضادات الاكسدة الطبيعية اللى بينتجها جلدنا و بالتالى بتزود ظهور التجاعيد و الخطوط الرفيعة .
5 – السكر الصناعى :
الالوان الصناعية اللى فى الحلويات زى الشوكلاتة و التورت الجاتوه و السكر الصناعى اللى بنستعمله احيانا فى الدايت بيتخزن و يتركم فى الجسم و بيبان اثاره السيئة على البشرة و من الاحسن نستخدم بداله العسل الابيض الطبيعى .