ازاى نخبى الحبوب بالمكياج ؟
بنات حوا اللى بيعانوا من وجود حبوب او بثور على بشرتهم عارفين اد ايه الموضوع بيكون مزعج لما بنحاول نخبى الحبوب دى كل يوم بالمكياج و نخلى شكل بشرتنا مفهوش عيوب خصوصا لو الحبوب دى نتيجة لخبطة فى الهرمونات او حاجة وراثية او مشاكل جلدية احنا لسه بنحاول نعالجها و مش عايزين حد يشوفها و بنتضايق لو حد ممكن يلاحظها . جايبنلكم نصائح من خبيرة تجميل مخصوص عشان خاطركم يا جميلات تعالوا اعرفوا معانا ازاى نتجنب المشكلة دى و نقدر نخبى الحبوب بالمكياج؟
1 – نبدأ بالنظافة و الترطيب:
اتاكدى اول حاجة ان جلدك نظيف و مغسول كويس و مرطب عشان المكياج يكون ثابت و جميل .
2 – البرايمر :
زى ما قلنا قبل كده البرايمر ده سائل خفيف غالبا بيكوم ملوش لون او لونه بيكون لؤلؤى خفيف جدا بنحطه على بشرتنا كأساس للمكياج قبل ما نحط اى حاجة حتى كريم الاساس . البرايمر وظيفته انه يثبت المكياج و يوحد لون البشرو و بيخفى الشوائب اللى فيها و بيسد المسام الكبيرة . هنحط منه نقط بسيطة بأصابعنا و نسيبه دقائق ينشف على الوش قبل ما نستعمل كريم الاساس .
3 – الكونسيلر :
هنبدأ بوضع الكونسيلر بطريقة الكروس يعنى هنجيب قلم الكونسيلر و نمشيه على المناطق اللى فيها حبوب على شكل علامة x او غلط. بلاش ندعك الكونسيلر بس هنمزجه على البشرة عن طريق الخبط بلطف بأدينا . نصيحة مهمة من بنات حوا إنتي ممكن كمان تستعملي الكونسيلر باللون الاخضر أو ال CC باللون الاخضر, لأن زي ما اتكلمنا قبل كده عن ألوان الكونسيلر وعرفنا مع بعض الاخضر وظيفته الرئيسية إنها تعادل لون الحبوب الحمرا وتخفيها تماما.
4 – الهالات السوداء :
هنسيب الكونسيلر اللى على الحبوب يهدا شوية و نبدا بوضع الكونسيلر عند الهالات السوداء اللى تحت العين و نخبط بادينا بنفس الطريقة.
5 – الزيادات :
هنجيب كمديل و نضغط بأيدنا بالمنديل على وشنا عشان نمتص اى زيادات للكونسيلر او دهون .
6 – كريم الاساس :
هنجيب كريم اساس سائل و نبدأ نحطه على الوش باستخدام الفرشاة الخاصة بيه بطريقة دائرية واهم حاجة حطيه بالفرشة بشكل افقي واضغطي عشان متشيليش بالفرشة الكونسيلر اللي حطيناه في الاول.
7 – البودرة :
هنسيب وشنا يهدأ كذا دقيقة و بعدين نبدأ بوضع البودرة المضغوطة او السايبة و هنستخدم فرشاة كبيرة مخصوص فى وضعها و توزيعها , برضه هنحطها بوضع افقي زي ماانتوا شيفين كده عشان نتأكد إنها مش هتشيل كريم الاساس.
خطوت اختيارية:
ممكن تستعملي مثبت المكياج وترشي منه علي وشك وده عشان يثبت اللوك ويقلل فرص إن المكياج يسيح أثناء اليوم, شوفي من هنا إزاي ممكن تعملي مثبت مكياج لنفسك في البيت
الخطوة الاخيرة :
بعد وضع البودرة وشنا كده هيكون جاهز عشان نحط باقى المكياج بسهولة وتحصلي علي لوك جميل يدوم معاكي طول يومك..
