موضة لبس الحوامل !
جميلات بنات حوا الحوامل مش عايزينكم تحسوا انكم مختلفين ابدا و مش عشان شكل جسمكم اتغير يبقى مينفعش نلبس على الموضة و نتألق كمان انهاردة بنلبى طلبكم و جايبنلكم احدث موديلات لبس الحوامل ليكم انتم ..
الشتاء ده من خطوط الموضة فيه وباكتساح البونشو او الشال بكل الوانه وممكن تلبسيه بسهولة و فى اى وقت بليل او الصبح لان فى منه المناسب للمشاوير السريعة و فى منه لبليل و الخروج و هيكون مريح ليكى لانه بيدارى من زيادة وزن الجسم فى مرحلة الحمل و اختارى دايما الالوان المضلعة او المزركشة و ممكن تجمعى بين الالوان الغامقة زى الاسود و البنى و النبيتى مع اى لون تانى بتحبيه زى الاخضر و الموف و الاحمر و البينك و البنشو ده عملى جدا لانه شيك و ممكن تلبسى تحتته اة توب و مش هيبان و تلسى عليه جيب او بنطلون زى ما تحبى و مش بيقيدك فى اى حاجة و ياسلام لو زودتى للطقم بوت او سيفتى شوز هتبقى مامى على الموضة تماما .
زى ما انتم عارفين يا ماميز بنات حوا الحلوين ان ده اكثر وقت بنحتاج فيه للراحة و ان اللبس ميكونش ضيق على جسمنا او منطقة البطن و طبعا مفيش احلى و لا اجمل من الفساتين اذا كانت قصيرة او طويلة خصوصا فى مراحل الحمل الاخيرة . احرصى ان الفستان ميكنش محدد منطقة البطن و يكون محدد من تحت الصدر شوية عشان يخلى جسمك شكله ارفع . الجزء اللى فوق ممكن يكون سادة و اللى تحت بالوان كثيرة زى ما تحبيها و ممكن كمان يتلبس كله لون واحد .
الكارديجان الصوف او الشتوى نازل بشكل جميل للحوامل مخصوص عشان يدارى البطن و له تنيات طويلة وواسع و ملوش زراير عشان يديكى مساحة اكثر للحركة و الراحة اما بالنسبة للالوان فى منه المشجر بألوان كثير و اللى فيه المربعات و المثلثات و فى منه السادة زى النبيتى و البنى و البيج و الاسود .