نصايح عشان تكوني زوجة مثالية !
إزاي تكوني زوجة مثالية ؟ اكيد كل الزوجات بيسألوا نفسهم السؤال ده .. ومبتكونيش عارفة ازاي تجددي حياتك الزوجية وتكسري الروتين والملل, احنا من خلال موضوعنا النهاردة وفي بداية سنة جديدة هنساعدكم تجددوا حياتكم بشوية نصايح بسيطة لو نفذتيها هتبعدي الملل عن حياتك الزوجية وهتعيشي حياة سعيدة وهادية.
تعالوا مع بعض نعرف شوية افكار بسيطة جدا وسهلة التنفيذ ازاي تبقي زوجة مثالية:
- في الايام دي للأسف اكتر حاجة مسيطرة على حياتنا كلنا تقريبا هي السوشيال ميديا بنستخدمها طول الوقت وفي اي مكان, ممكن نجرب اننا نبعد شوية عنها ونحدد ساعات معينة لاستخدامها وكل زوج وزوجة يدوا لنفسهم فرصة يقعدوا مع بعض وقت اكتر او يعملوا حاجة مشتركة مع بعض.
- ممكن تخططي لرحلة في مكان هادي وجميل تستمعوا فيه بالوقت مع بعض, وفي نفس الوقت هتكسري الروتين وترجعوا من الرحلة نفسيتكم احسن ومختلفة, وكمان هتعملوا ذكريات حلوة تفتكروها بعد كده مع بعض.
- من الحاجات المهمة جدا اللي لازم تكون موجودة بين اي زوجين انهم يسمعوا بعض يحاول كل طرف يسمع التاني اكتر ويديه فرصة يعبر عن اللي جواه, يعني حاولي تسمعي اكتر وتتكلمي اقل.
- من الحاجات اللي بتسعد الطرفين جدا وتجدد الحياة بينهم انهم يعملوا حاجة جديدة مع بعض او يفاجئوا بعض بحاجة مش عادية ومختلفة او بهدية بسيطة وممكن ده يحصل مثلا مره في الشهر بس هتكون كافية جدا عشان تجدد الحياة وتكسر الروتين.
- الزوجة لازم تكون صبورة اكتر في التعامل مع الزوج ومتفهمة, وفي اي مشكلة تقابلكم في حياتهم استقبليها بصبر لحد ما تتوصلوا لحل يرضي الطرفين, وابعدي عن العند والعصبية لانه بيكبر المشكلة.
- ابدأي يومك بشكل ايجابي يعني بابتسامة حلوة وكلمة شكر للزوج دي بتفرق جدا في بداية اليوم وهتلاقي يومك كله جميل ومن غير مشاكل.
- في زحمة الحياة والمسئولية حاولي متنسيش نفسك اهتمي بنفسك “دلعي نفسك” عشان الاهتمام ده هينعكس على حالتك النفسية وهيخليكي احسن وده طبعا هينعكس بشكل طبيعي على معاملتك مع الزوج والاولاد.
- التسامح دي من الصفات اللي هتوفر عليكي مشاكل كتير اوي لازم تكوني متسامحة, لان الحب في النهاية تسامح وعطاء.
- ممكن تحاولوا تقضوا وقت اكتر مع بعض بره البيت ومش شرط تقعدوا في مكان ممكن تتمشوا مثلا في مكان مفتوح وتجددوا نشاطكم.
- ممكن تعملي فكرة مجنونة شوية تبعتي له رسايل وهو معاكي في البيت رسالة حب فيها اي كلمات حلوة او تبعتي له رسالة وهو في شغله اتعاملي معاه كانك لسه في فترة الخطوبة الفكرة ممكن تكون جديدة وغريبة بس هتفرق كتير جدا معاكي جربيها وشوفي الفرق.
- حاولوا تستمعوا بوقتكوا مع بعض ارقصو غنو اعملوا اي حاجة مع بعض هتجدد نشاطكم وتكسر الروتين.
- شجعي الزوج بكل طاقتك دايما قوليله كلمات تشجيع تخليه ينجح اكتر في شغله ووفري له دايما في البيت الجو المناسب والمريح وزي ما بنقول دايما “وراء كل رجل عظيم امرأة”, انتي تقدري تخليه عظيم لانه بيستمد العظمة منك.
- حاولوا انكم دايما تعملوا كل حاجة مع بعض ميبقاش كل واحد عايش حياة منفصلة عن التاني خلوا في اهتمامات مشتركة تقدروا تعملوها مع بعض, بينوا حبكوا لبعض دايما وعبروا عنه بالتصرفات والكلام.
ونصيحتنا الاخيرة ليكي حاولي ماتديش المشاكل اكبر من حجمها خليكي متساهلة اكتر ومرنة في التعامل عشان يبقى دايما البيت هادي وبعيد عن أي مشاكل.
