نصائح تضمن شياكتك فى الجامعة !
كل بنت فى الجامعة بتحب تظهر كل يوم بستايل مختلف عن التانى، و بنحاول تكون اطلالة كل يوم شبك و متميزة و كمان عملية و مختلفة يوم بعد يوم ، ده بيخليكى تبقى محتارة تلبسى ايه كل يوم الصبح وانتى نازلة ، و بيخليكى تضيعي وقت كتير الصبح فى اختيار هدومك.. هنا هنقولك على 5 نصائح تضمنى بيهم شياكتك فى الجامعة يوم بعد يوم.
ايه هي الملابس المناسبة للجامعة ؟
1- الشوز ” الكوتشى” لازم يبقى موجود:
الجامعة يعنى مشى و وقوف و حركة كتير ، و مع الحركة المتكررة دى محتاجة يبقى دايما حذائك مريح و عملى و ده بيتوفر فى حاجه واحدة بس ” الكوتشى ” ، لأنه بيضمنلك إطلالة شيك و مريحة و عملية فى نفس الوقت ، احرصى دايما انه يبقى عندك اكتر من كوتشي بألوان محايدة زى الابيض و الاسود علشان تقدرى تلبسيهم على اكتر من طقم بسهولة و من غير ما تحتارى ، لانه الابيض و الاسود زى ما احنا عارفين هما ملوك الالوان .
و ممكن تستخدمى الوان تانية زى ” البيج او الجملي ، الروز ، النبيتى ” لانهم من اهم الوان موضة الشتاء ده ، و بيمشوا مع الوان تانية كتير .
2- ماتستغنيش عن الاكسسوارات:
اهتمى دايما بانك تضيفى الاكسسوارات المناسبة لملابس الجامعة، الاكسسوارات مهمة جدا علشان ضيف لمسة جمالية كبيرة جدالاطلالتك و كمان بتزود من شياكة الطقم ، حاولى تبقى الاكسسوارات بسيطة لكن جميلة زى ساعة ايد و سلسلة رقيقة او خاتم مع انسيال او اسورة مناسبة .
سلسة
3- اختارى ملابس مريحة:
الجامعة زى ما قلنا حركة كتير وتنطيط، يعنى لازم تاخدى بالك انه لبسك يكون واسعه و مريح ، دايما حاولى تبعدى عن الفساتين الضيقة او البناطيل الضيقة او”السكينى” والهدوم اللى قماشها بيناسب المناسبات او الليل اكتر زى الشيفون او الساتان، و اوعى تلبسى كعب عالى ” خاصة لو رفيع ” فى الجامعة ، اهتمى بلبس القمصان او الفساتين القطنية و البناطيل الجينز او القماش الى بتناسب مقاسك بقصاتها المختلفة و بتكون مريحة .
4- البليزر مع الجينز .. تحفه !
كطالبة فى الجامعة بتحتاجى يبقى عندك لبس شوية فورمال لانك ممكن تحتاجيه فى الامتحانات او مقابلات الشغل ، الحل السحرى هنا هو البليزر مع البنطلون الجينز لانه على قد ما بيبقي شكله حلو جدا و شيك الا انه كمان عملى جدا و مبيقللش اى حاجه من شياكتك و جمال اطلالتك ، احرصى دايما انه يبقى عندك بليزر او اتنين بألأوان محايدة و مختلفة زى الاسود و البيج مثلا .
5- الشنط ..
شنط الضهر و الشنط الكروس هما الانسب لبنات الجامعة ، لانك بتقدرى تحى فيهم كل حاجه بتحتاجيها من كتب و ماكياج و محفظة و خلافة و بيكون شكلهم عملى و حلو جدا و شيك ، لكن مفيش مانع من انك تلبسى الشنط الصغيرة فى الايام اللى مبتحتاجيش فيها كتب كتير للجامعة .
