فوائد زيت اللوز الحلو للبشرة والشعر
زيت اللوز الحلو يعتبر من اهم الزيوت المفيدة للبشرة والشعر, لان فيه فيتامينات كتير زي فيتامين A , B , E وفيه كمان معادن واحماض امينية ومواد مضادة للأكسدة ودي كلها عناصر بتغذي البشرة وتخليها نضرة وناعمة وكمان مفيد جدا للشعر بيحافظ على نعومتة وبيخليه صحي, وهنعرفكم النهاردة فوايدة بالتفصيل مع مجموعة وصفات طبيعية للبشرة والشعر من زيت اللوز الحلو.
نبدأ مع فوائد زيت اللوز الحلو للبشرة:
- مفيد جدا وفعال في التخلص من الهالات السودا, وبيساعد كمان على تبييض الوجه.
- بيساعد جدا على ترطيب الجلد وبيديه نعومة وبيخلي بشرتك زي بشرة الاطفال.
- مفيد جدا للي بشرتهم حساسة وبتحمر وبتلتهب كتير زيت اللوز هيخلصك من المشكلة دي.
- كمان بيأخر علامات الشيخوخة والتجاعيد وبيخلي بشرتك نضرة وجميلة.
مجموعة وصفات للبشرة من زيت اللوز الحلو:
- وصفة لتبييض البشرة:
المكونات:
معلقة زيت لوز حلو
معلقة لبن مجفف
معلقة عصير ليمون
معلقة عسل
طريقة التحضير والاستخدام:
اخلطي كل المكونات مع بعض كويس وحطيهم على بشرتك لمدة ربع ساعة وبعدين اغسليها كويس بمية دافية وبعدين ماية باردة عشان تقفلي المسام .. الوصفة دي بتبيض البشرة وتوحد لونها ولو عندك كلف او بقع داكنة هتخلصك منها.
- وصفة لعلاج الهالات السودا:
المكونات:
معلقة زيت لوز حلو
معلقة عصير ليمون
طريقة التحضير والاستخدام:
اخلطي زيت اللوز مع عصير الليمون كويس وحطيها تحت منطقة العين ودليكها كويس لمدة دقايق وبعدين اغسلي بشرتك, اعملي الوصفة دي كل يوم قبل النوم وهتلاحظي ان الهالات السودا راحت بعد فترة قصيرة جدا من استخدام الوصفة.
- وصفة لتقشير البشرة وتنظيفها:
المكونات:
معلقة كبيرة زيت لوز حلو
معلقة صغيرة سكر وملح مع بعض
طريقة التحضير والاستخدام:
اخلطي المكونات مع بعض وافركي بيها بشرتك لمدة دقايق وبعدين اغسليها , الوصفة دي حلوة جدا لتنظيف وتقشير البشرة وهتخلصك من الحبوب والرؤوس السودا المزعجة اللي في بنات كتير بيشتكو منها.
وصفة للبشرة الحساسة:
بس تدهني بشرتك كل يوم بزيت اللوز لوحده من غير اضافات تانية ادهنيها بالليل قبل ما تنامي وسيبيه لحد الصبح, هيعالج البشرة من اي التهابات او احمرار وكمان بيعالج الصدفية والاكزيما والحروق.
- وصفة زيت اللوز الحلو لتطويل الرموش.
تدهني رموشك يوميا بزيت اللوز قبل ما تنامي وتسيبيه لحد الصبح, بعد فترة من استخدامه هتلاقي رموشك طولت وبقت كثيفة.
نيجي لفوائد زيت اللوز الحلو للشعر:
- مغذي جدا للشعر لانه بيحسن الدورة الدموية لفروة الراس.
- بيساعد على تطويل الشعر بشكل فعال جدا ويخلي شكله صحي وبيلمع.
- بيعالج تساقط الشعر لان فيه فيتامين B6 وهو فيتامين مهم جدا للشعر وبيزود نموه.
- لكل البنات اللي بيشتكو من قشرة الشعر زيت اللوز الحلو مفيد جدا وهيخلصك من مشكلة قشرة الشعر.
- كمان بيعالج تقصف الشعر وبيخلي شعرك صحي.
مجموعة وصفات للشعر من زيت اللوز الحلو:
- الوصفة الاولى:
المكونات:
زيت اللوز الحلو
زيت الزيتون
زيت الخروع
زيت جوز الهند
زيت السمسم
استخدمي كميات متساوية من كل الزيوت وكمية حسب طول وكثافة شعرك
طريقة التحضير والاستخدام:
اخلطي كل الزيوت مع بعض وحطيها على شعرك كله ودلكي فروة الراس كويس وسيبيها على الشعر من نص ساعة لساعة وبعدين اغسلي شعرك , واعملي الوصفة مرة واحدة في الاسبوع, الوصفة دي بتغذي الشعر جدا وتنعمه وبتعالج التقصف وتخليه بيلمع.
- الوصفة التانية:
المكونات:
ثمرة افوكادو
وزيت لوز حلو
طريقة الاستخدام والتحضير:
اهرسي ثمرة الافوكادو كويس واخلطي معاها زيت اللوز وقبل ماتغسلي شعرك حطي عليه الخلطة وسيبيه نص ساعة وبعدين اغسليه, الوصفة دي بتعالج التقصف ولو شعرك جاف وتالف من الصبغة والسيشوار والجو وغيرها من الحاجات اللي بتأثر على شعرنا الوصفة دي هتفيدك جدا.
- الوصفة التالتة:
المكونات:
معلقة كبيرة زيت لوز حلو
بيضة
طريقة التحضير والاستخدام:
اضربي البيضة كويس وبعدين ضيفي عليها الزيت وحطيها على شعرك نص ساعة وبعدين اغسليه , الوصفة دي هتعالج لك تساقط الشعر.
- الوصفة الرابعة:
المكونات:
زيت اللوز الحلو
عسل
طريقة التحضير والاستخدام:
اخلطي الزيت مع العسل كويس وحطيه على شعرك وسيبيه نص ساعة وبعدين اغسليه, الوصفة دي بتنعم الشعر جدا وبتزود كثافته.
- الوصفة الخامسة:
المكونات:
معلقة صغيرة زيت لوز حلو
موزة
طريقة التحضير والاستخدام:
اهرسي الموزة كويس وحطي عليها الزيت وبعدين دلكي شعرك وفروة الراس بالخليط كويس وسيبيه نص ساعة وبعدين اغسليه كويس, الوصفة دي بتنعم الشعر وبتخلي طري جدا.
- الوصفة السادسة:
ممكن كمان تعملي بلسم طبيعي لشعرك باستخدام زيت اللوز الحلو.
المكونات:
ربع كوباية زيت لوز حلو
نص كوباية عسل
معلقة كبيرة زيت جوز الهند
طريقة التحضير والاستخدام:
اخلطي المكونات كلها مع بعض كويس وحطيها على شعرك نص ساعة وبعدين اغسلي شعرك.
