مجموعة نصايح مكياج وجمال جديدة من بنات حوا
نصايح مكياج وجمال بنات حوا اللي بتستنوها وبنتمني إنها تفيدكم وفعلا تفرق معاكم :) يلا نبدأ أول مجموعة نصايح في 2016؟ ;) هنتكلم عن الماسكرا, الحواجب, المانيكير, الشعر, اختيار الفاونديشن وأنواع الكحل.
1- ظبط الماسكرا:
عشان نظبط رسمة الماسكرا وكمان عشان منلغبطش الايشادو والأيلينر ممكن نستعمل أي كارت قديم عندنا في البيت ونمشي المسكارا عليه بالشكل ده.
2- تلوين البنس:
العبي بالبنس اللي عندك في البيت ولونيها بالمانيكير .. هتخليكي تعملي تسريحات روشة جدا ممكن مثلا تكون لايقة علي لون الروج ويبان فيها البنس الملونة.
3- تصليح لغبطة الأيلينر:
أثناء رسم الأيلينر لو اديك اتهزت ولغبطي الرسمة, كملي عادي جدا وبعد كده بالقطنة ونقطة كونسيلر صغيرة ظبطي اللغبطة.
4- بلاش مكياج وارسمي حواجبك بس:
لو في يوم مش عايزة تحطي مكياج, جربي بس ترسمي حواجبك وتتقليها بالقلم, هتغير شكل وشك تماما وتغنيكي عن المكياج.
5- لازم تتعرفي علي أنواع الكحل والأيلينر واستخدماتهم :
– قلم كحل سهل جدا اننا نستعمله، بس مش بيترسم بيه خط تخين. مثالي لو هنرسم جوه العين. واوقات بيبقي قاسي أو ناشف في رسمة.
– الجيل, بيجي في شكل قلم أو علبة صغيرة معاها فرشة, سهل وناعم علي العين جدا.. وشكله في النهاية بيدي اللوك المطفي, الغير لامع وبينفع للرسم بمنتهي الدقة.
– السايل, أو الفلومستر, اسهلهم في التحكم والرسم, بيبقي قلم وحرفة ريشة رفيعة وبيترسم بيه وبياخد ثانيتين أو تلاته بعد مابنحطه عشان ينشف, وفيه منه اللوك المط الغير لامع وفيه منه اللامع.
6- اختيار لون كريم الاساس:
لما تيجي تختاري لون كريم الاساس افضل حاجة إنك تجيبي اللون مطابق للون رقبتك ومش لون إيديكي, لأن الأيدين بتتعرض للشمس أكتر وبيبقي لونها أغمق من لون الوش.
7- وفري في سعر الماسكرا:
إنتي عارفة إن اللي بيفرق ماسكرا عن التانية هو في الأساس شكل الفرشة بتعتها؟ عشان كده اشتري ماسكرا غالية وفرشتها تكون مناسبة لرموشك وبعد ماتخلص احتفظي بالفرشة بتعتها واغسليها واستعمليها مع ماسكرا سعرها اقل ومش هتحسي بالفرق.
8- عشان تخلي ريحة رجليكي حلوة:
لو رجليكي تعبانة والجزمة خلت ريحتها مش كويسة, جربي إنك تحطي رجلك في ماية دافية وفيها كيس شاي فتلة , الشاي معروف انه بيمتص الروايح وكمان هيهدي الوجع و يريح رجلك.
9 – عشان الروج ميلزقش في الكوباية:
لو مش عايزة الروج يلزق على الكوباية اللى بتشربى فيها و انتى بره او فى مطعم ممكن تجيبى طرف منديل مبلول و تمشيه على المكان اللى هتشربى منه قبل ما تشربى و الروج مش هيلزق أو ابسط حاجة بليها بلسانك.
10- اعملي المانيكير المدرج:
عايزة تعملي المانيكير المدرج, هاتي لونين أو تلاته من نفس اللون بس درجات مختلفة, حطي نقطة من كل لون واخلطيهم مع بعض بخله سنان وبعد كده جيبي اسفنجة حطيها علي مانيكير وبعد كده على ضوافرك.
