أوقات صلاحية المكياج والأضرار الناجمة عن استعماله بعدها!
طبعا كلنا دلوقتى بنستخدم ادوات الماكياج بشكل شبه يومى ، سواء و احنا نازلين الكلية او الشغل ، و بنحرص دائما على اننا نشتري اجود الانواع علشان نحافظ على بشرتنا و نحميها من التعرض للاضرار اللى بتسببها ادوات الماكياج رخيصة الثمن او اللى مصدرها مش معروف ، لكن اللى ممكن مناخدش بالنا منه انه حتى ادوات الماكياج الغالية او اللى من ماركات معروفة ممكن تسبب اضرار كبيرة جدا لبشرتنا لما تنتهى صلاحيتها ، خصوصا انه معظمنا مبناخدش بالنا من تاريخ الصلاحية و منعرفش الاضرار اللى بتسببها ادوات الماكياج منتهية الصلاحية …فى المقال ده هنعرفك اوقات صلاحية الماكياج و الأضرار الناجمة عن استعماله بعدها!
1- الماسكارا:
صلاحية الماسكارا بتكون من 3 ل 4 شهور ، طبعا الماسكارا بعد مرور الفترة دى ممكن تكون لسه مخلصتش و بتكون غالية فيمكن نفضل نستخدمها و نقول مش هيحصل حاجه ، بس ده غلط كبير طبعا .. مهما تكون ماركة الماسكارا او اد ايه غالية طالما صلاحيتها انتهت لازم ترميها فورا لأنه كل مرة بتفتحى فيها علبة الماسكارا و تدخلى فيها الفرشة و تخرجيها و تبدأى باستخدامها ، الفرشة بتلقط كمية كبيرة جدا من الباكتيريا اللى بتكون فى الهواء و بتنقلها لعنيكى ، و ده ممكن يسبب احمرار فى العيون ، احساس بالحكة ، او الالتهابات .
2- كريم الاساس ” الفاونداشن “:
اكيد كريم الاساس او ” الفاونداشن” هو من اهم ادوات الماكياج اللى بنستخدمها كأساس لماكياجنا، لكن اللى ممكن تكونى مش عارفاه انه معظم كريمات الاساس اللى بتكون موجودة حاليا بيكون أساس تكوينها او تركيبها ” مائى ” ، و ده معناه انها بتكون بيئة مناسبة جدا لجذب الباكتيريا ، صلاحية كريم الاساس ممكن توصل لسنتين ، لكن بمجرد ما تفتحى علبة كريم الاساس عمره بيقل لفترة بتتراوح بين 6 ل 12 شهر ، نصيحتنا انه بمجرد ما تلاحظى تغيرات فى ريحة او لون كريم الاساس لازم توقفى استخدامه لأنه ممكن يسبب تهيج او التهابات لبشرتك .
3- الكونسيلر:
وظيفة الكونسيلر ى اخفاء الهالات السوداء و الاكياس او ” الجيوب ” اللى بيسببها الارهاق تحت العين ، و الكونسيلر منتهى الصلاحية بيسبب الهالات السوداء و الاكياس تحت العين، صلاحية الكونسيلر فى شكل البودرة او او الكونسيلر ” الستيك ” ممكن توصل لسنتين ، اما الكونسيلر فى القوام السائل او الكريمى فصلاحيته سنة واحدة بس .
4- البودرة:
البودرة هى أساس الماكياج اللى مش ممكن نستغنى عنه ابدا ، و على طول بنستخدمها وهى الاطول عمر بين ادوات الماكياج المختلفة و بتوصل صلاحيتها لسنتين، لكن لو البودرة بتاعتك من النوع اللى اساه مائى او زى ما بنسميها ” بودرة مائية ” ممكن تجذب انواع مختلفة من الباكتيريا اخطرها السالمونيلا ، علشان كده لو بتسنخدمى ” البودرة المائية ” خدى بالك دايما انك تقفليها كويس بعد استخدامها .
5- أحمر الخدود:
احمر الخدود او ” البلاشر” بينطبق عليه نفس الكلام اللى قولناه عن البودرة ،صلاحيته لمدة سنتين والافضل انك تنضفى فرشاة احمر الخدود كل فترة ، وتحتفظي بعلبة “البلاشر” الخاصة بيكى فى مكان جاف .
6- Eye shadow ” الـ آي شادو “:
مهم جدا انك تستبدلى علبة ال” آى شادو ” الخاصة بيكى كل 3-6 شهور، علشان تتجنبى انه يسببلك احمرار العين او الشعور بالحكة مع استخدامه, وعلى الرغم من أنه يشبه المساحيق التانية زي البودر و احمر الخدود بس الايشدو مختلف لانه بيبقي على اتصال دايم مع الغشاء المخاطي في العين وفيه خطر أو احتمال من نقل البكتيريا إلى المنتج ومن بعد كده من المنتج للعين.
7- Eye liner ال ” ايلاينر”:
ايا كان نوع ال ” آى لاينر ” اللى بتستخدميه سواء في شكل قلم ، او سائل ، او كرم لازم تغيريه كل 6 شهور، لانه لو استخدمتى ال “ايلاينر” بعد الفترة دى ممكن يسببلك التهابات فى العين او فى الجفون شديدة جدا .
8- الجيل ايلاينر:
الجيل ايلينر بيبقي عبارة عن وعاء من الكحل وبيبقي سهل قوي انه يتعرض أو يلقط البكتيريا. يفضل تغيريه بعد 3 شهور.
9- الكحل:
10- الروج:
الروج كمان من اطول ادوات الماكياج عمرا ، لكن بننصح بالتوقف عن استخدامه بعد مرور سنة لانه بسبب وضعه كتير على الفم و بمرور الوقت ممكن يكون تجمعات من البكتيريا اللى ممكن تسبب فى تكون الاتهابات و التشققات للشفايف .
11- المانيكير ” طلاء الاظافر”:
اللى ممكن يسبب تلف المانيكير او انه يبقى غير صالح للاستخدام مش الباكتيريا او الفطريات.. لا المانيكير ممكن يجف او تتكون تكتلات جافة من المانيكير على الفرشاة ، تقدرى تتجنبى ده بأنك ترجي المانيكير كويس قبل الاستخدام و تقفيليه كويس بعد الاستخدام .
12- فرش الماكياج:
لو اهتميتى بنضافة فرش الماكياج و احتفظتى بيهم فى مكان جاف و بعيد عن الاتربة ممكن تمتد صلاحيتهم لسنين ، لكن لو لاجظتى ان شعر الفرش بدأ يقع يبقى لازم تتبدليهم فورا، الطريقة الافضل للحفاظ على فرش ماكياجك نضيفة و صحية هى انك تنضفيهم أول بأول عن طريق غسيلهم و تجفيفهم و انك تحتفظى بيهم فى علبة او كوباية على تسريحتك بحيث يكون شعر الفرشاة لفوق زى الصورة .