وصفات للعناية بالأظافر ونصايح للحفاظ على جمالهم

بقلمريهام محمود فيأظافر visibility12600

جبت لكل بنات حوا النهاردة مجموعة نصائح و وصفات للعناية بالأظافر لانها جزء مهم جدا ضروري الاهتمام بيه لانها بتكمل مظهر الايد وتخليها تطلع بشكل حلو عشان كده لازم نديها العناية الكافية.

نبدأ مع بعض بمجموعة نصائح للعناية بالأظافر:

قبل الوصفات لازم في البداية تعرفي مجموعة النصائح دي وبعدين تطبقي الوصفات عشان تديكي النتيجة المطلوبة لان الاتنين بيكملو بعض

  • استخدمي المبرد بشكل صحيح لبرد الأظافر لان استخدامه بشكل غلط ممكن يسبب تقصفهم وتكسيرهم ابعدي عن بردهم في اتجاهين الطريقة الصحيحة هي بردهم في اتجاه واحد, واحرصي انك تبرديهم بشكل منتظم اول ما يبدأوا يطولوا, وخلي بالك اوعي تبردي الاظافر وهي مبلولة لانها بتكون ضعيفة ابرديها وهي جافة تماما.
  • حاولي انك تعملي باديكير بسيط وسريع بشكل منتظم مرة واحدة في الاسبوع ولو مش قادرة تروحي لمركز التجميل او متخصصة تعملهم لك ممكن تعمليهم انتي بنفسك في البيت, جيبي من الصيدلية كبسولة فيتامين E وبلي قطنة وامسحي بيها الأظافر والجلد اللي حواليه وبعد كده حطي كريم مرطب وحركي الجلد بس بالراحة عشان ما تجرحيش نفسك, وبعدين حطي مقوي اظافر.
  • ابعدي خالص عن مزيل الأظافر اللي فيه اسيتون لانه بيسبب جفاف الأظافر لما تيجي تشتري المزيل بصي على مكوناته وجيبي اللي فيه اسيتات مش اسيتون.
  • والعناية طبعا مش بس من بره العناية الداخلية مهمة جدا عشان كده لازم تشربي كل يوم كمية كافية من المية لانها بتأثر على صحة الأظافر وشكلهم.
  • كمان لازم تاخدي كمية متوازنة من البروتين في اكلك لان ليها تأثير مباشر على الأظافر ودي موجودة في اللحوم البيضاء, واللحوم الحمراء, ومنتجات الالبان, وكمان الحديد وهتلاقيه في الخضروات زي السبانخ والبيض ,وعنصر الاوميجا 3 كمان مفيد جدا وهتلاقيه في المكسرات والاسماك زي التونة.
وصفات للعناية بالأظافر
وصفات للعناية بالأظافر

ودي مجموعة وصفات للعناية بالأظافر:

– وصفة تلميع الأظافر:

المكونات :

2 معلقة كبيرة ماء ورد

2 معلقة كبيرة عصير ليمون

معلقة زيت زيتون

طريقة التحضير والاستخدام :

هتخلطي كل المكونات مع بعض كويس، وبعدين حطي الخليط على الأظافر بقطنة باستخدام وتسيبيه لحد ما ينشف، وتفضلي تكرري دهنهم لحد ما تخلص كمية الخليط اللي عندك وبعدين تغسلي الأظافر بمية دافية، وكرري لوصفة كل يوم لحد ما توصلي للنتيجة اللي انتي عايزاها.

– وصفة لتغذية الأظافر:

المكونات :

2 معلقة كبيرة زيت زيتون

2 معلقة كبيرة زيت جلسرين

5 نقط عصير ليمون

طريقة التحضير والاستخدام :

اخلطي المكونات مع بعض  ودفيهم شوية، وبعدين اغمسي ضوافرك في الخليط لمدة ربع ساعة وبعدين اغسليهم بمية باردة, وكرري الخلطة تلات مرات في الاسبوع.

– وصفة زيت دوار الشمس لتقوية الأظافر وتطويلها:

المكونات:

صفار بيضة

معلقة صغيرة زيت دوار الشمس

طريقة التحضير والاستخدام :

اخلطي صفار البيض مع الزيت هتتكون عندك عجينة ، افرديها على الأظافر، وسيبيها لحد ما تنشف، بعدين اغسليهم بمية دافية.

– وصفة كريم خل التفاح لتقوية الأظافر وتطويلها:

المكونات:

3 معالق صغيرة زيت زيتون

3 معالق صغيرة من خل تفاح

صفار بيضة

طريقة التحضير والاستخدام :

اخلطي المكونات مع بعض كويس، وبعدين ادهني الأظافر بقطنة وسيبي الخليط لحد ما ينشف وبعدين اغسليهم بمية دافية, ولو فضل من الخليط ممكن تحطيه في التلاجة لحد ما تيجي تستخدمي منه تاني.

– وصفة الثوم والخل لتقوية الأظافر وتطويلها:

المكونات:

فص ثوم

نص معلقة خل

نص معلقة  عصير ليمون

طريقة التحضير والاستخدام:

اول حاجة دلكي ضوافرك بفص الثوم، وبعدين اخلطي الخل والليمون مع بعض واغمسي ضوافرك في الخليط لمدة ربع ساعة وبعدين اغسليهم, مع تكرار الوصفة دي الضوافر هتطول بشكل سريع جدا وصحي.

– خلطة لتقوية الأظافر:

المكونات:

2 معلقة لبن

ومعلقة عسل نحل

طريقة التحضير والاستخدام:

اخلطي اللبن والعسل وادهني بيهم ضوافرك وسيبي الخليط لمدة ربع ساعة وبعدين اغسليهم, كرري الوصفة دي مرتين في الشهر.

– خلطة الليمون لعلاج تكسير الاظافر:

المكونات :

عصير 2 ليمونة

طريقة الاستخدام :

بس تدهني ضوافرك بعصير الليمون مرة الصبح ومرة بالليل يوميا لمدة اسبوع.

– خلطة لتبييض الأظافر:

المكونات:

عصير ليمونة

وبيكنج صودا

طريقة التحضير والاستخدام:

اخلطي عصير الليمون والبيكنج صودا وافركي بيهم ضوافرك كويس وبعدين اغسليهم بمية باردة, الخلطة دي مفيدة جدا لتبييض الضوافر ومنع اصفرارها خصوصا لست البيت اللي ضوافرها دايما بتصفر من شغل البيت.

شوفي كمان ادوات رسم الاظافر وازاي تستخدميها

ادوات رسم الاظافر
ادوات رسم الاظافر